Connect with us

Банки

Добивката на ТТК Банка порасна за 2,9% и дојде до 1,76 милиони евра во 2024 година

Објавено

пред 8 месеци

на

Во периодот од 1 јануари до 31 декември 2024 година, ТТК Банка АД Скопје ја реализираше својата стратегија, работејќи во согласност со клучните цели и задачи утврдени во Деловната политика и во Финансискиот план за 2024 година.

Во текот на 2024 година, ТТК Банка АД Скопје успешно ги усогласи своите стратешки цели со променливите макроекономски услови, што доведе до зголемување на профитабилноста и обезбеди стабилна и континуирана вредност за сите засегнати страни – клиентите, вработените и акционерите.

Заклучно со 31 декември 2024 година, Банката забележа позитивен финансиски резултат од 108,3 милиони денари, што претставува пораст од 2,9% во споредба со истиот период минатата година. Овој успех е резултат на зголемените оперативни приходи од 3,6%, при што истовремено беа контролиран и расходите, кои пораснаа за 8,0%. Дополнително, исправките на вредноста на финансиските средства на нетооснова достигнаа 37,4 милиони денари, што ја потврдува финансиската стабилност на Банката и нејзината подготвеност да се справи со динамичните пазарни услови.

Финансиски остварувања на ТТК Банка

Во 2024 година, билансната сума на Банката достигна ниво од 11.015 милиони денари, што претставува значителен раст од 9,1% во споредба со претходната година. Планот е остварен со 105,5%.

Заклучно со 31.12.2024 година, евидентиран е пораст на кредитите и побарувања од други комитенти за 9,9% во однос на 31.12.2023 година. Порастот во најголем дел произлегува од зголемувањето на кредитирањето на физички лица за 13,1%, преку зголемени пласмани на потрошувачки и на станбените кредити. Планот за овој период е исполнет со 104,0%.

Депозитите на други комитенти изнесуваат 9.466 милиони денари и бележат пораст во однос на минатата година од 11,4%, што се должи на зголемувањето на депозитите по видување и на орочените депозити кај физичките лица за 13,8% и на зголемувањето на орочени депозити на финансиски друштва за 90,5%. Во однос на планот се остварени со 107,1%.

Нето-приходите од камати претставуваат основна компонента во формирањето на вкупните приходи од работењето на Банката. Остварените нето-приходи од камати во периодот од 1.1.2024 до 31.12.2024 година изнесуваат 344,9 милиони денари и во однос на планот се остварени со 101,4%. Во однос на истиот период минатата година, зголемени се за 37,4 мил. денари или 12,2%. Порастот, во најголем дел, се должи на зголемените каматни приходи од секторот Банки и Финансиски институции, како резултат на повисоките каматни стапки поставени од монетарната политика на Централната банка при остварен раст и на приходите од камати од секторите стопанство и домаќинства.

Нето-приходите од провизии и надоместоци за услуги во тековниот период изнесуваат 166,9 милиони денари. Најголемо учество во генерирањето на приходите од провизии имаат провизиите од домашниот платен промет, како и провизиите од картично работење. Приходите од провизија бележат годишен раст од 2,5%. Нето-приходите од провизии и надоместоци за услуги во однос на планот за овој период се остварени со 84,8%.

Нето-приходите од курсни разлики изнесуваат 15,7 милиони денари и бележат годишен раст од 1,1% како резултат на зголемениот обем на тргувања на девизниот и на менувачкиот пазар. Во однос на планот се остварени со 96,8%.

Останатите приходи од работењето на Банката изнесуваат 26,1 милиони денари и се пониски за 53,9% во однос на минатата година, како резултат, во најголем дел, од понискиот износ на приходи од капитална добивка од продажба на преземени средства во тековната година. Во однос на планот се остварени со 48,5%.

Вкупните оперативни трошоци во анализираниот период изнесуваат 417,6 милиони денари и се за 8,0% повисоки во однос на истиот период минатата година, како резултат на зголемените трошоци за плати и вработени, што ја одразува стратегијата на Банката за континуирано инвестирање во човечките ресурси и задржување на квалификуваниот персонал, како и на повисоките трошоци за амортизација, кои се резултат на инвестиции во инфраструктурата и технологијата. Во однос на планот се остварени со 99,6%.

Во споменатиов период, исправката на вредноста на финансиските средства и на посебната резерва за вонбилансна изложеност на нето-основа изнесува 37,4 милиони денари и таа соодветствува со обемот, структурата и квалитетот на пласманите на Банката. Во споредба со истиот период од претходната година, овој износ е на пониско ниво за 10 милиони денари, што претставува намалување од 21,3%, што е резултат на засилените активности на Банката во наплатата на кредитните пласмани.

Во текот на 2024 година прокнижена е загуба заради оштетување на нефинансиските средства во износ од 1,1 милиони денари.

