Европската комисија се подготвува да побара делење на авионското гориво во рамки на Европската унија поради последиците од конфликтот на Блискиот Исток.

Еврокомесарот за енергетика, Дан Јоргенсен, изјави дека Брисел ќе продолжи да ја следи состојбата со залихите на гориво и рафинериските капацитети, ќе ја координира испораката и, доколку е потребно, ќе изврши прераспределба на горивото меѓу земјите членки – слично на механизмите користени за време на пандемијата при распределбата на вакцини.

„Се движиме од криза на високи цени кон криза на снабдување. Тоа најпрво ќе се почувствува кај авионското гориво и се приближуваме до тоа многу брзо“, изјави Јоргенсен за Financial Times.

Според него, мерките може да вклучат поделба, односно прераспределба на авионското гориво меѓу членките на ЕУ.

Првиот човек на Меѓународната агенција за енергија, Фатих Бирол, минатата недела изјави дека ЕУ располага со резерви на авионско гориво за околу шест недели. Причината е што значителен дел од керозинот се набавува токму од Блискиот Исток.

Авиокомпаниите Луфтханза и КЛМ веќе најавија намалување на бројот на летови како одговор на кризата во снабдувањето.

„Мора да бидеме искрени – ситуацијата може да стане сериозна. Доколку конфликтот продолжи, постои реална опасност од поскапи авиобилети и откажани летови во текот на летото“, оцени Јоргенсен.

Планот за прераспределба на горивото може да биде политички чувствителен и да потсети на предизвиците од периодот на пандемијата, но Јоргенсен изрази уверување дека земјите членки ќе покажат солидарност.

„Станува збор за криза што мора да ја решаваме заеднички. Целта е ниту една земја, регион или аеродром да не биде непропорционално погоден“, нагласи тој.

Во рамки на мерките, Брисел планира да воспостави и систем за следење на снабдувањето со гориво, со цел подобар увид во производството и трговските текови, како и да ги процени постојните рафинериски капацитети за нивно поефикасно искористување.

Дополнително, се разгледува и можноста за ослободување на стратешките резерви, како и воведување обврска за чување на авионско гориво како дел од тие резерви.

Во Скопје денеска се одржува македонско-казахстански бизнис форум, насочен кон унапредување на економската соработка меѓу двете држави, соопшти Стопанската комора на Северна Македонија.

Настанот се одржува во просториите на Комората со почеток во 11:30 часот.

Во рамки на форумот се предвидува потпишување на Договор за основање Бизнис совет меѓу Комората за меѓународна трговија на Казахстан и Стопанската комора на Северна Македонија, како и Меморандум за соработка меѓу Центарот за развој на трговска политика QazTrade и Агенцијата за странски инвестиции и промоција на извозот.

Казахстанската бизнис делегација ја предводи министерот за трговија и интеграции на Република Казахстан, Арман Шакалиев, кој е во работна посета на земјава.

„Алкалоид“ АД Скопје повторно ја доби довербата на јавноста и беше прогласен за најпосакуван работодавач за 2025 година четврти пат по ред, според анкетата на веб порталот „Вработување.ком“.

Наградата, која беше врачена во рамките на манифестацијата организирана од „Вработување.ком“, се базира на национално истражување за перцепцијата и за искуствата поврзани со работодавачите во земјава.

Континуитетот на ова признание за нас има особено значење. Тој зборува за доследноста во начинот на кој ја градиме нашата работна култура – отворена, стабилна и ориентирана спрема луѓето. Во „Алкалоид“ веруваме дека силната организација започнува со здрави вредности, јасни професионални стандарди, високи етички норми и со заемна доверба затоа што успехот на компанијата произлегува од нејзините вработени.

Луѓето се суштината на сè што правиме. Нивната експертиза, мотивираноста и одговорноста се темелот врз кој се развива нашата компанија, па затоа грижата за нивниот професионален и личен напредок останува еден од нашите клучни стратешки приоритети.

Гледајќи напред продолжуваме со јасна визија да создаваме можности, да поттикнуваме иновации и да обезбедуваме работна средина во која знаењето и талентот се препознаваат и се вреднуваат. Нашата цел е „Алкалоид“ и натаму да остане прв избор за младите луѓе кои ја гледаат својата иднина во одговорна и успешна компанија.

ПР објава