Во првата половина од 2025 година, во услови на актуелни глобални предизвици поврзани со геополитичките случувања и промените во трговските политики, ТТК Банка АД Скопје го задржа стабилниот курс на дејствување, коj беше во насока на остварување на приоритетните цели и задачи дефинирани во Деловната политика и во Финансискиот план на Банката за 2025 годинa.

Во анализираниот период, преку своето редовно оперативно работење, Банката успеа да генерира позитивен нето-оперативен приход пред исправката на вредност во износ од 47,4 милиони денари, како резултат на остварените оперативни приходи во износ од 279,6 милиони денари и оперативните трошоци во износ од 232,2 милиони денари. Во истиот период, исправката на вредност на финансиските средства на нето-основа изнесува 8,4 милиони денари. Финансискиот резултат заклучно со 30.6.2025 година е позитивен и изнесува 39 милиони денари.

Финансиски перформанси и остварувања

Во првата половина од годината, билансната сума на Банката достигна ниво од 11.508 милиони денари, што претставува раст од 15,1% во споредба со истиот период од претходната година. Во однос на планот билансната сума е на повисоко ниво од планираното за 271 милиони денари или за 2,4%.

Порастот на билансната сума на Банката е резултат на порастот на изворите на средства каде што вкупната депозитна база бележи раст од 1.358 милиони денари или 16,1%, како резултат нa зголемувањето на депозитите од секторот Домаќинства за 850 милиони денари или 13,4%, проследени со раст на депозитите кај секторот Стопанство за 315 милиони денари односно 20,7%, како и со раст на депозитите од Финансиски институции за 193 милиони денари или 34,7%. Планот за депозитите за овој период од годината е исполнет со надминување од 2,2%.

Од страна на активата, годишниот раст на билансната сума се карактеризира со пораст на паричните средства и паричните еквиваленти и тоа за 365 милиони денари или 11,4%, со истовремено годишно зголемување на бруто-кредитите за 463 милиони денари, односно 9,2%, како резултат на зголемување на кредитите од секторот Домаќинства за 324 милиони денари или 8,6%, со истовремено зголемување на кредитите на секторот Стопанство за 137 милиони денари или 10,7%. Планот за бруто-кредитите на коминтентите за овој период од годината е исполнет со надминување од 1,5%.

Нето-приходите од камати претставуваат основна компонента во формирањето на вкупните приходи од работењето на Банката. Остварените нето-приходи од камати во периодот од 1.1.2025 до 30.6.2025 година изнесуваат 172 милиони денари и бележат пораст од 0,8% во однос на истиот период од претходната година. Порастот во најголем дел се должи на зголемените каматни приходи од секторот Домаќинства и Банки и Финансиски институции, при остварен раст и на приходите од камати од секторот Стопанство. Во однос на планот, нето-приходите од камати се остварени со 97,7%.

Нето-приходите од провизии и надоместоци за услуги во тековниот период
изнесуваат 77,5 милиони денари. Доминантно учество во генерирањето на приходите
од провизија имаат провизиите од платниот промет во земјата со 51,7%, како и
провизиите од картично работење со 28%. Во однос на планот, нето-приходите од
провизии за овој период од годината се остварени со 92,2%.

Останатите приходи од работењето на Банката изнесуваат 23 милиони денари и се повисоки во однос на минатата година, како резултат, во најголем дел, на реализирани приходи од капитална добивка од продажба на преземени средства во тековната година. Во однос на планот се остварени со 84,8%.

Вкупните оперативни трошоци во анализираниот период изнесуваат 232,2 милиони
денари и се за 17,2% повисоки во однос на истиот период минатата година, како резултат, во најголем дел, на повисоките трошоци за плати и вработени. Оперативните трошоци за овој период од годината се во согласност со планираното ниво, односно за 0,6% пониски.

Во споменатиов период, исправката на вредноста на финансиските средства и на посебната резерва за вонбилансна изложеност на нето-основа изнесува 8,4 милиони денари и таа соодветствува со обемот, структурата и квалитетот на пласманите на Банката.

Очекувања за претстојниот период

Претпазливите очекувања за растот на глобалната економија го вклучуваат ефектот од продолжените ризиците, кои главно потекнуваат од неизвесноста од трговските политики, геополитичките случувања и побавното надолно приспособување на инфлацијата. Во првото тримесечје од 2025 година, централните банки во развиените земји продолжија попретпазливо да ја нормализираат монетарната политика.

Амбиентот за монетарната политика и понатаму е неизвесен и под силно влијание на идната динамика на инфлацијата, ризиците од надворешното (трговски политики и намалена доверба на инвеститорите) и домашното окружување, но сепак се очекува раст на кредитната активност во текот на 2025 година и солиден раст на депозитната база и профитабилноста на банките, поддржан и од средствата на државата преку Развојната банка за инвестиции на домашните компании.

ТТК Банка АД Скопје континуирано внимателно ќе продолжи да ги следи макроекономските параметри и мерки, активностите, предвидувањата и измените на законската регулатива на носителите на економските политики и ќе ги усогласува интерните индикатори и работењето, со фокус на одржување на ликвидноста и на долгорочната стабилност. Ќе продолжат континуираните напори за остварување на планираните позиции од деловниот план, но без притоа да се загрозува нивото на квалитет на кредитното портфолио, прудентното управување со ризиците и одржување на високата стабилност, сигурноста и ефикасноста во сите сегменти од работењето.

