Во среда, 3 јуни, во дворот на ООУ „Браќа Миладиновци“ во Куманово свечено беше пуштено во употреба новото мултифункционално спортско игралиште, реализирано со поддршка на финансиското друштво Flex Credit како генерален спонзор и донатор на проектот.

Новото игралиште ќе го користат учениците од ООУ „Браќа Миладиновци“ и ООУ „Крсте Мисирков“, а неговата посебна вредност е инклузивниот пристап што овозможува активно користење и од страна на учениците од помошниот ресурсен центар за деца со посебни образовни потреби. Со тоа се создава безбеден и достапен простор каде сите деца ќе имаат можност за спорт, рекреација и дружење.

По повод отворањето беше организиран ревијален натпревар во рамки на програмата „Забавни мини спортови“, преку кој учениците ги претставија можностите на новите терени за кошарка, одбојка и ракомет, под менторство на наставниците по физичко образование.

На настанот присуствуваа претставници на училиштата, Општина Куманово, ЈП „Куманово План“, како и претставници на менаџментот на Flex Credit.

Проектот е реализиран во рамки на платформата за општествена одговорност на компанијата „Повеќе од финансии – поддршка за заедницата“, преку која Flex Credit инвестира во иницијативи што создаваат долгорочна вредност за локалните заедници.

„За нас ова е многу повеќе од донација. Преку платформата ‘Повеќе од финансии – поддршка за заедницата’ сакаме да оставиме трајни позитивни промени таму каде што се најпотребни. Веруваме дека секое дете заслужува квалитетен простор за игра, спорт и развој, а особено ни е драго што ова игралиште ќе биде достапно за сите деца без исклучок. Ова е инвестиција во младите, во нивното здравје, другарство и иднина“, изјави Тина Трпковска, маркетинг директор на Flex Credit.

Во знак на благодарност за поддршката и придонесот во реализацијата на проектот, на претставниците на Flex Credit им бише врачена благодарница од страна на раководствата на училиштата.

Од полноќ стапија во сила нови малопродажни цени на горивата, при што бензините поевтинија за два денари по литар, додека цената на дизелот се зголеми за 1,50 денари по литар.

Според новата одлука, литар ЕУРОСУПЕР БС-95 се продава за 86 денари, додека цената на ЕУРОСУПЕР БС-98 изнесува 88 денари за литар.

Од друга страна, ЕУРОДИЗЕЛ (Д-Е V) ќе чини 87 денари за литар, што претставува поскапување во однос на досегашната цена.

Новите цени важат на бензинските станици низ земјава од полноќ.

Компанијата „Макпрогрес“, сопственик на брендот „Винчини“, денеска официјално ќе ја пушти во употреба својата нова фабрика за производство на вафли во Виница, инвестиција вредна 8,5 милиони евра.

На настанот најавено е присуство на премиерот Христијан Мицкоски, претседателот на Стопанската комора Бранко Азески и градоначалникот на Виница, Митко Костадиновски. Новиот производствен капацитет ќе го претстави генералниот директор на компанијата, Глигор Цветанов.

Фабриката е изградена за само шест месеци, со учество на домашни градежни компании, инженери и проектанти. Објектот располага со две современи производни линии за производство на вафли и други кондиторски производи, наменети за домашниот пазар и за извоз.

Од компанијата посочуваат дека новата инвестиција ќе овозможи зголемување на производствените капацитети за околу 30 проценти и дополнително зајакнување на присуството на странските пазари, каде производите на „Винчини“ веќе се пласираат во повеќе од 60 земји.

Со стартот на производството веднаш се отвораат 40 нови работни места, а во текот на следната година се планирани уште 40 вработувања. Според најавите, проектот треба да придонесе за локалниот економски развој и да создаде нови можности за вработување во регионот.

Во рамки на посетата ќе се одржи и работна средба со менаџментот на компанијата, на која ќе бидат претставени деловните резултати, идните инвестициски планови и предизвиците поврзани со растот на извозот и конкурентноста на македонската прехранбена индустрија.

„Макпрогрес“ е една од најголемите домашни прехранбени компании и меѓу водечките македонски извозници. Со новата фабрика компанијата ја продолжува стратегијата за модернизација на производството, технолошки развој и проширување на своето присуство на меѓународните пазари.