„Meta“ објави дека во април 2026 година ќе го затвори самостојниот веб-сајт messenger.com, со што корисниците повеќе нема да можат да испраќаат и примаат пораки преку десктоп верзијата. Оваа одлука следи по укинувањето на посебните Messenger апликации за Windows и Mac минатата година.

По исклучувањето, сите обиди за пристап до messenger.com автоматски ќе бидат пренасочени кон facebook.com/messages, додека корисниците без Facebook профил ќе можат да ја користат услугата исклучиво преку мобилната апликација. Со ова, „Meta“ дополнително ја централизира комуникацијата во рамките на својот екосистем.

Компанијата соопшти дека разговорите ќе останат зачувани и ќе можат да се вратат преку PIN-код. Доколку корисникот го има заборавено PIN кодот, ресетирањето е возможно преку поставките за приватност и безбедност, во делот за енд-до-енд енкриптирани разговори и безбедно складирање.

„Messenger“ беше лансиран во 2008 година како „Facebook Chat“, а од 2011 година функционира под сегашното име. Самостојната десктоп верзија беше воведена во 2020 година, но беше повлечена во декември 2025 година, а сега и веб-верзијата заминува во историјата.

Иако причините за ваквата одлука не се официјално соопштени, дел од корисниците веќе изразија незадоволство, особено оние кои секојдневно ја користеа десктоп платформата. Аналитичарите оценуваат дека овој чекор е дел од стратегијата на „Meta“ за поцврста интеграција на своите услуги и зголемување на сообраќајот кон „Facebook“ и мобилните апликации.

Дури и во време на бесконтактни плаќања преку Google Pay, Apple Pay, Garmin Pay или PayPal, резервната готовина останува неопходна. Но, што да правите кога бесконтактните плаќања или терминалот за картички во супермаркетот не работат? Во тој случај, малку готовина може да вреди злато.

Ако батеријата на телефонот се испразни или сте во ресторан што прифаќа само готовина, една банкнота од 50 евра може да ве извлече од непријатна ситуација. Затоа е препорачливо секогаш да имате резерва во готовина, бидејќи „фондот за итни случаи“ ќе ви биде многу корисен.

Секогаш чувајте ја банкнотата скриена во вашиот паричник или футрола за телефон за да не ја потрошите случајно и веднаш надополнете ја по нејзино користење. Овој таканаречен „фонд за итни случаи“ ви овозможува сигурност кога технологијата ќе откаже или кога ви е потребно брзо плаќање.

Три правила за готовина за итни случаи:

1. Секогаш имајте резервна банкнота;
2. Чувајте ја на скришно место со цел да избегнете нејзино трошење;
3. Веднаш надополнете го фондот по искористување на средствата.

На кратко, 50 евра во готово може да се покаже како вистински спас во непредвидливи и непосакувани ситуации.

Извор: kamatica.com

Просечната месечна исплатена нето-плата во декември 2025 година изнесувала 46.889 денари, што претставува раст од 7,6% на годишно ниво, објави Државниот завод за статистика.

Најголем придонес кон зголемувањето на просечната месечна исплатена нето-плата од вработен имаат секторите: Транспорт и складирање за 13,4%, Земјоделство, шумарство и рибарство за 10,9% и Трговија на големо и трговија на мало; Поправка на моторни возила и мотоцикли и Образование 9,7%.

Зголемување на просечната месечна исплатена нето-плата по вработен, во однос на претходниот месец, е забележано во секторите: Транспорт и складирање за 12,8%, Рударство и вадење на камен за 9,0% и Градежништво за 7,0%.

Просечната бруто-плата во декември 2025 година изнесувала 70.520 денари, потврдувајќи го трендот на континуиран раст на примањата.