Авиокомпаниите ширум светот предупредуваат дека цените на авионските билети ќе се зголемат поради наглиот раст на цените на горивото, предизвикан од ескалацијата на конфликтот на Блискиот Исток.

Австралиската авиокомпанија „Qantas Airways“ и „Air New Zealand“ во вторникот соопштија дека ги зголемуваат цените на билетите, нагласувајќи дека глобалната авиоиндустрија се соочува со сериозен и ненадеен пораст на трошоците за гориво.

Цената на авионското гориво, која пред почетокот на конфликтот изнесувала околу 85 до 90 долари по барел, во последните денови нагло пораснала и достигнала меѓу 150 и 200 долари по барел, соопшти националниот авиопревозник на Нов Зеланд. Поради неизвесноста околу развојот на конфликтот, компанијата ја суспендирала и својата финансиска прогноза за 2026 година, пренесува „Reuters“.

Американско-израелската војна против Иран предизвика силен раст на цените на нафтата, нарушување на глобалниот воздушен сообраќај и рекордно зголемување на цените на авионските билети на одредени линии. Ова, според извештаите, предизвикува страв од значително намалување на побарувачката за патувања и можност за масовно приземјување на авиони, јавува „Фена“.

Дополнително, хаосот во воздушниот простор на Блискиот Исток создава нови проблеми за авиокомпаниите. Според службата за следење летови „Flightradar24“, авиони што во вторникот наутро пристигнувале во Дубаи накратко кружеле во воздух поради можен ракетен напад, објавено е на мрежата „X“. Летовите подоцна сепак успешно слетале.

Од „Qantas“ соопштија дека, покрај зголемувањето на цените на меѓународните летови, разгледуваат и можност за пренасочување на дел од капацитетите кон Европа, додека авиокомпаниите и патниците се обидуваат да ги избегнат нарушувањата на Блискиот Исток, каде нападите со дронови и ракети значително го ограничуваат воздушниот сообраќај.

Со бројни панели, пленарни дискусии и деловни средби, изминатата недела на Копаоник заврши 33. издание на Копаоник бизнис форумот, еден од најзначајните економски настани во регионот. Во текот на четиридневната програма беа одржани 35 панели, три пленарни сесии и шест специјални настани, на кои учествуваа повеќе од 200 панелисти и над 1.500 претставници од бизнис-заедницата, академскиот сектор, државните институции и меѓународните организации.

Претседателот на Сојузот на економисти на Србија, Александар Влаховиќ, оцени дека форумот повторно ја потврдил својата улога како важна платформа за отворање на клучни економски и општествени прашања кои подоцна стануваат дел од поширокиот јавен дискурс.

Тој посочи дека форумот претставува значаен мрежен центар каде се среќаваат носителите на економскиот и општествениот живот, при што во текот на настанот биле одржани и бројни деловнисостаноци. Според него, претставниците на Владата на Србија, вклучително и премиерот, вицепремиерот и министерот за финансии, како и гувернерот на Народната банка, имале можност да ги презентираат резултатите од фискалната и монетарната политика и плановите за наредниот период, што овозможило и отворен дијалог со бизнис-заедницата и академскиот сектор.

На форумот беа отворени повеќе теми од значење за економскиот развој, меѓу кои декарбонизацијата и идната примена на CBAM таксата, која ќе стане реалност од 1 јануари. Се разговараше и за концептот на „економија на дестинацијата“, како и за потенцијалот за развој на конгресниот туризам во Србија, особено во контекст на новите инфраструктурни проекти поврзани со Сава центарот и подготовките за EXPO 2027. Традиционално, дел од дискусиите беа посветени и на образованието и младите.

Централната тема на годинашниот форум беше „Индустриската политика во функција на долгорочниот и одржлив развој на Србија“. Во рамки на оваа тема, учесниците дискутираа за потребата од нов модел на економски раст, кој ќе се темели на повисока продуктивност, технолошки развој и иновации.

