Шеста година по ред на Македонска берза успешно се одржа „Инвеститорски ден“ на којшто сите домашни физички лица имаа можност да тргуваат со акции на сите пазарни сегменти без да ги платат провизиите кон Берзата, Централниот депозитар на хартии од вредност и овластените пазарни учесници (банки и брокерски куќи), во износ на остварен промет до 10.000 евра.

На денешниот „Инвеститорски ден“ на Берзата се склучија вкупно 396 нормални трансакции што претставува инвеститорски ден со најголем број склучени трансакции од воведување на оваа иницијатива. Воедно, на овој ден се склучија и најголем број на трансакции на дневно ниво во 2025 година. Дополнително, денес во БЕСТ системот на Берзата се внесени вкупно 547 налози за тргување, што претставува најголем број на внесени налози во берзанскиот систем за тргување во текот на оваа година.

Вкупниот промет од тргување во БЕСТ системот со акции денес надмина 917 илјади евра, односно изнесува околу 56 милиони денари.  

Иницијативата „Инвеститорскиот ден“ ја прифатија и во неа активно се вклучија сите единаесет членки на Берзата (Еурохаус, Илирика Инвестментс, Иново Брокер, Инвестброкер, Комерцијална банка, НЛБ Банка, Стопанска банка Скопје, ТТК Банка, Фершпед брокер, Шпаркасе Банка Скопје и Халк Банка Скопје) и Централниот депозитар за хартии од вредност, а истата доби поддршка и од Комисијата за хартии од вредност.

Македонска берза ја најавува 24-та Годишна конференција, што ќе се одржи од 25 до 27 септември 2025 година во хотел Метропол – Охрид.

Годишната конференција на Берзата претставува еден од најзначајните финансиски настани во земјава, кој веќе повеќе од две децении обединува клучни фигури од банкарскиот и финансискиот сектор. На настанот традиционално учествуваат претставници на банки, инвестициски и пензиски фондови, брокерски друштва, регулатори, академици и медиуми, како и бројни странски експерти и говорници од пазарите на капитал во регионот на Југоисточна Европа.

Препознатлива по својата актуелност и квалитетот на панелите, презентациите и дискусиите, конференцијата секоја година отвора теми од клучно значење за развојот на финансискиот систем и економијата во целина.

Овогодинешната агенда носи неколку значајни фокуси, меѓу кои:

– Македонските и регионалните економски перспективи

– Можностите и предизвиците за иницијални јавни понуди (IPO) и раст на домашните компании

– Развој на пазарот на капитал преку мултифондови и ЕТФ-ови

– Важноста и улогата на малите берзи

– Влијанието на ажурираните стандарди за финансиско известување

– Трендовите во дигиталната трансформација на компаниите

Деталната агенда за конференцијата е достапна на следниот линк 👉 24-та годишна конференција на Македонска берза.

Со цел поттикнување на домашните индивидуални инвеститори и развој на инвестициската култура во земјата, Македонска берза на 12 септември 2025 година (петок) ќе го организира настанот „Инвеститорски ден“ – по шести пат во своето работење.

Иницијативата има за цел да го зголеми учеството на населението во тргувањето со акции на домашните компании што котираат на Берзата, како и да придонесе за подобро познавање на хартии од вредност кај граѓаните. Настанот е поддржан од Централниот депозитар за хартии од вредност (ЦДХВ), сите единаесет членки на Берзата и од Комисијата за хартии од вредност.

Бесплатно тргување за физички лица

На „Инвеститорскиот ден“ сите домашни физички лица ќе можат да купуваат и продаваат акции на сите пазарни сегменти без да платат провизии кон Берзата, ЦДХВ или овластените пазарни учесници (банки и брокерски куќи).

За да се искористи оваа можност, потребно е:

– трансакциите да се реализираат преку БЕСТ системот, со посредство на една од членките на Берзата;

– вкупниот дневен промет по инвеститор да не надмине 10.000 евра;

– купопродажбите да се извршат преку клиентска или сопственичка сметка.

Исклучок од поволностите се системските и администраторски блок-трансакции, јавните понуди и берзанските аукции, за кои важат редовните трошоци.

Поддршка од сите членки

Во иницијативата активно се вклучени сите единаесет членки на Македонската берза, кои ќе им овозможат на инвеститорите полесен и поевтин пристап до домашниот пазар на хартии од вредност.