Во насока на унапредување на родовата еднаквост во професионалниот и едукативниот свет, Алијансата за родова еднаквост на работното место – GEA и M6 Едукативниот Центар официјално го започнаа своето партнерство преку потпишување на Меморандум за соработка. Ова партнерство беше формализирано со цел заедничко креирање и имплементација на образовни активности, работилници, програми за менторство, заедничко аплицирање на проекти и размена на знаење и контакти. Фокусот на оваа соработка ќе биде и поддршката при организација на настани и промовирање на женски улоги и лидерство во образованието, бизнисот и општеството.

Партнерството е во согласност со трите главни столба на GEA: еднаква застапеност на сите нивоа и позиции, еднаква плата за иста работа, и еднакви можности за напредок –вредности кои и M6 активно ги промовира преку својата едукативна мисија.

Иницијативата на Асоцијацијата за е-трговија на Северна Македонија (АЕТСМ), GEA, е посветена на создавање инклузивна работна култура и активно работи на промовирање на еднакви можности за сите и поттикнување на родова еднаквост на работните места. Алијансата е насочена кон создавање инклузивна култура каде што и жените и мажите се еднакво вреднувани за нивниот придонес во работната средина, што ќе создаде нови начини, синергии и платформи за решавање на критичните прашања кои влијаат на развојот на жените на работното место.

„Партнерството со M6 Едукативниот Центар ја отвора вратата кон нови образовни можности за сите кои веруваат дека еднаквоста се постигнува преку континуирано учење, личен развој и вложување во себе. Со нашата заедничка енергија, знаење и визија, ќе придонесеме кон општество каде секој талент ќе има можност да се развие.“ – изјави раководителката на GEA, Марија Ристовска.

M6 Едукативниот Центар, претставува водечка институција за долгорочно учење и со својата мисија се залага за позитивна трансформација и развој на организациите, општеството и индивидуите. Преку бројни активности, обуки, настани и проекти постојано разработува и отвара актуелни теми значајни за економскиот и општествениот развој на земјата и регионот.

Центарот со своето долгогодишно искуство во неформална едукација и обуки, има активна улога во градење на индивидуален и организациски капацитет преку иновативни програми за лидерство, менаџмент и личен развој.

„Оваа соработка е природно продолжение на нашата мисија – за креирање на инклузивно опкружување, каде што ќе ги охрабриме сите индивидуи да вложуваат во својот личен и професионален развој. Од пред неколку години, М6 воспостави соработка со Women on Boards Adriа, а во нашето портфолио креиравме и програма за женско лидерство, со цел поддршка и охрабрување на жените и нивната застапеност во носењето на одлуки – како во бизнисот, така и во заедницата. Заедно со GEA ќе продолжиме да работиме на практични и инспиративни програми кои носат долгорочна вредност за целото општество.“ – изјави Тамара Грбевска, проектен менаџер од M6 Едукативниот Центар.

Во следниот период, GEA и M6 ќе работат заеднички на продлабочување на соработката и на организација на заеднички едукативни настани, работилници, како и заеднички проекти за поддршка на жените и мажите во различни професионални сектори. Партнерството ќе се базира на меѓусебна поддршка, размена на ресурси и споделување на добри практики.

Ова е уште еден чекор во мисијата на GEA за создавање на фер и инклузивни работни средини, каде што секој поединец има еднаква можност да напредува и да придонесе со својот целосен потенцијал. Инаку, Работата на GEA ја поддржуваат Eurolink, Casys и Halkbank како главни партнери, како и Филип Морис Тутунски Комбинат Прилеп, Пивара Скопје, А1 Македонија, Сава Пензиско, и CosLoveMetics како партнери. Поддржувачи на Алијансата се и Сава Осигурување, Евроинс Осигурување, Publicis Groupe, Property One Group, Aristocrat, и Avenga Academy.

Повеќе информации за активностите и можностите за приклучување кон Алијансата за родова еднаквост на работното место се достапни на: https://genderequalityalliance.org.

Атлантик Група во првата половина на 2025 година оствари приходи од продажба во износ од 559,5 милиони евра, што претставува раст од 9,2% во споредба со истиот период минатата година. Добивката пред камати, даноци и амортизација (EBITDA) изнесува 50,7 милиони евра, што е пад од 11,7%, додека нето добивката се намали за 39,4% и изнесува 14,8 милиони евра.

„Атлантик Група во првото полугодие од 2025 година, продолжува да остварува одлични продажни резултати, со раст на приходите во речиси сите деловни и дистрибуциски области на сите поважни пазари. И покрај силниот раст на приходите, профитабилноста е под притисок поради рекордните цени на суровото кафе и какао, како и свесните инвестиции во вработените и брендовите, со цел долгорочен раст.

Нашите два нови бренда, DoNatural и Lemonish, постигнуваат одлични пазарни резултати, а го проширивме и нашето портфолио со иновации како што се Smoki Protein и Argeta Snack. Со обврзувачката понуда за купување на компанијата Osem и брендот Kekec и продажбата на производството и брендот Montana, стратешки се фокусиравме на зајакнување на нашите основни категории. Исто така, издадовме нови корпоративни обврзници во износ од 80 милиони евра, со што ја потврдивме нашата стабилност и долгорочна ориентација“, истакна претседателот на Управата на Атлантик Група, Емил Тедески.

