Просечната потрошувачка кошничка е веќе изработена и прифатена од Економско-социјалниот совет, а во моментов се усогласуваат податоците со Државниот завод за статистика, изјави заменик-министерот за економија, Марјан Ристески.

Тој очекува, доколку усогласувањето заврши навреме, примената на новата кошничка да почне во септември.

Ристески нагласи дека просечната потрошувачка кошничка не треба да се поистоветува со минималната потрошувачка кошничка што ја објавуваат синдикатите, бидејќи станува збор за различни пресметки и различна намена.

Според него, новиот модел ќе им служи на институциите како основа за креирање економски политики, закони, одлуки и мерки засновани на обработени статистички податоци.

Изјавата ја даде по работниот состанок во Стопанската комора.

Компанијата за платежни услуги Stripe и приватната инвестициска компанија Advent International поднеле заедничка понуда за преземање на PayPal, со која компанијата е проценета на повеќе од 53 милијарди долари, објави Ројтерс, повикувајќи се на извори запознаени со разговорите.

Понудата изнесува 60,50 долари за акција, што претставува премија од околу 28 проценти во однос на цената по која акциите на PayPal го завршија тргувањето во вторникот. Предлогот е поддржан со околу 50 милијарди долари банкарско финансирање.

Според изворите, понудата била доставена на почетокот од јули, по првичниот пристап во април. PayPal засега не одговорил на предлогот, а Stripe и Advent планираат да ги интензивираат разговорите во следните недели.

Доколку договорот биде постигнат, Stripe и Advent би поседувале еднакви удели во PayPal, без делење на компанијата на одделни деловни единици. Сепак, изворите предупредуваат дека нема гаранција оти понудата ќе резултира со конечна трансакција. Компаниите не ја коментирале информацијата.

PayPal, кој беше еден од пионерите во дигиталното плаќање, во последните години се соочува со посилна конкуренција и забавување на растот. Компанијата изгуби повеќе од 40 проценти од својата пазарна вредност во изминатите 12 месеци, додека нејзината капитализација е значително пониска од рекордните околу 360 милијарди долари достигнати во 2021 година.

Новиот извршен директор Енрике Лорес започна реорганизација на работењето, која вклучува поедноставување на структурата, намалување на трошоците и поголема примена на вештачката интелигенција. PayPal очекува овие мерки да донесат заштеда од околу 1,5 милијарди долари во следните две до три години.

„Иуте Македонија“ воведе понуда за рефинансирање на постојните финансиски обврски, со можност за попуст до 50 отсто на вкупните трошоци.

Со рефинансирањето, корисниците можат да ги обединат повеќето постојни обврски во една месечна рата, со цел полесна контрола и планирање на личниот буџет.

Од компанијата посочуваат дека постапката за аплицирање е брза и едноставна, а барањето може да се поднесе преку интернет-страницата iute.mk или преку апликацијата Myiute.

За деталите, условите и висината на попустот, заинтересираните корисници треба да се информираат директно кај компанијата.