Стопанска банка АД – Скопје информира дека дел од нејзините клиенти добиле сомнителни SMS, Viber и e-mail пораки со лажни известувања за наводна уплата на сообраќаен прекршок од МВР, поврзан со Safe City системот.

Пораките содржат линкови кои водат до лажни веб-страници со .gov екстензија, кои наликуваат на официјални државни портали, но имаат за цел измама и прибирање на податоци за платежни картички и лични информации. Според анализата, најчесто се насочени кон корисници на iOS уреди.

Банката ги повикува клиентите на зголемена внимателност: не отворајте линкови од непознати извори, не внесувајте податоци од картички и не споделувајте лични информации. Доколку добиете сомнителна порака, избришете ја веднаш и не преземајте никакви активности.

Комерцијална банка продолжува да гради одржливо партнерство со Црвениот крст на Република Македонија, со заедничка цел – поддршка на најранливите категории во општеството и создавање услови за поквалитетен живот на децата со попреченост и на нивните семејства.

Преку оваа долгогодишна соработка, Банката како Генерален покровител на проектот „Подобра социјализација на деца и млади со попреченост и психо-социјална поддршка на деца во згрижувачки семејства“, обезбедува финансиска поддршка за социјална интеграција на над 300 деца низ целата земја.

Со овој проект Комерцијална банка придонесува за повеќе детски насмевки, поттикнување самодоверба и чувство на припадност кај децата и младите со попреченост, како и за градење поинклузивно општество.

„Веруваме дека подобрата иднина започнува со грижата за најмладите и најранливите и дека вистинската вредност на успехот се мери преку позитивното влијание што го оставаме зад себе. Затоа остануваме посветени на иницијативи кои градат солидарност и создаваат општество во кое секое дете има можност за учење, развој и напредок“, велат од Комерцијална банка.

На 02.02.2026 година, во просториите на Македонската банкарска асоцијација, беше одржан работен состанок инициран од Централниот регистар, во својство на администратор на Регистарот на вистински сопственици.

На состанокот, претставниците на Централниот регистар, предводени од директорката д-р Анита Стамнова, и претставниците на Комисијата за СПП и усогласеност со прописи при Македонската банкарска асоцијација, предводени од претседавачот г-дин Глигор Пандиловски, дискутираа за можностите за воспоставување решение што ќе вклучува верификација на податоците во Регистарот на вистински сопственици.

Имајќи ја предвид улогата на банките како верификатори на податоците, на состанокот беше презентиран процесот, беа разменети искуства, како и утврдени насоки за соодветна обука и понатамошна соработка.

Како заклучок, беше договорено да се организира заедничка работна средба со претставници од Народната банка, Управата за финансиско разузнавање, Министерството за финансии, Македонската банкарска асоцијација и Централниот регистар, со цел сеопфатно разгледување на проблематиката и постигнување заедничка усогласеност меѓу институциите.