Connect with us

Банки

Стопанска банка АД Скопје прокнижи 11,4 милиони евра во првите три месеци од 2023 година

Објавено

пред 2 години

на

Деловното опкружување во првиот квартал од 2023 година претставува континуитет на исклучително сериозните предизвици со кои економиите и бизнисите, како глобално така и на ниво на домашната економија, се соочија во претходната 2022 година. Војната во Украина, енергетската криза, инфлаторните притисоци што достигнуваат децениски максимум и како последица на сето тоа, затегнувањето на монетарните политики на централните банки, неминовно доведува до негативни ефекти и ги  влошува изгледите за глобалниот економски раст. Во тој контекст, деловното опкружување и во Република С.Македонија се карактеризира со забавување на растот на БДП, кој според очекувањата, треба да биде на ниво од скромни нешто над 2%, додека според проекциите на Меѓународниот монетарен фонд за 2023, треба да достигне само 1,4%. Банкарскиот сектор продолжува да испорачува значајна кредитна поддршка на реалниот сектор и домаќинствата, како и стабилност и сигурност за националното штедење во форма на банкарски депозити.

Во согласност со очекувањата, во првиот квартал од 2023 година, Стопанска банка АД Скопје (во натамошниот текст: СБ или Банката) оствари добивка пред оданочување и резервации во износ од 1.151.593 илјади денари, што е 25% повеќе споредено со претходната година. Истовремено, врз основа на прудентните политики на Банката за управување со ризиците, имајќи ги предвид сите предизвици што ги носи тековното деловно опкружување, глобално и на ниво на домашната економија, во текот на првиот квартал од 2023 година, Стопанска банка АД Скопје издвои исправка на вредност на финансиските средства и посебна резерва за вонбилансна изложеност, на нето-основа, во износ од 375.149 илјади денари. Со тоа, добивката на Стопанска банка АД Скопје пред оданочување на 31.03.2023 година изнесува 776.444 илјади денари и во однос на истиот период од минатата година е повисока за 5%. Во најголем дел, ова е резултат на зголемени приходи по сите основи заради континуираниот тренд на зголемување на  обемот на деловни активности, како и зголеменото кредитно портфолио на Банката. Успешното работење е остварено во услови на органски раст на активата на Банката, која на 31.03.2023 година изнесува 121.240.794 илјади денари. На тој начин, Банката, во согласност со својата деловна стратегија продолжува со раст на обемот на нејзините бизнис-активности.

Во натамошниот текст ќе бидат претставени одделните позиции од билансот на успех и од билансот на состојба на Банката.

Биланс на успех

Нето-приходите од камати изнесуваат 1.289.288 илјади денари и се зголемени за 30 % во однос на истиот период од минатата година, како резултат на интензивните кредитни активности и зголеменото кредитно портфолио на Банката и трендот на раст на каматните стапки.

Нето-приходите од провизии и надоместоци изнесуваат 207.386 илјади денари и се намалени за 3 % во однос на анализираниот период во 2022 година, што се должи  на зголемени расходи од провизии поради повисоките трошоци за обезбедување на овие услуги, пред сè во делот на платните и картичните трансакции.

Нето-приходите од курсни разлики забележаа пораст од 9 % и изнесуваат 45.279 илјади денари, како резултат на зголемениот обем на тргувања на девизниот и менувачкиот пазар.

Останатите приходи од дејноста изнесуваат 123.289 илјади денари.

И покрај ценовните флуктуации и високата инфлација, Банката успеа да ги ограничи оперативните трошоци од работењето и да ги одржи на релативно стабилно ниво, при што  на 31.03.2023 година трошоците за вработени изнесуваат 250.062 илјади денари, додека оперативните трошоци изнесуваат 229.115 илјади денари.

Во анализираниот период, врз основа на прудентниот пристап во управувањето со ризиците, Банката издвои исправка на вредност на финансиските средства и посебна резерва за вонбилансна изложеност, на нето-основа, во износ од 375.149 илјади денари.

Како резултат на сето наведено, остварената добивка пред оданочување и резервации  изнесува 1.151.593 илјади денари, додека добивката пред оданочување на 31.03.2023 година изнесува 776.444 илјади денари, што е за 5 % повисоко во однос на истиот период од минатата година.

Биланс на состојба

Вкупната актива на Банката изнесува 121.240.794 илјади денари.

Паричните средства и парични еквиваленти споредени со крајот на 2022 година се пониски за 3.410.756 илјади денари, што се должи на редовна сезонска флуктуација на средствата на некои од поголемите депоненти на Банката.

Кредитите на и побарувања од други комитенти нето изнесуваат 86.445.863 илјади денари и се приближно на исто ниво во однос на крајот од минатата година.