Според Влаховиќ, досегашниот модел на раст, кој во голема мера се базираше на евтина работна сила, странски директни инвестиции и државни капитални вложувања, придонел за значително намалување на невработеноста, од околу 25 проценти во 2012 година на помалку од 9 проценти денес. Сепак, тој нагласи дека глобалните економски услови се променети, особено по геополитичките и економските кризи во последните години, што бара нов пристап во економската политика.

Во таа насока, според него, државата треба преку индустриската политика да ги насочува идните инвестиции кон сектори со повисока технолошка вредност, со фокус на продуктивноста, конкурентноста и извозот. Дополнително, беше истакната и потребата од поголеми домашни приватни инвестиции, кои моментално изнесуваат околу 2 проценти од бруто-домашниот производ, а би требало да достигнат најмалку 9 проценти за да се обезбеди поодржлив економски модел.

Меѓу темите што се провлекуваа низ повеќе панели беше и примената на вештачката интелигенција во деловната трансформација, како и значењето на дигиталната инфраструктура и образованието како клучни двигатели на идниот економски развој.

Секогаш е задоволство да се прославуваат успесите, особено кога тоа се прави на искрен начин, кој јавноста го препознава. Но, за секој успех е потребен труд, многу работа и квалитетен и посветен тим кој е подготвен да ги реализира дури и најамбициозните замисли. Токму таков е тимот на Публицис Груп, кој ја освои наградата за Најдобар корпоративен настан на овогодинешниот BEAM Festival, за организирање на прославата за 40-от роденден на НЛБ Банка Скопје.

Одделот за организација на настани на Публицис Груп, заедно со креативниот тим на Saatchi & Saatchi и во соработка со тимот на НЛБ Банка Скопје организираа спектакуларен гала концерт со нашиот најголем виртуоз на пијано, маестро Симон Трпчевски, кој настапи во придружба на квинтетот Македонисимо и Камерниот ансамбл – солисти од Факултетот за музичка уметност во Скопје, како и поп-дивата Каролина Гочева.

„Со огромна чест и задоволство ја примаме оваа награда и притоа сакаме да се заблагодариме на НЛБ Банка Скопје за укажаната доверба да организираме еден вака важен настан, кој одбележува јубилеј со кој малку компании во земјава можат да се пофалат. Честитки до целата екипа која беше вклучена во процесот и која помогна да го направиме невозможното – возможно“, изјавија од Публицис Груп.

Настанот кој се одржа на 26 ноември 2025 година во Националната опера и балет на едно место ги собра претставниците на институциите, партнерите и соработниците, клиентите, важните и истакнати поединци на Банката, како и вработените, кои ја имаа можност да уживаат во спектакуларна прослава која уште долго ќе се памети.

Претходно истиот ден беше организирана и конференцијата „NLBNext“ на тема „Иднината на банкарството“ која понуди интересни панел дискусии и го задржа вниманието на присутните. Беше креирана и интензивна ПР комуникација која неколку дена ги исполни економските рубрики на најрелевантните медиуми во земјава.

„Нашата прослава инспирирана од јубилејниот слоган Што ако можеш сѐ? и четирите децении посветеност, иновации и раст е доказ дека кога ќе се спојат луѓето, визијата и храброста, само небото е граница. Море од идеи, неколку креативни концепти и стотици часови тимска работа за да се создаде искуство што се памети.

Јубилејот на Банката беше повеќе од само настан. Тој беше живописно патување низ историјата, сегашноста и иднината, прослава посветена на извонредност и партнерства“, изјавија од НЛБ Банка.

Наградата од BEAM Festival уште еднаш ги потврдува високите стандарди кон кои се придржува Публицис Груп, особено кога е во прашање реализацијата на идеите на своите клиенти. Но, исто така претставува мотивација за енергичниот и креативен тим на Агенцијата да продолжи да ги тестира своите можности и да ја поместува границата на она што го дефинираме како успех.

ПР објава