Институтот за меѓународни, стратегиски и безбедносни студии „Радика“ денес организира јавна трибина посветена на војната во Иран и нејзините влијанија врз регионалната безбедност и економските текови во Северна Македонија.

На настанот се очекува учество на експерти, претставници од дипломатскиот кор, академската заедница и граѓанскиот сектор, со цел да се отвори поширока дискусија за актуелните случувања на Блискиот Исток и нивните последици на глобално и регионално ниво.

Воведни излагања ќе имаат основачите на Институтот, поранешниот министер за финансии Кирил Миновски, универзитетските професори Далибор Јовановски и Жидас Даскаловски, безбедносниот аналитичар Раби Седрак, како и поранешниот вицепремиер за европски прашања Ивица Боцевски.

Во рамки на трибината ќе се разгледуваат повеќе клучни теми, меѓу кои развојот на геополитичката динамика по ескалацијата на конфликтот, влијанието врз глобалната стабилност и безбедносната архитектура, како и позицијата на Западен Балкан во новите околности. Дел од дискусијата ќе биде посветен и на економските ефекти, особено врз енергетските пазари, трговските рути и синџирите на снабдување, како и потенцијалните последици врз македонската економија.

Трибината има за цел да понуди поширок увид во предизвиците со кои се соочуваат малите држави во услови на брзо менувачки глобален поредок.

Во насока на унапредување на регулативата и заштита на интересите на осигурениците, претставници на Асоцијацијата на брокерски друштва одржаа втор работен состанок со Министерството за финансии. На состанокот, како активен чинител во креирањето на поквалитетен пазар, учествуваше Александар Атески, Член на Управниот одбор на Flex Broker.

Фокусот на разговорите беше ставен на потребата од обезбедување фер конкуренција и справување со појавата на нелиценцирани канали за продажба на осигурување. Асоцијацијата укажа на практиката каде одредени субјекти, вршат дистрибуција на осигурителни продукти без соодветна лиценца. Дополнително, беше отворено прашањето за заобиколување на законските рамки преку промоторски и маркетинг договори, кои во пракса функционираат како посредна продажба.

„Брокерските друштва се единствениот професионален и лиценциран канал кој работи исклучиво во интерес на клиентот. Нашата мисија е да обезбедиме максимална заштита за осигурениците, а тоа е можно само доколку сите учесници на пазарот функционираат под исти, строго дефинирани правила“, беше истакнато на состанокот.

Во рамки на дискусијата за финансиското работење, се разговараше за можностите за фактурирање и моделот на функционирање на брокерските друштва, со цел да се обезбеди поголема транспарентност и ефикасност.

Насоките за развој на македонскиот осигурителен пазар остануваат цврсто врзани за европските практики. Заклучокот од средбата е дека заедничката соработка со институциите е клучна за градење на доверба кај граѓаните и создавање пазар кој се темели на професионализам, знаење и транспарентност.

Flex Broker останува посветен на конструктивниот дијалог со институциите, верувајќи дека само преку професионализам и јасна регулатива може да се изгради современ и сигурен осигурителен пазар.

Министерството за финансии преку Академијата за јавни финансии започна со реализација на Годишната програма за обуки за 2026 година, која содржи вкупно 17 обуки на внимателно избрани теми, насочени кон зајакнување на институционалните капацитети и унапредување на управувањето со јавните финансии.

Првата обука, одржана на 13 март, беше посветена на Фискалната стратегија – документ кој ги содржи среднорочните насоки и цели на фискалната политика. Нејзиното разбирање од страна на вработените е клучно за нивното работење и за остварување на целите и приоритетите на институциите. Oбуката ја одржаа Тоше Пановски – раководител на одделение за буџет и буџетска политика, Александра Алтиевска Ангелиќ -раководител на одделение за буџети на фондови.

Учесниците ги поздрави министерката за финансии Гордана Димитриеска-Кочоска, која ја истакна важноста од континуирана едукација и професионално усовршување на административните капацитети.

„Заедничката соработка со другите институции е важен фактор за постигнување подобри резултати и изработка на соодветни анализи. Системот е успешен доколку и поединците кои работат во институциите се успешни и постигнуваат подобри резултати. Затоа промената што ќе ја постигнеме преку знаењето влијае на подобрување на целокупното функционирање. Преку Академијата и овие обуки правиме еден вид вмрежување и комуникација во насока на надградување на знаењето и градење на капацитетите на институциите. Вработените со знаење градат ефикасни институции“, изјави министерката за финансии Гордана Димитриеска-Кочоска.

На обуката присуствуваа претставници од различни институции од јавниот сектор, со цел унапредување и зајакнување на среднорочното буџетско планирање, со фокус на петгодишна перспектива, како и продлабочување на знаењата за современите пристапи во управувањето со јавните финансии.

Во рамки на обуката беа презентирани основните цели на новиот Закон за буџети, придобивките од новото законско решение, како и клучните новини од неговата примена. Дополнително, беше обработен концептот на среднорочно буџетско планирање и процесот на подготовка на Фискалната стратегија.

На 16 март 2026 година, во рамки на Годишната програма, беше реализирана и втора обука на тема „Управување со ризици“, наменета за вработени од јавниот сектор, вклучувајќи координатори за стратешки и оперативни ризици, раководители на организациони единици и внатрешни ревизори.

Целта на обуката беше учесниците детално да ги разберат методолошките аспекти на процесот на управување со ризици и да се оспособат за ефикасно спроведување на сите чекори од Методологијата за управување со ризици кај јавните субјекти.

Обуката ја спроведе д-р Мите Митевски, раководител на Секторот за централна хармонизација на системот на внатрешна финансиска контрола во јавниот сектор, искусен експерт, користејќи интерактивен пристап преку презентации, групни дискусии и студии на случај.

Учесниците се запознаа со новините во законската регулатива и меѓународните стандарди за внатрешна контрола, методологијата за управување со ризици и нејзината поврзаност со стратешкото планирање, како и со улогата на клучните актери и внатрешната ревизија во процесот. Посебен акцент беше ставен на практични примери и добра пракса, вклучително и управување со ризици од корупција.

Преку презентации, размена на искуства и интерактивна дискусија, учесниците имаа можност да ги продлабочат своите знаења и практични вештини, со што обуките значително придонесоа за зајакнување на институционалните капацитети и подобрување на процесите на фискално планирање и управување со ризици.

Министерството за финансии преку Академијата за јавни финансии останува посветено на континуирана едукација и развој на човечките ресурси во јавниот сектор, со цел унапредување на квалитетот на управувањето со јавните финансии и зголемување на ефикасноста на институциите.