Кредитите на и побарувањата од банки изнесуваат 294.537 илјади денари и се приближно на исто ниво во однос на крајот од минатата година.

Вложувањата во хартии од вредност изнесуваат 11.457.231 илјади денари и забележаа зголемување од 10 % споредено со крајот на минатата година.

Останатите побарувања забележаа пораст од 7 % и изнесуваат 2.769.197 илјади денари.

Вкупните депозити на други комитенти изнесуваат  92.419.934 илјади денари.

Капиталот и резервите изнесуваат 22.894.732 илјади денари, што претставува  зголемување за 3 % во однос на крајот на 2022 година.

Очекувања за претстојниот период

Во следниот период се очекува продолжување на деловните активности во согласност со дефинираниот деловен план на Банката со целосна ориентираност кон поддршка на клиентите, прудентно управување со ризиците и одржување на високата стабилност, сигурност и ефикасност во сите сегменти од нејзиното работење. Исто така, Банката продолжува со реализација на започнатите проекти, пред сè, во делот на дигитализацијата, како и подготовка на понуда на нови услуги. Секако, фокусот останува на редовното и ефикасно извршување на основните деловни активности, одржување на лидерското пазарно учество од околу 27 % во сегментот на кредитирање на население, со фокус за натамошно зголемување на пазарното учество во делот на кредитирање на компаниите, кое на крајот на март 2023 година достигна 16,4 %.

Грижата за општествената заедница како и секогаш останува во зацртаната агенда на Банката, преку реализација на повеќе проекти кои станаа препознатливи во заедницата,  како и со повеќе донации – како пред пандемијата така и за време на пандемијата. При крајот на првиот квартал годинава, Банката ја реализираше и втората фаза од проектот „Зелен ѕид“ засадувајќи нови 300 високи садници дрвја во Скопје, долж Кејот на реката Вардар од Националната арена „Тоше Проески“ до мостот „Близнак“. Со проектот што ќе се одвива во период од две години, Банката има за цел да го зголеми фондот на дрвја во Градот со домашни видови липа, црвен даб, багрем, јавор, црвен јавор и прунус и со тоа да засади нов зелен појас кој, како што ќе расте низ годините, ќе ја подобрува животната средина за сите нас.

Истовремено, покрај клиентите и пошироката заедница, Банката продолжува и понатаму со соодветна грижа и посветеност кон своите вработени.

Слични Теми:

Банки

Континуиран растечки тренд на користењето на дигиталните канали за извршување на електронските плаќања

Објавено

пред 18 часа

на

Народната банка на Република Северна Македонија ги објави податоците од доменот на платежната статистика за третиот квартал од 2024 година, кои покажуваат постојан тренд на зголемена употреба на дигиталните канали за извршување на плаќањата во земјата. Овие податоци се особено значајни, бидејќи ја истакнуваат промената во навиките на граѓаните во насока на сѐ поголема  употреба на платежните картички при иницирање на плаќањата, како и  користење на решенијата за мобилно плаќање кај електронските кредитни трансфери (платните налози). 

Во третиот квартал од 2024 година се забележува  значителен годишен раст кај бројот и вредноста на платежните трансакции на граѓаните во трговијата во земјата. Трансакциите  со картички, издадени од домашните даватели на платежните услуги, пораснале за 10,2% по број и за 13,6% по вредност. Овој раст најмногу се должи на високиот годишен раст на бројот на плаќањата во е-трговијата во земјата, кој изнесува 29,2%, како и растот од 8,8% на плаќањата преку терминалските уред ПОС.

Покрај тоа, забележан е и годишен раст во бројот на  плаќањата на граѓаните со платни налози. Бројот на платежните трансакции се зголемил за  9,9%, а вредноста на остварените трансакции пораснала за 22,2%. Ова укажува на натамошно зголемување на употребата на дигиталните канали за иницирање на овие плаќања. Најзначајни се резултатите од употребата на апликациите за мобилно плаќање, кои покажуваат годишен раст од 50,2% во бројот на платежните трансакции споредено со истиот период од 2023 година. Во рамките на овие податоци, се истакнува податокот дека граѓаните извршиле 65% од вкупниот број електронски иницирани платни налози преку мобилните платежни апликации, што покажува дека мобилните апликации за плаќање стануваат сѐ попопуларни, бидејќи нудат побрзи и поедноставни решенија за  иницирање на платежните трансакции.

Податоците од доменот на платежната статистика за третиот квартал од 2024 година, освен што ги опфаќаат платежните трансакции на граѓаните во земјата, вклучуваат и податоци за платежните трансакции на правните лица во земјата. За повеќе информации, податоците се достапни на следнава врска.