Очекувања за претстојниот период

Најновите услови во економијата овозможуваат да се продолжи со претпазливо нормализирање на поставеноста на монетарната политика. Оттука, централните банки почнаа да ги олабавуваат затегнатите монетарни политики, што сигнализира дека каматните стапки ќе продолжат постепено да се намалуваат и во претстојниот период. И натаму треба да се следат ризиците поврзани со надворешното окружување, пред сè, цените на примарните производи, коишто сè уште се под влијание на нестабилниот геополитички контекст и климатските промени, а треба да се внимава и на ризиците од домашните фактори коишто можат да влијаат врз побарувачката и цените во следниот период.

Сегашната клима сугерира дека и во следниот период Банката и понатаму внимателно ќе ги анализира тековните макроекономски параметри, ќе ги следи мерките, активностите и предвидувањата на економските авторитети и на носителите на економските политики и на операторите, ќе ги усогласува интерните индикатори и ќе го приспособува нејзиното работење на пазарните услови, со фокус кон одржување на ликвидноста и на долгорочната стабилност.

Банката ќе продолжи да дејствува проактивно, фокусирајќи се кон стабилно и профитабилно оперативно работење врз основа на реални и на предвидливи очекувања. Кредитната активност се очекува да продолжи да се реализира преку работата со населението и со малите и средни претпријатија, паралелно со севкупното зајакнување на економската активност и на зголемената побарувачка за кредити. Притоа, Банката ќе ги презема сите неопходни активности за одржување на квалитетот на портфолиото, конкурентноста и развојот на понудата на производи и услуги, како и изнаоѓање флексибилни решенија приспособени на потребите на клиентите.

Креирањето одржливи и ефикасни процеси, посветеноста кон зголемување на квалитетот и ефикасноста во клиентската услуга и зголеменото клиентско задоволство, реализацијата на планираниот обем на активности предвидени со деловната политика, понудата на зелени кредитни производи приспособени на потребите на клиентите, натамошниот развој на дигитализација на процесите, надградбата на производите и услугите достапни преку дигиталните канали како и потпирањето на сопствените извори на финансирање и понатаму ќе претставуваат основа на деловната стратегија на Банката за 2025 година, при што и натаму депозитите од секторот население остануваат со доминантно учество во вкупните извори на средства.

Слични Теми:

Банки

ПроКредит Банка и ЕБОР со нова програма за поддршка на локалните бизниси вредна 20 милиони евра

Објавено

пред 16 часа

на

ПроКредит Банка потпиша договор со ЕБОР – European Bank for Reconstruction and Development (EBRD) во износ од 20 милиони евра за Програмата за споделување на ризикот.

ПроКредит Банка е една од првите банки во земјата која се вклучи на оваа програма, која ќе овозможи полесен пристап до финансирање на поголеми проекти за локалните бизниси, придонесувајќи кон зајакнување и раст на локалните компании.

Со овој финансиски инструмент ПроКредит Банка ќе го сподели ризикот со ЕБОР на определени изложувања кон клиентите, каде ЕБОР ќе даде гаранции до 50 отсто од определеното портфолио.

Дополнително овие проекти добиваат техничка поддршка за нивна успешна реализација од широк тим на консултанти ангажирани од ЕБОР.

Продолжи со читање

Банки

Одржана редовна седница на Извршниот одбор за монетарната политика − каматните стапки остануваат исти, поддржани со макропрудентните мерки на Народната банка

Објавено

пред 16 часа

на

На 16 септември 2025 година се одржа редовна седница на Извршниот одбор за поставеноста на монетарната политика на Народната банка. На седницата беа разгледани најновите податоци и информации за светската и за домашната економија и најновите случувања на меѓународните и на домашните финансиски пазари во контекст на поставеноста на монетарната политика.

На седницата беше одлучено каматните стапки да останат исти, односно каматната стапка на благајничките записи да остане на нивото од 5,35%, а каматните стапки на депозитите преку ноќ и на седум дена се задржуваат на нивоата од 3,95% и 4%, соодветно. Понудата на благајничките записи на редовната аукција ќе биде исто така непроменета, односно ќе изнесува 10 милијарди денари. Со ваквата одлука се задржува внимателниот пристап при водењето на монетарната политика, во согласност со економските услови и ризиците коишто произлегуваат од домашното и надворешното окружување. Овој пристап на монетарната политика е поддржан и со неодамнешните промени кај задолжителната резерва, затегнувањето на  макропрудентните мерки во делот на критериумите на кредитната побарувачка, како и со зголемувањето на противцикличниот заштитен слој на капиталот за дополнителни 0,25 процентни поени[1]. Комбинацијата на овие мерки е насочена кон одржување на ценовната стабилност на среден рок и стабилноста на девизниот курс, како и кон заштита од можни идни системски ризици. Во однос на монетарната поставеност во еврозоната, ЕЦБ на септемврискиот состанок донесе одлука за задржување на каматните стапки на досегашното ниво.