Пијалоци, Донат и Кафето го предводат растот

Во првата половина од 2025 година, најзначаен раст меѓу Стратешките деловни области (SBA) постигна кафето (+27,1%), Донат (+14,5%) и Деликатесните намази (+13,6%). Кафето, како најголема поединечна категорија, учествува со 25,4% во вкупните приходи. Во сегментот на дистрибуција, најголем раст е забележан во Стратешката дистрибутивна област (SDP) Србија (+25,2%) и Северна Македонија (+13,9%). На најголемиот пазар, Хрватска, е постигнат раст на продажбата од речиси 6%, што дополнително ја зајакна пазарната позиција. Во вкупната продажба на Атлантик Група, сопствените брендови учествуваат со 64,9%, фармацевтското работење со 8,9%, додека принципалните брендови учествуваат со 26,2% во приходите.

Достигнувања во одржливост и човечките ресурси

Покрај иновации во портфолиото на производи, Атлантик Група во првата половина од 2025 година постигна и голем број препознатливи достигнувања во областите на управување со човечките ресурси, енергетската ефикасност и одржливост.

Признанија

Во Босна и Херцеговина, компанијата беше прогласена за еден од трите најпосакувани работодавци според анкетата спроведена од порталот MojPosao.ba а во која беа вклучени 35.000 испитаници. Атлантик Група повторно беше наградена со сертификатот „Equal Pay Champion“, со што се потврдува дека разликата во платите меѓу половите е намалена на 1,09%, а жените сочинуваат 53% од менаџментот. Трговската академија на Атлантик за прв пат беше наградена со златна награда на конференцијата HR Days за исклучителните достигнувања на повеќе од 60 внатрешни инструктори и над 1.400 членови на продажниот тим вклучени во обуката.

Енергетска ефикасност

Атлантик Група ја освои и наградата за енергетски најефикасна компанија во Словенија, благодарение на мерките што доведоа до намалување од 30% на потрошувачката на електрична енергија по тон производи на Аргета и вкупно намалување од 11% на потрошувачката на енергија.

Иновации

Иницијативата Innowave вклучи повеќе од 80% од вработените во фабриката на Argeta во Изола, кои за 30 дена предложија 30 решенија за подобрување на работната средина, а проектот беше награден со престижната награда Златна пракса. Аптекарскиот синџир Farmacia го освои третото место на натпреварот HealthComm Awards за проектот „База на податоци за грешки при употреба на лекови“ во категоријата промоција на здравјето и благосостојбата.

Во голем пресврт на глобалната економска сцена, американскиот претседател Доналд Трамп објави „масовен“ трговски договор со Јапонија, кој предвидува реципрочни царини од 15% за извозот на двете земји. Договорот, кој Трамп го нарече „можеби најголемиот досега склучен“, предвидува значително намалување на царините за јапонските автомобили од досегашните 25% на 15%, потег што може да има значајни последици за двете економии и за глобалните трговски текови.

Според објавата на Трамп на социјалната мрежа „Truth Social“, Јапонија се обврзала на инвестиции во вредност од 550 милијарди долари во САД, а според него, Америка ќе добие „90% од профитот“. Дополнително, Јапонија ќе ја отвори својата економија за американски производи вклучувајќи автомобили, камиони, ориз и други земјоделски производи.

Договорот се појавува во критичен момент за јапонската економија, чиј извоз на автомобили кој сочинува речиси 28,3% од вкупниот извоз бележи значителен пад. Според податоците на царината, во јуни извозот на јапонски автомобили во САД се намалил за 26,7%, по веќе регистриран пад од 24,7% во мај. Вкупниот извоз во САД за првата половина на 2025 година изнесувал 10,3 трилиони јени (приближно 70,3 милијарди долари), што е намалување од 0,8% на годишно ниво.

Главниот економист на „Annex Wealth Management“, Брајан Јакобсен, изјави за CNBC дека „пред една година, ова ниво на царини ќе беше шокантно. Денес воздивнуваме со олеснување“, алудирајќи на затегнатите трговски односи во последните години.

Од јапонска страна, премиерот Шигеру Ишиба изјави дека договорот ќе значи нова ера во трговските односи меѓу двете земји и изрази очекување дека истиот ќе донесе економски бенефити за двете страни. Договорот доаѓа во чувствителен политички момент за Ишиба, кој се соочува со пад на политичката поддршка откако неговата владејачка коалиција го изгуби мнозинството во Горниот дом на јапонскиот парламент. Иако најави дека ќе остане на функцијата, јапонскиот весник Маиничи пренесе дека Ишиба размислува за оставка до август, додека Јоимури јавува дека конечната одлука ќе зависи од напредокот на економските преговори.

Дополнително, Трамп најави дека се подготвува и нов договор со Јапонија поврзан со течниот природен гас, како и дека „утре следи европски договор“, без да даде конкретни детали.

Овој трговски договор не само што може да ја стабилизира економијата на двете земји, туку има потенцијал да ја пренасочи глобалната трговија, да ги ревитализира инвестициите и да создаде стотици илјади нови работни места – како што најави Трамп. Финансиските и банкарските сектори внимателно го следат развојот, имајќи предвид дека договорот може да влијае врз вредноста на јенот, девизниот пазар, извозните кредити и глобалниот проток на капитал.