Цените на горивата остануваат стабилни, а попустот за дизел се зголемува и ќе важи до 6 април, информираа од Министерството за енергетика, рударство и минерални суровини.

Според соопштението, мерките на Владата во комбинација со активности на компаниите придонеле за ублажување на ценовниот притисок и стабилизирање на пазарот.

Компанијата ОКТА ја продолжува мерката за попусти и по крајот на март, при што попустот за дизел се зголемува од 2 на 3 денари по литар.

Од Министерството посочуваат дека ова е резултат на координацијата меѓу институциите и економските оператори, со цел дел од олеснувањата да се пренесат директно кон граѓаните и стопанството.

Како дополнителна мерка се наведува и намалувањето на ДДВ за горивата од 18 на 10 проценти, што, според надлежните, довело до намалување на цените за 6 до 7 денари по литар.

Министерката Сања Божиновска изјави дека со овие чекори е избегнат поголем ценовен раст и е обезбедена стабилност на пазарот.

Од ресорното министерство информираат дека снабдувањето со горива се одвива без прекини, резервите се стабилни, а институциите вршат засилени контроли.

Надлежните најавуваат дека ќе продолжат со следење на состојбите и, доколку има потреба, ќе преземат дополнителни мерки за стабилен пазар и заштита на економијата.

Глобалната енергетска криза, предизвикана од конфликтот на Блискиот Исток, доведе до драстичен раст на цените на авионското гориво, што може да резултира со поскапување на авионските билети веќе од април, објави Банкар.ме

Директорот на „Air Montenegro“, Вук Стојановиќ, во изјава за медиумите посочи дека компанијата засега ќе ги задржи актуелните цени на билетите до крајот на март, но предупреди дека доколку високите цени на горивото продолжат или дополнително се зголемат, ќе биде неизбежна корекција на ценовната политика.

Според него, цените на авио-горивото кај одредени добавувачи речиси се удвоени. Во споредба со 20 февруари, цената кај главниот снабдувач на црногорските аеродроми пораснала за околу 654 евра по метричка тона, што претставува зголемување од приближно 90 проценти.

Овој раст значително ги зголемува оперативните трошоци на компанијата. Со оглед на тоа што авионите од флотата на „Air Montenegro“ трошат просечно околу две метрички тони гориво на час лет, трошокот по час летање е зголемен за околу 1.300 евра.

Доколку ваквото ниво на цени се задржи до крајот на годината, дополнителните непланирани трошоци за компанијата би можеле да достигнат околу седум милиони евра.

Иако засега цените на билетите остануваат непроменети, од компанијата јасно сигнализираат дека понатамошниот развој на пазарот на горива ќе биде клучен фактор за евентуални поскапувања во наредниот период.

Со амбиција за посилно економско поврзување и поорганизиран настап на македонските бизниси во Канада, во Торонто се одржа конститутивниот состанок на Основачкиот одбор на Канадско-македонската Стопанска комора.

Иницијативата, зад која стојат Милосов Лукароски, Теа Пешева, Диана Индовски, Иван Лукароски и Кирил Колемишевски, има за цел да воспостави централен деловен форум за македонската заедница во Канада и да ја поттикне нејзината економска активност.

На првата средба беа утврдени основните приоритети и правци на делување, при што фокусот е ставен на поддршка на претприемачите, поврзување на компаниите и создавање кохезивна бизнис мрежа. Според основачите, Комората треба да обезбеди услови за координиран и стратешки настап на македонските деловни субјекти.

Воедно, се очекува новоформираната организација да придонесе за интензивирање на економската соработка меѓу Канада и Македонија, преку поттикнување трговија, инвестиции и размена на искуства и експертиза.

Комората се позиционира како платформа за развој на претприемништвото и зајакнување на професионалните капацитети, со намера да изгради стабилна и функционална мрежа која ќе генерира конкретни деловни резултати.

Основачкиот одбор оценува дека ова претставува значаен чекор кон консолидирање на македонскиот бизнис фактор во Канада, со потенцијал да влијае и врз продлабочување на економските врски со матичната земја.

Канадско-македонската Стопанска комора ќе биде отворена за членство и партнерства со сите заинтересирани компании, претприемачи и професионалци кои сакаат активно да учествуваат во развојот на деловната соработка меѓу двете држави.