На свеченото одбележување на Светскиот ден на штедење, кое традиционално го организира Македонската Банкарска Асоцијација, беа доделени признанија за постигнати особени резултати во работата на службениците номинирани од банките, штедилниците, Клириншката куќа КИБС и Македонското кредитно биро.

Снежана Атанасова и Миле Арсовски се најдобрите банкарски службеници од ПроКредит Банка за 2024 година.

„Горди сме што оваа чест годинава ја понесоа нашите колеги Снежана Атанасова и Миле Арсовски. Честитки за нивните достигнувања и благодарност за нивниот труд и нивната посветеност кон професијата и кон клиентите. Се гордееме со нивниот успех и им посакуваме уште многу награди и успеси!“, велат од ПроКредит Банка.

Денот на штедењето, Комерцијална банка го прослави и со традиционалната посета на родилишта и доделување подарок штедни книшки „Верверичка“ со депозит од 5.000 денари за бебињата родени на 31 октомври.

Со оваа мисија Комерцијална банка, на своја огромна радост, дава придонес за подобра и посреќна иднина на децата и го поттикнува штедењето уште од најмала возраст. А, им помага и на родителите да го наметнат значењето на штедењето како важна животна вредност за нивните деца.

Штедните книшки „Верверичка“ од Комерцијална банка не се само обичен подарок – тие се симбол на вербата дека секое дете заслужува сигурна иднина и поддршка во реализација на своите соништа. Отворањето штедна книшка за новороденчињата е еден мал чекор во градењето култура на штедење и одговорност кон финансиската сигурност.

Штедењето од најмала возраст е една од највредните лекции кои можеме да ги пренесеме на следните генерации. Затоа „Верверичката“ на Комерцијална банка заедно со родителите веќе две децении гради подобра иднина за нашите деца.

Признание и парична награда за долгогодишна посветеност и труд добија 20 вработени во Комерцијална банка.

Јубилејните признанија на вработените им ги врачи д-р Маја Стевкова Штериева, Главен финансов директор и член на Управниот одбор на Комерцијална банка, на традиционалната прослава за Денот на штедењето, организирана од Македонската банкарска асоцијација.

Д-р Штериева им ги подели јубилејните признанија на вработените кои со децении ја развиваат својата кариера во Банката и се основа на успешните достигнувања и инспирација за целиот КБ тим.

„Оваа година имаме чест да ги наградиме оние кои работат со нас 15 и 30 години, исполнети со успех, иновации и заеднички постигнувања. Им благодариме за лојалноста и им посакуваме заедно да создаваме уште многу нови успеси“, велат од Комерцијална банка.