Во Народната банка се одржа традиционалната свеченост по повод доделувањето на наградите од Конкурсот за ликовна и литературна творба за основните и средните училишта, којшто Народната банка го организира во соработка со Министерството за финансии по повод Светскиот ден на штедењето. На настанот се обрати гувернерот на Народната банка, д-р Трајко Славески и заменик-министерот за финансии, Николче Јанкуловски.

Гувернерот Славески, во своето обраќање, ги истакна посветеноста, знаењето и креативноста на младите генерации, нагласувајќи дека пристигнатите трудови ја потврдуваат значајната улога на финансиската едукација во градењето свесни, одговорни и финансиски писмени млади луѓе. „Штедењето не е само собирање средства. Тоа е филозофија на животот којашто ни овозможува да ги исполнуваме нашите желби, да обезбедиме сигурност за нашата иднина, но и да ги градиме стабилноста и благосостојбата на целото општество. Денес, овој пристап добива уште поголема важност, бидејќи живееме во време на брзи промени, дигитализација и нови финансиски предизвици и можности“, истакна гувернерот.

Заменик-министерот Јанкуловски поздравувајќи ги учесниците рече дека младите покажуват дека секое мало штедење може да биде почеток на голема цел. „Вие сте пример дека знаењето, вложениот труд и желбата да се мисли за иднината се вредности кои го движат општеството напред. Овој ден нека биде поттик да продолжиме сите заедно – ученици, наставници, родители и институции – да ја негуваме финансиската писменост, да развиваме здрави навики и да создаваме генерации кои ќе знаат да донесуваат мудри одлуки“, посочи Јанкуловски. 

Оваа година на Конкурсот пристигнаа неколку стотици трудови од ученици од основното и средното образование на теми посветени на важноста на штедењето, финансиската писменост и улогата на финансиските услуги во современата дигитална ера. Основците твореа на темата „Да штедиме за нашите желби, да штедиме за нашата иднина“, а средношколците на темата „Штедењето, парите и финансиските услуги во современата дигитална ера“.

Конкурсот, којшто се објавува од 2012 година, прерасна во значајна платформа за поттикнување на младите да размислуваат за финансиските концепти, штедењето и одговорното управување со средствата. Низ литературните творби, ликовните цртежи и есеите, учениците ги претставија своите погледи, знаења и лични цели.

Народната банка и понатаму активно ќе вложува во зајакнувањето на финансиската писменост, преку предавања, работилници, конкурси и натпревари, особено кај младите генерации. Секоја година илјадници ученици и студенти имаат можност да присуствуваат на едукативни активности во Народната банка, а ова ќе продолжи и во иднина.

Народната банка и Министерството за финансии им упатуваат благодарност на сите ученици кои учествуваа на Конкурсот, на менторите за нивната поддршка и на родителите за значајната улога во образовниот процес.

Гувернерот на Народната банка, д-р Трајко Славески, оствари работна посета на Банката на Англија во Лондон, заради засилување на билатералната соработка и за размена на експертски искуства со една од најстарите и најзначајни централни банки во светот.

Во текот на посетата, гувернерот Славески оствари повеќе работни средби со високи претставници на Банката на Англија, меѓу кои и со гувернерот Ендрју Бејли.

Особено значаен дел од агендата беа активностите поврзани со управувањето со златните резерви. Во тој контекст, беше организирана посета на трезорот на Банката на Англија, каде што Народната банка ги чува резервите во монетарно злато, заради подобро запознавање и увид во оперативните процедури за чување и ракување со монетарното злато, сигурносната заштита и во можностите коишто Банката на Англија ги нуди за пристап до пазарот за злато во Лондон, како најголем светски пазар преку шалтер на овој благороден метал.

Гувернерот одржа и работни средби со главниот економист на Банката на Англија, Хју Пил, и со заменик-гувернерката Сара Бриден. На средбите се разговараше за актуелните предизвици во спроведувањето на монетарната политика и за технолошките иновации во секторот на финансии.

