Во новата епизода на FinSight, Владимир Ѓорѓиески зборува за Законот со кој се поставуваат правила и ограничувања за инфлуенсерите и појаснува кои субјекти ќе влезат под регулаторна рамка.

Според него, постојат три клучни критериуми што треба да бидат исполнети за еден инфлуенсер да се смета за субјект на регулација.

„Првиот критериум е квантитативниот – инфлуенсерот треба да има над 10.000 следбеници или претплатници“, објаснува Ѓорѓиески.

Вториот критериум се однесува на континуитетот на активност.

„Потребно е да има најмалку 24 објави во рок од една година, односно да се утврди континуитет во вршењето на дејноста“, вели тој.

Сепак, според Ѓорѓиески, најзначајниот услов е поврзан со економската активност.

„Најбитниот критериум е да се остварува економска активност. Само тогаш може да се смета дека субјектот треба да биде под регулација“, нагласува тој.

Под економска активност, како што појаснува, се подразбираат спонзорства, реклами или која било форма на соработка од која инфлуенсерот има финансиска или економска корист.

„Доколку постои економска полза – тогаш станува збор за дејност која подлежи на одредена регулаторна рамка“, додава Ѓорѓиески.

Дали овој закон ќе донесе поголема транспарентност или ќе отвори нови дилеми за дигиталниот простор? Целото објаснување и анализа – во новата епизода на FinSight, достапна на YouTube.

Новиот закон што ги засега дигиталните креатори предизвика силни реакции во јавноста и отвори дебата за тоа каде завршува слободата на изразување, а каде започнува регулацијата. Дел од инфлуенсерите тврдат дека предложените решенија не се добри, дека носат дополнителен финансиски товар и дека може да влијаат врз креативната слобода на дигиталната сцена.

Во новата епизода разговараме со Владимир Ѓорѓиески, од Агенција за аудио и аудиовизуелни медиумски услуги (АВМУ), институцијата која стои зад примената на регулативата. Во интервјуто тој детално ги објаснува клучните одредби од законот,ќ и појаснува каде, според него, настануваат недоразбирањата.

Фокусот на разговорот е ставен на неколку суштински прашања:

Кои членови од законот предизвикуваат најмногу реакции?

Дали инфлуенсерите официјално доставиле забелешки и што бараат?

Дали спорот е исклучиво финансиски или станува збор и за пошироко прашање на дигитална слобода?

Како да се воспостави рамнотежа помеѓу регулацијата и правото на јавно изразување?

Во време кога дигиталните платформи стануваат сè повлијателни во креирањето јавно мислење, прашањето за нивна регулација станува сè поактуелно. Дали станува збор за неопходно уредување на пазарот или за чекор што предизвикува нови поделби?

Целото интервју е достапно на нашиот YouTube канал.

Новинар: Наташа Мерсовска

Слободан Митровски од Агенцијата за недвижнини „Асторија“ зборува за тоа како се формира и како се движи цената на становите – уште од самиот почеток на градбата.

Според него, процесот започнува со амбициозна почетна цел од страна на инвеститорот.

„Инвеститорот си поставува цел да продава по 3.150 евра за метар квадратен“, вели Митровски.

Но, во моментот кога градбата сè уште не е стигната ни до прва плоча, интересот веќе постои. Пазарот реагира уште во најраната фаза.

„Градбата не е стигната ниту до прва плоча, а веќе пристигнуваат понуди за купување. Можеби не по 3.150 евра, но околу 2.750 евра за квадрат“, објаснува тој.

Во таа фаза, ваквата цена за инвеститорот може да биде прифатлива, бидејќи носи сигурност и ликвидност уште на стартот од проектот.

Како што градбата напредува, расте и цената. Со секоја следна фаза, од конструкција до затворена карабина квадратот станува поскап.

„На затворена карабина цената е веќе повисока. Колку повеќе напредува градбата, толку повеќе расте и вредноста“, посочува Митровски.

На крајот, кога проектот ќе се приближи до финалната фаза, пазарната цена достигнува нивоа кои на почетокот изгледале амбициозни.

„Така доаѓаме до 3.150 евра за метар квадратен – цена која на крајот станува реалност, иако на почетокот делувала висока“, заклучува тој.

Како се гради цената паралелно со градбата? И дали купувањето во рана фаза е вистинска предност? Целата анализа на YouTube каналот на Банкарство.