Шпаркасе Банка АД Скопје и Кошаркарската федерација на Македонија (КФСМ) официјално потпишаа договор за соработка, со кој Шпаркасе Банка АД Скопје станува генерален спонзор на Првата женска кошаркарска лига.

Од новата натпреварувачка сезона, лигата ќе го носи името „Sparkasse Life Прва лига жени“, што претставува стратешки и значаен чекор кон поддршка и афирмација на женската кошарка во државата.

Женската кошарка во Македонија долги години се соочува со низа предизвици како недостиг на финансиска поддршка и низок интерес од јавноста. и недоволна институционална поддршка. Последниот позначаен успех беше забележан во 2012 година, кога женската репрезентација го освои второто место на Европското првенство за мали земји. Ова спонзорство доаѓа во момент кога потребата од инвестиции во женскиот спорт за негов раст и развој е поизразена од кога било.

Преку ова партнерство, Шпаркасе Банка АД Скопје ја потврдува својата долгорочна заложба за унапредување на еднаквоста и инклузивноста во општеството, а воедно ја презема улогата на двигател на позитивна промена. Спонзорството е дел од платформата за општествена одговорност Sparkasse Life, чија цел е поддршка на општествено одговорни, инклузивни и инспиративни општествени вредности кои инспирираат, охрабруваат и создаваат трајно позитивно влијание во заедницата.

„Драго ни е што денес стоиме зад еден исклучително значаен чекор за македонскиот спорт. Партнерството со КФСМ е потврда на нашата долгорочна заложба за еднаквост и инклузивност, вредности што се длабоко вградени во корпоративната култура на Шпаркасе Банка. Преку платформата Sparkasse Life, вложуваме во разни области во заедницата и подаваме рака и нудиме долгорочна поддршка. Преку ова спонзорство, сакаме да дадеме ветер в грб на иднината на женскиот спорт и сакаме да пратиме јасна порака: До вас стои партнер што верува, поддржува и создава услови за успех“ – изјави Александар Џорџевиќ, член на Управниот одбор на Шпаркасе Банка.

Името „Sparkasse Life Прва лига жени“ ќе биде новиот симбол на вербата во спортскиот потенцијал на македонските девојки и млади жени, на секој тим и на секоја спортска сала низ државата.

„Нашата визија отсекогаш била создавање рамноправни услови за развој на сите категории и овој договор е голем чекор во таа насока. Соработката со Шпаркасе Банка претставува историски момент за женскиот спорт во нашата земја, а поддршката што ја добиваме преку платформата Sparkasse Life е стратегиска, суштинска и долгорочна бидејќи сите средства ќе се искористат за развој на женската кошарка. Со новото име „Sparkasse Life Прва лига жени“, женската кошарка добива нов идентитет, нова енергија и заслужено внимание. Заедно, праќаме јасна порака дека веруваме во потенцијалот на жените во спортот и дека сме тука да го поддржиме нивниот пат до врвот“ – изјави Младен Ѓуроски, потпретседател на КФСМ.

Стратешко партнерство за долгорочен раст

Шпаркасе Банка АД Скопје, членка на Групацијата Штаермеркише Шпаркасе со повеќе од 200 години традиција, преку платформата за општествена одговорност Sparkasse Life активно поддржува проекти и иницијативи кои придонесуваат за развој на заедницата, унапредување на младите, спортот, културата, образованието и еднаквите можности. Со овој потег, Банката уште еднаш ја потврдува својата посветеност на создавање трајни вредности во заедницата и стимулирање на позитивни општествени промени преку финансиска поддршка, партнерства и ангажман.