На почетокот на тековната 2024 година, се обраќаме до банките во Република Северна Македонија со цел објавување на очекувањата на водечките банкари во нашата земја од аспект на предизвиците со кои ќе се соочат Банките во периодот што следи.

За таа цел во целост ги пренесуваме ставовите и очекувањата на Управниот одбор на Стопанска банка АД – Скопје кој го сочинуваат: Диомидис Николетопулос, Тони Стојановски, Милица Чапаровска – Јовановска и Бојан Стојановски.

Банкарство: Кратка ретроспектива на изминатата 2023 година. Кои настани ја одбележаа годината, дали истата беше успешна за Вас и кои поуки ги извлековте?

Стопанска банка АД – Скопје: За целиот свет и за сите нас, 2023 година меѓу другото беше уште една година на значајни предизвици: геополитички ризици, висока инфлација, зголемени каматни стапки, забавување на економскиот раст итн. Неколку години по ред, повеќе кризи кои се надоврзаа една по друга, па бевме соочени со предизивкот за брзо прилагодување во многу комплексно и променливо макроекономско опкружување. Но, и покрај сето ова, Стопанска банка, како и сите претходни години, испорача значајни перформанси, постигнувајќи рекордна профитабилност.

Забележуваме раст на кредитирањето од 7.1% а во паралела и раст на депозитите од 6.4% притоа одржувајќи висока стабилност на портфолио
Покрај импресивната финансиската метрика, во годината што измина успешно реализиравме значајни проекти кои придонесоа за севкупните резултати и ја зголемија ефикасноста на нашето работење, но реализиравме и проекти од големо значење за пошироката заедница со кои само го потврдуваме високиот имиџот на Банката.
Нашите резултати произлегуваат од веќе докажаните стратегија и бизнис модел на Банката (динамичко присуство во сите сегменти на работење, организационата поставеност со клиентите во центарот на вниманието, прудентно управување со ризиците и трошоците и тн). Затоа, продолжуваме да капитализираме на фактот дека тимскиот дух и високата професионалност помагаат во надминување на сите предизвици и се солидна основа за континуирани остварувања.

Банкарство:  Краток коментар околу очекувањата за движењето на каматните стапки на кредитните/депозитните производи во 2024 година.

Стопанска банка АД – Скопје: Согласно сите очекувања, 2024 година треба да биде година во која ќе видиме стабилизирање на инфлаторните притисоци на глобално ниво и во нашата економија. Тоа ќе ја намали или целосно ќе ја отстрани потребата на централните банки да продолжат со затегнувањето на монетарната политика и зголемувањето на референтните каматни стапки. Врз основа на тоа треба да се очекува да запре растот и на пазарните каматни стапки, иако сè уште присутните ризици и неизвесности, како глобално така и на локално ниво, наметнуваат претпазливост во однос на предвидувањата за нивно надолно придвижување. Секако, до одредено ниво, без да се имаат предвид останати фактори, сето ова треба да има позитивно влијание на интересот за нови инвестиции и по тој основ зголемена побарувачка за кредити од бизнис секторот споредено со многу ниското ниво на побарувачка со кое се соочивме во текот на 2023 година.

Банкарство: Колку домашните банки се дигитализирани и дали заостануваат во овој процес во однос на банките од Регионот/Европа? Кои ќе бидат нови трендови во банкарскиот сектор во 2024 година во Македонија?

Стопанска банка АД – Скопје: Понудата на банкарските производи и услуги ги следи движењата на пазарот и неговите реални потреби. Може да се каже дека банкарскиот сектор е еден од подинамичните на пазарот, со постојани новитети и подобрувања. Генерално, тоа што се очекува од банките во нивната севкупна понуда е пред се: сигурност, доверливост и стабилност. Ова значи дека процесот на воведување на нови решенија е значително подолг и покомплексен за нас и секако мора да биде соодветен на нивото на развој на сите комплементарни сегменти.

Стремежот на земјата кон ЕУ значи дека во паралела (ќе) се одвиваат многу од процесите кај нас и ќе гледаме забрзани движења во сите сектори, не само банкарскиот. Како членка на НБГ групацијата, во изминативе неколку години бевме сведоци на успешното заокружување на планираниот процес на трансформација и дигитализација на НБГ Грција, која, денес, во тој дел е една од водечките во ЕУ.

Банкарство: Наведете еден новитет што Стопанска Банка АД – Скопје ќе го имплементира во 2024 година и што очекувате од имплементација на истиот?

Стопанска банка АД – Скопје: 2024 е година во која Стопанска банка прославува 80 години од основањето па годината ќе биде исполнета со бројни новитети и изненадувања на задоволство на нашите клиенти и соработници, но и за пошироката заедница.

Она што можеме да го кажеме е дека интензивно работиме на интерните процеси за да понудиме на пазарот уште побрза, полесна и секако посовремена финансиска понуда а нашите филијали се повеќе ги ориентираме кон советодавната услуга во изнаоѓање на решенија соодветни на потребите на клиентите. Веќе интензивно се гради и нашата нова управна зграда, работиме и на нови дигитални решенија за правните и физичките лица, фокусирани сме на наградување на нашите лојални клиенти и секако вложуваме во развојот на нашите вработени, унапредување на работните услови и на тимскиот дух. Продолжуваме да ги надградуваме и проектите кои во фокусот ја имаат животната средина, инклузијата и создавањето на подобар свет за сите.