Министрите за финансии и економија на Австрија, Германија, Италија, Португалија и Шпанија побараа од Европската комисија да воведе данок на вишок профит на енергетските компании кои остваруваат значителни добивки поради кризата предизвикана од војната во Иран.

Во писмо упатено до европскиот комесар за клима Вопке Хукстра, министрите се повикуваат на таканаречениот „солидарен данок“, кој беше воведен за време на енергетската криза по почетокот на војната во Украина во 2022 година. Тогаш мерката беше насочена кон оданочување на екстрапрофитот во секторите поврзани со фосилните горива, како нафтата и гасот.

Министрите истакнуваат дека, поради тековните нарушувања на пазарот и ограничувањата во буџетите, Европската комисија треба брзо да развие сличен инструмент на ниво на ЕУ, базиран на цврста правна основа. Како главна причина наведуваат дека одредени енергетски компании ја користат кризата за остварување „огромни профити“.

Според нив, заедничко решение на ниво на ЕУ би испратило јасна порака дека Унијата делува единствено и солидарно, а воедно би покажало дека оние кои профитираат од последиците на војната треба да придонесат за намалување на товарот врз граѓаните.

Приходите од ваквиот данок, како што се предлага, би се користеле за финансирање привремени мерки за ублажување на трошоците за потрошувачите и за ограничување на инфлацијата, без дополнително оптоварување на државните буџети.

Цените на нафтата и природниот гас нагло пораснаа по почетокот на американско-израелските напади врз Иран на 28 февруари. Иран, како што се наведува, практично го затвори стратешки важниот Ормуски теснец и извршува напади врз енергетската инфраструктура во Персискиот Залив.

Иако Европската унија најголемиот дел од нафтата и гасот го увезува од други региони, растот на глобалните цени и натаму има значително влијание врз компаниите и домаќинствата. Во писмото не е прецизиран износот на предложениот данок, ниту кои компании конкретно би биле опфатени.

Државната компанија за пренос на електрична енергија МЕПСО соопшти дека повторно ја активирала изградбата на 400-киловолтен далекувод кон Албанија, по претходните одложувања и спроведувањето на нов тендер за избор на изведувач.

Проектот беше ставен во мирување поради одредени доцнења, по што беше покрената нова постапка за избор на компанија која ќе ги продолжи градежните работи.

Со реализацијата на далекуводот од 400 kV се очекува да се подобри прекуграничната енергетска поврзаност и да се зајакне стабилноста на електроенергетскиот систем во регионот.

САД доделија договор на американскиот производител на оружје Colt’s Manufacturing Company за производство на карабини од типот М4/М4А1, наменети за странски партнери, меѓу кои се и Северна Македонија и Босна и Херцеговина.

Според информациите, договорот е доделен од Министерство за војна на Соединетите Американски Држави и има максимална вредност до 40,86 милиони долари (околу 35,4 милиони евра). Тој предвидува производство на стандардните воени карабини М4 и М4А1, кои се широко користени во рамки на вооружените сили и безбедносните структури на повеќе земји.

Договорот е дел од пошироката соработка на САД со партнерски држави во областа на одбраната и безбедноста, при што се обезбедува модернизација и опремување на нивните вооружени сили со современо оружје.

Деталите за количините и временската рамка на испораките не се објавени, а информациите се дел од ограничен извештај достапен преку платформа со претплата.