Посетата беше во организација на Центарот за студии од областа на централното банкарство (CCBS) при Банката на Англија.

НЛБ Банка го одбележа својот 40-годишен јубилеј со спектакуларен гала концерт. Настанот, одржан во присуство на претставници на институциите, партнери, соработници, клиенти, колеги и истакнати поединци, заслужни за незапирливиот раст на Банката беше незаборавна прослава посветена на четирите децении извонредност и партнерства.

На коцертот настапи најголемиот македонски музички амбасадор, пијано-маестро Симон Трпчески, во придружба на квинтетот Македонисимо и Камерниот ансамбл – солисти од Факултетот за музичка уметност во Скопјe, кој заедно со својот тим, специјално за оваа прилика креираше и премиерно изведе музичка програма – дела кои ја воодушевија публиката во преполната сала на Националната опера и балет. Секое дело беше избрано за да го одрази моментот на прослава и иновативност, отелотворувајќи го истиот напреден дух и вредности кои ја дефинираат НЛБ Банка.

Под диригентската палка на Сашо Татарчев, присутните имаа можност да уживаат во фрагменти од концертот за пијано (Император) од Л.В. Бетовен, Унгарската рапсодија на Лист и музичка палета на повеќе-децениски поп хитови од земјава и регионот,во изведба на еден од најдобрите македонски женски вокали, Каролина Гочева.

Вечерта ја отвори претседателот на Управниот одбор на НЛБ Банка Скопје, Тони Стојановски, кој осврнувајќи се на скромните почетоци во далечната 1985 година и растот на Банката низ годините, упати искрена благодарност до сите оние кои дале значен придонес во трансформацијата на малата финансиска институција во системски значајна банка и еден од столбовите на македонскиот финансиски систем. Стојановски упати посебна благодарност до клиентите за нивната доверба и лојалност кон Банката.

„Вие секогаш сте биле и ќе останете наша инспирација да иновираме и да развиваме финансиски решенија кои ги задоволуваат вашите еволуирачки потреби, го поттикнуваат вашиот раст и ви помагаат да постигнете траен успех.“- рече Стојановски.

Со оптимизам и амбиција за идината, првиот човек на НЛБ Банка Скопје потенцираше: „Нашата визија е јасна – да бидеме прв избор за клиентите, да испорачаме врвно корисничко искуство и вредност за нашите акционери. Посветени сме да го предводиме патот на дигиталната трансформација, правејќи го банкарството подостапно, брзо, лесно и безбедно.Затоа, продолжуваме да инвестираме во нашите луѓе, во новите технологии, но и во заедницата во која живееме и работиме – едноставно, како и досега, продолжуваме да бидеме  катализатор за севкупен напредок и просперитет на нашата земја.“

На настанот свои обраќања имаа и претседателот на Управниот одбор на НЛБ д.д Љубљана, Блаж Бродњак и претседателката на Надзорниот одбор на НЛБ Банка Скопје, Хедвика Усеник кои упатија искрени честитки за јубилејот и срдечна благодарност до сите кои се дел од успешната приказна на НЛБ Банка. Тие изразија длабоко уверување дека, преку континуирана посветеност, соработка и споделени вредности, НЛБ Банка Скопјеќе постигне уште поголеми успеси во наредните години, зајакнувајќи ја својата улога како доверлив партнер и лидер во финансискиот сектор во земјата, и ќе продолжи да биде важен столб во рамките на брзо-растечката НЛБ Групација.

НЛБ Банка е трета по големина банкарска институција во земјата, длабоко интегрирана во локалната економија и активен учесник во поддршката на реалниот и граѓанскиот сектор. Денес, со актива од 2.3 милијарди евра и кредитно портфолио од 1.5 милијарди евра,  НЛБ Банка е една водечките банки во македонскиот банкарски сектор, која  поставува стандарди во дигиталното банкарство, корпоративното управување и одржливото финансирање.

Галерија: