Халкбанк АД Скопје нуди промотивна понуда за орочено штедење „Пролетен депозит“, со фиксна каматна стапка до 3,30 проценти и можност за избор на исплата на каматата – месечно или на крајот од периодот на орочување.

Според понудата, клиентите кои ќе штедат во денари ќе добијат каматна стапка од 3,30 проценти, додека за штедење во евра, американски долари и британски фунти е предвидена камата од 2,50 проценти.

Рокот на орочување изнесува 25 месеци, а промотивната понуда ќе важи до 31 мај 2026 година.

Од банката информираат дека повеќе детали за условите и начинот на аплицирање се достапни на официјалната страница на Халкбанк.

Следејќи ги современите трендови во финансискиот сектор и растечките потреби на клиентите за поголема диверзификација и пристап до глобални инвестициски можности, Халкбанк АД Скопје ја проширува својата понуда со нова услуга, инвестирање во хартии од вредност на странски пазари.

Новата услуга претставува уникатна можност на домашниот пазар, клиентите преку една доверлива институција да добијат интегриран пристап до локални, регионални и глобални пазари на капитал, со поддршка, сигурност и експертиза што ги нуди Халкбанк.

Со воведувањето на оваа услуга, покрај веќе постоечката можност за тргување на Македонска берза, како и останатите банкарски и инвестициски услуги, клиентите ќе можат да инвестираат и во различни видови хартии од вредност на странски пазари, вклучително купопродажба на акции на глобално препознатливи компании, удели во ETFs (Exchange Traded Funds), како и други финансиски инструменти достапни на меѓународните берзи.

Дополнително, клиентите добиваат можност и за инвестирање во должнички хартии од вредност на странски пазари, меѓу кои државни обврзници, корпоративни обврзници и еврообврзници (EUROBONDS), што овозможува креирање на диверзифицирани инвестициски портфолија согласно различните инвестициски профили и стратегии на клиентите.

Тргувањето ќе се одвива на најразвиените светски пазари, вклучувајќи ги САД, Канада, Велика Британија, Германија, Франција, Италија, Швајцарија, Холандија, Белгија, Данска, Ирска, Шведска, Норвешка, Финска, Австрија, Шпанија, Португалија, Полска, Чешка, Унгарија, Романија, Хрватска и Словенија.

Во време кога инвестирањето станува сè поважен дел од личното и корпоративното финансиско планирање, Халкбанк продолжува да гради современ финансиски екосистем, создаден според потребите на клиентите и насочен кон долгорочен раст и финансиска стабилност.

За повеќе информации за услугата, условите и начинот на инвестирање, заинтересираните клиенти можат да се обратат во најблиската филијала на Халкбанк или да ја посетат официјалната веб-страница на банката.

Народната банка информираше дека со приклучувањето на Србија во системот СЕПА (Single Euro Payments Area), отсега е овозможено извршување плаќања во евра од и кон Србија во рамки на оваа европска платежна област.

Од Народната банка оценуваат дека станува збор за значаен чекор за унапредување на регионалната финансиска поврзаност, што ќе донесе директни придобивки за граѓаните, компаниите и дијаспората.

Со новината, прекуграничните плаќања во евра меѓу двете земји ќе бидат побрзи, поефикасни и со пониски трошоци во споредба со традиционалните платежни канали. Истовремено, се очекува поголема сигурност и предвидливост на трансакциите, како и поедноставени процедури за плаќања и приливи.

Од централната банка потсетуваат дека Србија е еден од најзначајните трговски партнери на земјава и се наоѓа меѓу петте најголеми партнери во надворешната трговија, што дополнително го зголемува значењето на интеграцијата во СЕПА.

Новината, како што наведуваат од Народната банка, е особено важна и за дијаспората, како и за економските и семејните врски меѓу двете земји, бидејќи ќе овозможи поевтини и побрзи трансфери на средства.

Народната банка соопшти дека и натаму активно работи на интеграција во европските платни системи и на унапредување на условите за модерни, брзи и достапни плаќања.