Орлин Ваташки е именуван за нов член на Управниот одбор на УНИБанка АД Скопје и официјално веќе од 21.08.2025г. е дел од највисокиот раководен тим на Банката.

Станува збор за врвен банкарски професионалец со повеќе од 20 години работно искуство во финансискиот сектор, период кога бил на повеќе одговорни раководни позиции и успешно се справувал со сите предизвици.

“Почестен сум од довербата да бидам именуван за член на Управниот одбор на УНИБанка АД Скопје. Со благодарност ја прифаќам одговорноста, верувајќи дека сите заедно како колектив имаме голем потенцијал и можеме да ја исполниме нашата мисија. Подобрувањето на услугите за клиентите, креирање иновативни продукти, активно унапредување на дигитализација на Банката,како и севкупното подобрување на перформансите на банката се сегменти од работењето кои ќе бидат во мојот фокус”,  истакна г. Ваташки.

Во неговата досегашна банкарска кариера бил дел од Банка Пиреос Бугарија, Софија,  како Раководител на одделение во Дирекција Проблематични кредити, потоа од МКБ Унионбанк, Софија,  која е дел од Bayern LB Германија, како Раководител на Одделение Проблематични побарувања, а за истакнување е и неговото искуство во Прва Инвестиционна Банка, Софија, како Директор на Дирекција Проблематични активи.

Г-динот Ваташки во УНИБанка АД Скопје ќе биде одговорен за дирекциите: Управување со ризик, Финансии и сметководство, Информатички технологии, Платни системи, Управување со проблематични пласмани, Картично работење и Кредитна администрација.

УНИБанка АД Скопје неколку години по ред остварува исклучителни резултати. И најновиот финансиски извештај за првиот семестар од 2025г. покажува раст на кредитирањето и нивото на депозити, раст на добивката и висока позиционираност во сегментот средни банки. Акциите на банката неколку години по ред се меѓу најпосакуваните на Македонската берза, што е потврда за добрата стратегија, одличната кадровска структура и воопшто за успешното работење на оваа институција.

Народната банка на Република Северна Македонија подготвува сет на нови мерки со кои ќе се олеснат условите за добивање станбен кредит за граѓаните што за првпат купуваат дом, додека паралелно ќе се заострат критериумите за лицата кои купуваат недвижности како форма на инвестиција. Ова го најави гувернерот Трајко Славески по средбата со директорот на Агенцијата за катастар на недвижности, истакнувајќи дека јавноста може да ги очекува мерките во рок од една до две недели.

Поддршка за младите семејства и поединци

Главната цел на овие мерки, според гувернерот Славески е да им се помогне на младите брачни парови и самци кои се соочуваат со енормно високи цени на становите, особено во Скопје, кои не одговараат на нивните примања.

„Ова што се случува на пазарот на станови, посебно во неколку градови, најмногу во главниот град, ги става во многу незавидна ситуација младите брачни парови или самци кои сакаат да го решат станбеното прашање. Цените се премногу високи од аспект на заработката. Ние не сакаме овој тренд да продолжи и мислам дека како Народна банка имаме инструменти со кои тоа ќе го постигнеме“, изјави гувернерот.

Разлика меѓу кредити за живеење и инвестиција

Тој потенцираше дека и во меѓународната практика постои јасна разлика меѓу кредитирањето за сопствено живеење и кредитирањето за инвестиција. Лицата кои купуваат недвижност за живеење претставуваат значително помал ризик за банките.

„Ако сте го ставиле под хипотека сопствениот дом, ќе направите сè за да се вклопите во своите доходи и да не доцните со отплатата. Ризикот е многу помал во споредба со оние кои позајмуваат пари за објекти што се користат за издавање или препродажба“, додаде Славески.

Апел до банките и контрола на изјавите

Гувернерот упати апел до банките да обрнат поголемо внимание на изјавите што ги даваат кредитобарателите при аплицирање за станбен кредит. Податоците покажуваат дека кај 73 отсто од становите купени со кредит е наведено дека се наменети за живеење, но тоа никој не го проверува.

„Во многу држави банките следат дали кредитобарателот навистина се вселил во објектот. Доколку се открие дека е дадена лажна изјава, тоа се третира како тешка измама, а банката има право веднаш да побара враќање на кредитот“, истакна гувернерот.

Можен поврат на ДДВ за прв дом

На новинарско прашање, гувернерот нагласи дека повеќе ја поддржува опцијата за поврат на данокот на додадена вредност (ДДВ) за лицата кои за првпат купуваат стан, како дополнителна стимулација за граѓаните да дојдат до сопствено живеалиште.

Очекувања од новите мерки

Со најавените мерки, Народната банка испраќа јасна порака дека ќе се поддржат оние кои купуваат недвижност за сопствено живеење, а истовремено ќе се намали трендот на шпекулативно купување станови како инвестиција, што во голема мера придонесува за растот на цените.

На 8 септември, Маврово повторно ќе биде центар на спортот, рекреацијата и забавата со традиционалната хронометар велосипедска трка HalkVeloGreen, која Халкбанк веќе шеста година по ред ја организира во рамките на својата „зелена“ платформа ХалкЕко. Настанот е повеќе од спортска трка, тоа е ден исполнет со енергија, дружење, рекреација и уживање во природата.

HalkVeloGreen и годинава ќе ги обедини љубителите на велосипедизмот, од најмалите учесници до рекреативци и професионални натпреварувачи. На учесниците им се нуди можност да се натпреваруваат во повеќе категории: Хоби, Млади и Деца.

Посебна атракција претставува и тимското рангирање, кое им овозможува на компании, клубови или групи пријатели заеднички да се пријават, со што настанот добива уште поголема спортска и забавна димензија.

Трката ќе се вози по живописната патека во Маврово, со должини од 12 и 22 километри, прилагодени според категориите. Стартна и звршна позиција е големиот паркинг пред спортската сала во Маврово, со патека која се протега покрај живописните предели до хотелот Радика и назад.

Пријавувањето за трката се врши онлајн преку www.trki.mk и трае до 3 септември 2025 година, или до пополнување на предвидениот број места. Котизацијата изнесува 800 денари, а сите собрани средства ќе бидат наменети за општествено корисни цели.

Секој учесник ќе добие богат стартен пакет кој вклучува стартен број со чип, медал за завршена трка, освежување, осигурување, подарок од Халкбанк, како и професионални фотографии од трката.

За најдобрите велосипедисти се предвидени и вредни награди. Во категоријата Хоби (мажи/жени) наградата за освоено прво место изнесува 15.000 денари, за второ место – 10.000 денари и за трето место – 5000 денари. Во категориите Деца и Млади наградите изнесуваат 10.000, 5000 и 3.000 денари. Најдобрите тимови ќе бидат наградени со дипломи и медали.

HalkVeloGreen е повеќе од спортска трка, таа е и вистински празник на спортот, природата и дружењето. Во текот на целиот ден, учесниците и посетителите ќе можат да уживаат во свежиот воздух, убавините на Националниот парк Маврово и атмосферата исполнета со позитивна енергија. За забавниот дел од програмата ќе бидат задолжени Викса и ди-џеј Oki Doki, а за најмладите тука е и омиленото слонче Халки кое ќе им подготви интересни активности.

HalkVeloGreen има за цел да потсети дека велосипедизмот не е само спорт, туку и начин на живот – активен, здрав и еколошки одговорен. Со својата мисија да ги обедини спортот, еколошката свест и заедничкото дружење трката станува традиција што инспирира и остава белег.

Трката е поддржана организациски и од Велосипедската Федерација на Македонија.