Годишната стапка на инфлација во август забави и изнесуваше 4,4%, под влијание на базичната и прехранбената компонента, при натамошен пад на цените на енергентите. Сепак, остварената инфлација е над проектираното ниво, со што таа и понатаму останува во фокусот и потребна е внимателност. Најновите проекции за берзанските цени на примарните производи за наредниот период се ревидирани во надолна насока, што укажува на помали увозни ценовни притисоци во споредба со очекувањата. И покрај тоа, сѐ уште постои неизвесност околу идните движења на светските цени на примарните производи поради геополитичките тензии и климатските промени. Оттука, ризиците за идната динамика на инфлацијата и натаму постојат, а се поврзани и со натамошната неизвесност од променливото надворешно окружување, но и со домашните фактори што влијаат врз побарувачката.

Состојбата на девизниот пазар е стабилна, при што од почетокот на годината Народната банка интервенира со нето-откуп на девизи. На крајот на август, нивото на девизните резерви изнесува 4.754,4 милиони евра, што е соодветно за одржување на стабилноста на курсот на домашната валута. Во однос на последните расположливи податоци од надворешниот сектор, остварувањата на менувачкиот пазар заклучно со август упатуваат на нето-приливи од приватните трансфери коишто се малку повисоки од очекувањата за третиот квартал. Проценетиот трговски дефицит за третиот квартал од годината, во согласност со податоците за надворешнотрговската размена во јули, е малку повисок од очекувањата, иако периодот е сѐ уште краток за попрецизна оцена. Во вториот квартал од 2025 година, остварениот дефицит во тековната сметка на билансот на плаќања е повисок од очекувањата, при истовремени нето-приливи во финансиската сметка, коишто се минимално пониски од очекувањата според априлската проекција.

Во вториот квартал од 2025 година, растот на економската активност забрза и изнесува 3,4% на годишна основа. Ваквото остварување е малку повисоко во однос на оцената за вториот квартал во рамките на априлскиот циклус проекции. Економскиот раст целосно произлегува од позитивниот придонес на домашната побарувачка, во услови на раст на личната потрошувачка и бруто-инвестициите, додека нето-извозот бележи мал негативен придонес, во услови на забрзан раст и на извозот и на увозот. Светската неизвесност, особено поради трговските и геополитичките тензии, и натаму претставува најголемиот надворешен ризик за домашната економија. Во однос на домашното окружување, обемот и динамиката со коишто ќе се остваруваат домашните инфраструктурни проекти се едни од најважните фактори што ќе влијаат врз темпото на економскиот раст.

Остварувањата во монетарниот сектор покажуваат натамошна солидна кредитна поддршка на економијата, што е над очекувањата. Во јули, депозитите и кредитите бележат солидни стапки на раст, коишто се повисоки во однос на априлските проекции.

Општо земено, со последната одлука се задржува внимателниот пристап при водењето на монетарната политика, во согласност со најновите движења кај најважните макроекономски показатели и процените за ризиците. Надворешните ризици и понатаму се изразени, но внимателно се следат и домашните фактори коишто влијаат врз побарувачката. Народната банка и во иднина ќе биде подготвена да ги користи сите расположливи инструменти и да преземе соодветни мерки за одржување на стабилноста на девизниот курс на денарот во однос на еврото и за обезбедување на ценовната стабилност на среден рок.

Продолжи со читање

Банки

Средба Славески – Прескер: Потврда на значењето на Народната банка за економската стабилност

Објавено

пред 20 часа

на

Гувернерот на Народната банка, Трајко Славески, оствари средба со амбасадорот на Република Словенија, Неговата Екселенција Грегор Прескер и со економскиот советник Горан Криж.

Во разговорот беше истакната улогата на Народната банка во одржувањето на макроекономската стабилност и значењето на довербата во финансискиот систем за економскиот развој и инвестициите.

Гувернерот Славески ја истакна посветеноста на Народната банка кон овие принципи, додека амбасадорот Прескер ги нагласи долгогодишните добри дипломатски и економски врски помеѓу двете економии, особено во финансискиот сектор каде што активно се вклучени голем број реномирани словенечки компании.

Во однос на финансискиот сектор, гувернерот Славески се осврна на заложбите на Народната банка за намалување на надоместоците на банкарските услуги, заради обезбедување подостапни финансиски услуги за сите економски субјекти. Амбасадорот Прескер искажа задоволство од заложбите на Народната банка и ја потврди понатамошната поддршка од Словенија, вклучително и преку центарот за обуки ЦЕФ.  

Средбата претставува можност за продлабочување на билатералните односи меѓу двете земји и унапредување на соработката.

Продолжи со читање

Популарно

Copyright © 2023 bankarstvo.mk. All Rights Reserved. Developed by Digital Orange