Стапката на невработеност во Македонија во четвртиот квартал лани изнесувала 11,9 проценти, објави Државниот завод за статистика.

Според ДЗС, стапката на активност во овој период е 52,5, а стапката на вработеност 46,2.

Во четвртото тримесечје од 2024 година, активното население во државава  изнесува 795 321 лице, од кои вработени се 700 526, а 94 795 лица се невработени. 

Фондот за иновации и технолошки развој (ФИТР) објави повик „Натпревар за успешни иницијативи од Западен Балкан“ на кој вкупно 18,000 евра ќе се доделат како признание на шест иницијативи кои ги поттикнуваат младите да истражуваат и создаваат иновации.

Наградите ФИТР ги организира во рамки на европскиот проект POLICY ANSWERS, во кој Фондот ја доби главната улога во пилотирање на мерки за поддршка за истражување, развој и иновации во сите економии од Западен Балкан.

Проектот е финансиран од програмата Хоризонт Европа на Европската Комисија.

„Овие награди ги вреднуваат, препознаваат и слават извонредните иницијативи фокусирани на младите од Западен Балкан, кои значително успеале да ги вклучат младите (15 – 29 години) во истражување и иновации помеѓу 2020 и 2024 година.

Целта на наградите е да се потенцираат успешните приказни за истражување и развој фокусирани на младите од Западен Балкан и да се промовираат можности за учење и професионално усовршување во истражувањето и иновациите“, стои во соопштението од ФИТР.

Повикот е наменет за сите правно-основани организации (микро претпријатија, мали и средни претпријатија, граѓански организации, училишта, универзитети или други субјекти) со седиште или фокусирани на земјите од Западен Балкан (Северна Македонија, Албанија, Босна и Херцеговина, Косово, Црна Гора или Србија).

На натпреварот, вкупно шест победници од регионот ќе добијат награда во вредност од 2.000 евра со сите платени трошоци за учество, една главна награда во вредност од 6.000 евра, регионално признание за влијателни иницијативи фокусирани на младите и шанса да ја инспирираат следната генерација иноватори.

Рокот за пријавување за учество на натпреварот е до 18 април 2025 година. Повеќе информации за натпреварот можат да се добијат на следниот линк: https://westernbalkans-infohub.

Минималната плата треба да се зголеми овој месец, но за колку, се уште не е познато.

Согласно законот, зголемувањето би требало да биде околу 1.800 денари, а синдикатот бара зголемување за 6.000 денари и придонесите за разликата до 30.000 денари, колку што би изнесувала минималната плата, да ги субвенционира Владата.

Од Владата, пак велат дека пари во Буџетот за оваа намена не се планирани.

Се согласуваат со секое решение што ќе го договорат синдикатите и работодавачите, но со целосно подмирени трошоци од страна на работодавачите.

Одлуката треба да биде донесена на Економско-социјалниот совет каде партиципираат трите социјални партнери, но засега не се знае кога ќе се одржи седницата.

Во вторник, според најавите, на владина седница треба да бидат предложени тројцата членови во Комисијата за репрезентативност кои ќе треба да ја утврдат репрезентативноста на синдикатите.

Премиерот Христијан Мицкоски вчера во изјава за медиумите потврди дека во Буџетот нема пари за субвенционирање.

За него е прифатливо секое решение што ќе го договорат синдикатите и работодавачите, но со целосно подмирени трошоци од страна на работодавачите.

Коментирајќи го барањето на Сојузот на синдикати за зголемување на минималната плата, Мицкоски рече дека жали што синдикатот се претворил во гласноговорник на опозицијата.

„Жалам што Сојузот на синдикати на Македонија полека, но сигурно, се претвора во партиска бина или гласноговорник на коалицијата Левица, СДСМ и ДУИ и практично тоа што овие го говорат во Парламентот, тие го говорат на прес-конференции.

Тие одбрале таков начин да функционираат. Жалам што во минатото изостана овој предлог.

Тие мислат дека сега ќе го исцрпат Буџетот и дека ние ќе дадеме 100-200 милиони денари за нив нема за улици, градинки, училишта, канализации. . . “, изјави Мицкоски.

ССМ во понеделникот побара зголемување на минималната плата од 6.000 денари со што таа би достигнала до 30.000 денари, а работодавачите една година да бидат ослободени од социјалните придонеси, односно придонесите да ги субвенционира државата.

 Според претседателот на ССМ, созреано е времето социјалните партнери да си подадат рака и да го унапредат животниот стандард на работниците, но и да го сочуваат квалификуваниот кадар.

Секој глас против зголемување на платите, како што истакна претседателот на ССМ, е глас за купување билет во еден правец и напуштање на државата.

„Апелирам до Владата и работодавачите да го прифатат предлогот на ССМ, а пратениците, како што беа сложни за нивните патни трошоци, да гласаат за дополнително зголемување на минималната плата за 6.000 денари што ќе значи и дополнително зголемување на сите остантати плати на работниците во Македонија. Ние не правиме упад во даночната политика, напротив.

Со тоа што ќе добиеме зголемени плати нема да заминеме во банките за да ги штедиме тие средства што сме ги добиле како зголемување, туку со нив ќе ги купиме основните прехранбени производи кои се даночат со стапка од 5, 10, 15 или 18 отсто“, рече Трендафилов на прес-конференција во понеделникот.