Во соработка со BISTLAB | Balkan Economy and Finance Laboratory и International Balkan University, Шпаркасе Банка реализираше работилница за финансиска едукација насочена кон студентите, со цел подигнување на финансиската писменост во рамки на првата и единствена платформа за финансиска едукација на млади – VibeOn.

Презентацијата ја одржаа Петар Хаџиев, самостоен специјалист за лојалност и партнерства и Маја Илиоска Златков, самостоен соработник за маркетинг и комуникации, кои преку практични примери и интеракција со студентите споделија корисни информации за одговорно управување со личните финансии и ја истакнаа важноста на финансиската едукација.

Претставници на банката ја искористија можноста преку директна комуникација со студентите да ги презентираат можностите и придобивките од услугите на Банката, со посебен фокус на решенијата наменети за младите и корисниците на платформата VibeOn.

Оваа активност е дел од иницијативата на Банката за општествена одговорност Sparkasse Life, во чии рамки еден од клучните столбови е финансиската едукација на младите. На овој начин, преку различни иницијативи и едукативни активности, Шпаркасе банка продолжува со својот активен придонес кон создавање финансиски информирана и одговорна млада генерација.

„Благодарни сме за соработката со International Balkan University и BISTLAB, како и за интересот и активното учество на студентите. Веруваме дека ваквите иницијативи претставуваат важен чекор кон градење финансиски едуцирана и информирана млада генерација“, истакнуваат од Шпаркасе Банка.

АЛТА Банка АД Белград се стекна со дополнителни акции во АЛТА банка АД Битола, со што дополнително го зголеми своето учество во акционерскиот капитал на банката.

Согласно објавата доставена до Македонска берза, српската банка се стекнала со уште 84 обични акции, со што вкупниот број на акции во нејзина сопственост достигнува 372.028. Со ова, АЛТА Банка АД Белград сега поседува 95,15% од вкупниот број издадени обични акции на АЛТА банка АД Битола.

„Согласно член 38 став 2 од Правилата за котација на Македонска берза АД Скопје, известуваме дека акционерот АЛТА БАНКА АД БЕЛГРАД се стекна со дополнителни 84 обични акции и сега поседува вкупно 372.028 обични акции, односно 95,15% од вкупниот број на обични акции издадени од АЛТА банка АД Битола“, се наведува во соопштението објавено на Македонска берза.

Според берзанските податоци, просечната цена на акција на АЛТА банка АД Битола изнесува 3.777 денари. Последното тргување на официјалниот пазар е регистрирано на 6 март, додека во изминатите 52 недели се реализирани вкупно 75 трансакции. Во истиот период, цената на акцијата се движела во распон од 3.134 до 4.000 денари.

Зголемувањето на сопственоста следува по завршувањето на процесот на аквизиција на поранешната Стопанска банка АД Битола, кој беше финализиран во октомври минатата година. По таа трансакција, АЛТА Банка АД Белград, заедно со поврзаните субјекти, поседуваше 93,26% од акционерскиот капитал на банката.

Со новото стекнување акции, српската АЛТА Банка АД Белград дополнително го зацврстува контролниот пакет во АЛТА банка АД Битола, продолжувајќи го процесот на консолидирање на сопственичката структура.

Со донација од Халкбанк АД Скопје, во основното училиште „Имри Елези“ во Општина Чаир, Скопје, беше реализиран проект за уредување на училишниот двор, кој опфати поставување инклузивна урбана опрема за децата, изградба на училница на отворено и уредување на училишна градина за одгледување градинарски култури, со што се создаваат подобри услови за игра, учење и престој на учениците.

Со уредувањето на просторот, училишниот двор доби нова функција како место каде учениците ќе можат да поминуваат повеќе време на отворено, да се дружат и да учествуваат во различни активности. Поставената урбана опрема овозможува просторот да биде достапен и функционален за сите деца, поттикнувајќи инклузивност и еднакво учество во училишниот живот.

Новата училница на отворено ќе им овозможи на наставниците дел од наставата да ја реализираат во поинаква и поинтерактивна средина, додека училишната градина ќе служи како практичен простор каде учениците ќе учат за природата, растенијата и процесот на одгледување градинарски култури.

„Нашата банка верува дека секое дете заслужува средина во која ќе може да учи, да се развива и да ги гради своите потенцијали. Со уредувањето на дворот во ООУ „Имри Елези“ сакаме да придонесеме кон создавање поинклузивен и инспиративен простор кој ќе го користат сите ученици, како за учење, така и за игра и дружење“, истакна Фатих Шахбаз, главен извршен директор на Халкбанк АД Скопје.

Оваа донација е дел од континуираните активности на Халкбанк насочени кон поддршка на образованието и развојот на локалните заедници, преку проекти кои придонесуваат за подобри услови за учење и развој на младите.