Министерот за социјална политика, демографија и млади, Фатмир Лимани, заедно со градоначалници од десет општини, потпиша 11 нови договори за грантови, со што продолжуваат инвестициите во развојот на предучилишното образование и грижата за децата.

Договорите се склучени со општините Пробиштип, Босилово (за населените места Иловица и Радово), Штип, Бутел, Росоман, Чешиново-Облешево, Зелениково, Гостивар, Велес и Боговиње.

Станува збор за активност во рамки на втората компонента од Вториот проект за подобрување на социјалните услуги (SSIP II), чија цел е проширување на опфатот и подобрување на квалитетот на предучилишното образование.

Со договорите е предвидено реновирање и опремување на неискористени училишни и општински простории, кои ќе бидат адаптирани во функционални објекти за згрижување и воспитување на деца од предучилишна возраст. Овој модел овозможува брзо и одржливо решение преку формирање предучилишни групи во алтернативни просторни услови, со што директно се зголемува достапноста на услугите за децата и нивните семејства.

Минатата година беа потпишани и два договори со општините Кавадарци и Кисела Вода, а со новите 11, вкупниот број достигнува 13 договори, што претставува значителен напредок во проширувањето на предучилишните услуги на национално ниво.

Во обраќањето, министерот Лимани нагласи дека ваквиот пристап го зголемува опфатот на децата, го доближува системот до граѓаните и обезбедува еднакви можности за секое дете.

„Ова партнерство меѓу централната и локалната власт е доказ дека со заедничка посветеност можеме да постигнеме конкретни резултати. Новите предучилишни групи ќе придонесат за подобар развој на децата, поголема подготвеност за училиште и намалување на нееднаквостите уште од најрана возраст. Министерството останува посветено на инвестиции во раното детство, затоа што токму тука започнуваат еднаквите шанси“, изјави Лимани.

Собраниската Комисија за социјална политика, демографија и млади го проследи Предлог-законот за изменување и дополнување на Законот за пензиското и инвалидското осигурување во натамошна процедура. Со предложените измени, по скратена постапка, се предвидува зголемување на сите пензии за 1.000 денари, кое би важело од 1 март годинава.

Според предлагачите, ова е четврта измена на законот во изминатиот период, со која вкупното зголемување на пензиите достигнува 7.000 денари за помалку од две години. Мерката ќе ги опфати сите пензионери кои го оствариле правото на пензија заклучно со 28 февруари 2026 година.

Пратениците од владејачкото мнозинство истакнаа дека со ова решение се продолжува политиката за подобрување на животниот стандард на пензионерите и намалување на сиромаштијата.

Предлог-законот сега ќе се разгледува во понатамошна собраниска постапка, каде ќе треба да добие поддршка за конечно усвојување.

Инфлацијата во еврозоната забележа умерено забрзување во февруари, поттикната од растот на цените во секторот на услуги и побавното намалување на трошоците за енергија, покажуваат конечните податоци на „Евростат“.

Хармонизираниот индекс на потрошувачки цени се зголеми за 1,9% на годишно ниво, во однос на 1,7% во јануари, што е во согласност со првичните проценки. Истовремено, основната инфлација се искачи на 2,4% од 2,2% еден месец претходно.

Најголем придонес кон растот имаа цените на услугите, кои се зголемија за 3,4%, како и индустриските производи без енергија, со раст од 0,7%. Од друга страна, падот на цените на енергијата продолжи, но со забавено темпо од 3,1%, додека цените на храната, алкохолот и тутунот пораснаа за 2,5%.

Податоците укажуваат на задржување на инфлаторните притисоци, особено во услужниот сектор, што останува клучен фактор за идните монетарни политики во еврозоната.