Продолжи со читање

Банки

Стопанска банка ќе финансира 11 нови проекти за подобрување на условите во општеството за лицата со попреченост

Објавено

пред 4 дена

на

На денот кога го прослави јубилејниот 80. роденден, Стопанска банка ги објави добитниците на нови 11 грантови за асоцијации на лица со пречки во развојот како дел од шестото издание на општествено-одговорната кампања „Сонуваме.Менуваме“. Оваа долгогодишна кампања на Банката е наменета за подигнување на јавната свест за поголема инклузија на лицата со попреченост и градење подобро општество за сите.

Доделените грантови се во вкупна вредност од 30.000 евра и се наменети за реализација на различни проекти со кои се подобруваат и олеснуваат условите во општеството за лицата со попреченост. Стопанска банка, како и во годините претходно, објави јавен повик до сите асоцијации, училишта и здруженија на лица со попреченост, при што пристигнаа 26 барања.

Специјална комисија на Банката ги оценуваше сите пристигнати барања, по што избра 11 проекти кои ќе бидат реализирани во следните месеци со финансиска поддршка на Стопанска банка и со кои значително ќе се подобрат условите за секојдневна дружба, социјализација и едукација на децата со пречки во развојот низ земјата. Добитниците на грантовите и нивните проекти се објавени на веб-страницата на Стопанска банка. Преку платформата „Сонуваме.Менуваме“, во оваа и претходните години, Стопанска банка има инвестирани над 115.000 евра за реализација на повеќе од 60 инклузивни проекти.

Во рамки на шестото издание на „Сонуваме.Менуваме“ вчера се реализираа и две прикажувања на музичко-театарскиот спектакл „Необичен ден“ во кој главните ликови се омилените јунаци од „5+ Фамилија“ заедно со деца со попреченост. Со впечатлива игра на актерите и нивните пријателчиња со попреченост, колоритни костими, одлична музика и спектакуларни визуелно-сценски елементи, учесниците во „Необичен ден“ пред многубројната публика уште еднаш ја пренесоа пораката дека сите заедно треба да влијаеме на менување на свеста за значењето на инклузијата, со што ќе создаваме свет без предрасуди и поделби.

Претставата „Необичен ден“, зад која стојат Стопанска банка во соработка со ОXО продукција,  ќе се прикажува во Македонскиот народен театар (МНТ) и во јануари.

Продолжи со читање

Банки

Дигитална зона 24/7 и нов современ изглед доби Филијалата на Комерцијална банка во Струмица

Објавено

пред 7 дена

на

Филијалата на Комерцијална банка во Струмица доби нов современ изглед и дигитална зона 24/7, со што на клиентите ќе им обезбеди уште поголемо корисничко задоволство преку модерни технологии и пријатен амбиент.

Реновираната филијала во Струмица е дизајнирана за да обезбеди поефикасни и побрзи банкарски услуги во секое време.

На огромно задоволство на Комерцијална банка, на клиентите им се нудат следните услуги: 

  • Банкарство 24/7 преку банкомати за уплата и исплата на готовина и дигитални киосци.
  • Банкомат приспособен за користење од лица со посебни потреби.
  • Брза и комплетна услуга од стручни и искусни банкарски службеници.
  • Бесплатна обука за користење електронско и мобилно банкарство.
  • Персонализирано банкарство за паметни финансиски одлуки.

Дигиталната зона на Филијалата е опремена со два банкомати, од кои едниот овозможува уплата и подигање готовина, како и со дигитален киоск, кој е современо решение за плаќање сметки за јавни услуги (ЕВН, Телеком, А1, БЕГ и Телекабел) без провизија, без посета на шалтер и со картичка од која било банка. На дигиталниот киоск може да се испечати и извод од платежна сметка на физичко лице за која има претплата на Интернет банка. Влезот во дигиталната зона 24/7 е овозможен со сите банкарски картички.

Во Филијала Струмица клиентите на шалтерите ги имаат на располагање стандардните банкарски производи и услуги, како што се отворање платежна сметка во денари или во девизи, плаќање во земјата и во странство, брз трансфер на пари, менувачко работење, кредитни и депозитни производи, можност за купување удели во инвестициски и пензиски фондови и осигурителни полиси, како и e-commerce услуги. Шалтерите во Филијалата се отворени од понеделник до петок од 8 до 16 часот и во сабота од 9 до 12 часот.

Филијалата на Комерцијална банка во Струмица останува посветена на потребите на граѓаните и на компаниите во овој економски значаен и динамичен регион. Со понудата на ефикасни и модерни финансиски решенија Комерцијална банка има за цел да го поддржи економскиот раст и да остане доверлив партнер на клиентите во Струмичкиот регион.

Продолжи со читање

Популарно