Банката и понатаму ќе делува во насока на поддршка на населението и на компаниите, водена од приматот за ефикасна и квалитетна клиентската услуга и клиентско задоволство. Во оваа насока, напорите се насочени кон активности за официјално воведување на услугата СЕПА кредитен трансфер за која се очекува да биде достапна од октомври 2025 година. Банката ќе продолжи да инвестира стратешки во напредни технолошки решенија, модерна инфраструктура и безбедносни системи кои се усогласени со највисоките европски стандарди, а со цел да понуди иновативни, достапни и сигурни банкарски услуги приспособени на современите потреби на клиентите.

Потпирањето на сопствените извори на финансирање и понатаму ќе претставуваат основа на деловната стратегија на Банката за 2025 година, при што и натаму депозитите од секторот Население остануваат со доминантно учество во вкупните извори на средства.

Согласно препораките и сигналите од Народната банка, а со цел поддршка на граѓаните, компаниите и дигиталната трансформација на платниот промет, НЛБ Банка укинува и намалува дел од надоместоците во домашниот и меѓународниот платен промет, со посебен фокус на електронските плаќања.

Новата структура на надоместоци во домашниот и меѓународниот платен промет, пред сè, значи осетно пониски трошоци и заштеди за граѓаните и компаниите. Истовремено претставува уште еден придонес на Банката кон одржливост на економскиот раст, обезбедување на едноставен и прифатлив пристап до платежните услуги и чекор повеќе во справувањето со сивата економија.

Веќе од задутре, значајни ценовни олеснувања во домашниот платен промет

Во домашниот платен промет за плаќања по електронски пат за физички лица преку МИПС, НЛБ Банка го намалува надоместокот на износ од 55 денари, а целосно го укинува надоместокот за плаќањата во рамките на Банката.

Без надоместок, како и досега, останува месечно одржување на платежна сметка со основни функции, како и пакетот за млади од 18 до 25 години за мобилно банкарство кој вклучува: НЛБ мКлик со право на плаќање и дебитна картичка.

Во домашниот платен промет за плаќања по електронски пат за правни лица преку МИПС, НЛБ Банка го намалува надоместокот на износ од 90 денари, додека за плаќањата во рамките на Банката го сведува на 7 денари.

Новите надоместоци во домашниот платен промет стапуваат на важност, веќе од задутре, 6 август.

Побрз, поефикасен и поекономичен меѓународен платен промет

НЛБ е и првата банка која веќе постави нова структура со намалени надоместоци за меѓународни плаќања преку СЕПА. Новите надоместоци за плаќања и приливи во евра во СЕПА, кои стапуваат на важност од 6 октомври годинава, се повеќекратно намалени и за граѓаните и за компаниите. И тука, посебен фокус е ставен на надоместоците кај електронските плаќања, сè со цел да се стимулира дигиталната трансформација.

Поконкретно, за кредитни трансфери преку дигиталните канали за физички лица, НЛБ Банка ќе понуди цени почнувајќи од 1 евро во денарска противвредност за најниските рангови на износи, односно 5 евра во денарска противвредност за најголемиот број на кредитни трансфери. За приливите продолжува со цена од 0,16 евра во денарска противвредност за најниските рангови на износи, односно 3 евра во денарска противвредност за најголемиот број на приливни транасакции.

Примателите на странски плати и пензии директно преку НЛБ Банка, продолжуваат да ги реализираат приливите по овие основи без надоместок.

Истовремено за компаниите, Банката ќе понуди и до седум пати намалени просечни тарифни провизии за плаќањата во СЕПА. Повластените провизии за плаќањата на физичките лица и компаниите помеѓу банките во рамките на НЛБ Групацијата остануваат непроменети.

Ценовното стимулирање на електронските плаќања наспроти плаќањата на шалтер е во насока на промовирање на користење на брзи и безбедни дигитални услуги, како и во насока на стратегијата на Банката на среден рок да овозможи, максимален број на своите производи и услуги да биде на располагање преку дигиталните канали. Сепак, Банката воведе пониски надоместоци и за шалтерските налози, почитувајќи ги различните навики и потреби на клиентите.

Целокупната структура на новите провизии во домашниот и меѓународниот платен промет претставува повеќекратно намалување на досегашните надоместоци, со што Банката прави значаен чекор кон овозможување на достапни, разумни и одржливи трансакции за граѓаните и компаниите.

Филијалите и експозитурите на Комерцијална банка АД Скопје нема да работат на 2 август (сабота) поради празникот Илинден.

“Ги известуваме нашите клиенти дека за подигнување и уплата готовина може да ги користат банкоматите на Банката, а за други финансиски трансакции на располагање ги имаат веб и мобилните апликации Интернет банка и мБанка“, велат од Комерцијална банка.

За корисниците на платежни картички, 24/7 во Скопје се отворени дигитализираната експозитура на Комерцијална банка на улица Македонија и дигиталните делови од експозитурите ГТЦ, Бисер, Буњаковец, Ист Гејт Мол, Ѓорче Петров, 11 Октомври, Автокоманда, Драчево и Лептокарија и во експозитурите и филијалите во Дебар, Неготино, Прилеп, Куманово, Струмица, Охрид, Кавадарци, Струга, Гевгелија и Тетово Илинденска.