Слободан Митровски од Агенцијата за недвижнини „Асторија“ зборува за една често споменувана тема во јавноста – дали становите во Скопје навистина се купуваат во кеш и што точно значи тоа.

Според него, терминот „купување во кеш“ често се користи без прецизно објаснување.

„Лесно е да се каже дека станови се купуваат во кеш. Еве да кажеме дека се купуваат, но што значи тоа во пракса?“, вели Митровски.

Тој објаснува дека во дел од трансакциите, од вкупна вредност од, на пример, 250.000 евра, во кеш може да се платат 5.000 евра.

„Зборуваме за минорна бројка. Данокот во тој случај би бил симболичен“, посочува тој.

Проблемот, според Митровски, настанува кога во јавноста се создава поинаква перцепција.

„Кога гувернер ќе изјави дека се купуваат станови во кеш, никој не размислува дека можеби станува збор за 5.000 евра. Тогаш луѓето претпоставуваат дека 200.000 евра се плаќаат преку сметка, а 50.000 евра во кеш. Тоа веќе е сериозно затајување на данок“, објаснува тој.

Митровски додава дека не сака да ја релативизира темата.

„Не велам дека 5.000 евра не е затајување, но мора да бидеме реални – оваа држава функционираше со кеш многу години“, вели тој.

Дали перцепцијата за „кеш пазар“ е поголема од реалноста? И каде е линијата меѓу симболична сума и сериозно даночно прекршување? Целото интервју – на YouTube каналот FinSight.

Во новата епизода на FinSight, Слободан Митровски од Агенцијата за недвижнини „Асторија“ отвора едно од најчестите прашања кај граѓаните – дали денес е исплатливо да се купи стан и да се издава под кирија?

Според него, бројките ја даваат најреалната слика.

„Стан од 60 квадрати денес треба да го купите за околу 150.000 евра, односно по 2.500 евра за квадрат“, вели Митровски.

Но, тука трошокот не завршува. За станот да биде подготвен за изнајмување, потребно е дополнително вложување.

„Плус, треба да се опреми – кујна, плакари, останати елементи. Тоа може да чини уште 20 до 30 илјади евра. Така доаѓаме до вкупна инвестиција од околу 180.000 евра“, објаснува тој.

Од друга страна, месечната кирија за ваков стан би изнесувала околу 500 евра, што споредено со минатите години претставува раст.

„Денес 500 евра е солидна кирија, ако се земе предвид дека порано изнесуваше 250 до 300 евра“, посочува Митровски.

Но, кога ќе се направи едноставна пресметка, сликата станува поинаква. Со кирија од 500 евра, годишниот приход би бил околу 6.000 евра.

„За 10 години тоа се 60.000 евра. За што зборуваме тука? Потребни се околу 30 години станот континуирано да се издава за да бидете на нула“, нагласува тој.

Дополнително, во таков временски период станот ќе претрпи амортизација и ќе бара нови вложувања.

„За 30 години станот ќе се оштети и повторно ќе треба да се инвестира“, заклучува Митровски.

Дали издавањето стан денес е сигурна инвестиција или долгорочен ризик? Целата анализа и аргументи – во FinSight.

Во новата епизода на FinSight, разговараме со Слободан Митровски од Агенцијата за недвижнини „Асторија“ за состојбата на пазарот на помали станови во Скопје – сегмент кој во моментов бележи најголема побарувачка.

Според Митровски, без разлика на локацијата, мал стан по „пристапна“ цена речиси и да не може да се најде.

„Без разлика каде се наоѓа, мал стан по пристапна цена нема шанси да се најде“, вели Митровски.

Станува збор за станови со површина од 35 до 60 квадратни метри, кои, според него, се најбараните на пазарот. Токму во овој сегмент продажбата се одвива најбрзо, а просторот за преговори е минимален.

„Продажбата кај овие станови е навистина брза, а цената тешко се преговара“, објаснува тој.

Причината е едноставна – побарувачката значително ја надминува понудата. Кога инвеститор или компанија ќе објави цена од, на пример, 2.700 евра за квадрат, интересот е моментален.

„Кога ќе се објави цена од 2.700 евра за квадрат, се јавуваат 10 до 15 клиенти за истиот стан. Во таква ситуација, продавачот нема никаква потреба да ја намали цената“, нагласува Митровски.

Ова, според него, јасно покажува дека пазарната динамика кај малите станови во моментов е целосно на страната на продавачите, а купувачите се тие што се натпреваруваат.

Целото интервју со повеќе детали и анализа на трендовите – во новата епизода на FinSight.