Во време кога корпоративната одговорност сè повеќе се сведува на зборови и кампањи, Flex Group избра да зборува со дела. Во месецот посветен на женското здравје, групацијата обезбедува бесплатни превентивни прегледи на дојка за сите свои вработени жени.

Flex Group, која ги обединува Flex Credit, Zemi Pari, Flex Broker, NAN и Flex Pay, денес брои речиси 400 вработени, од кои над 90% се жени. Со оваа иницијатива, групацијата испраќа силна порака дека грижата за вработените започнува со нивното здравје, како физичко, така и ментално. Наместо да чекаат институционални решенија или масовни акции, Flex Group ја презема одговорноста да овозможи превенција таму каде што може да направи вистинска разлика, на работното место.

„Во групации каде што жените се срцето на секојдневното функционирање, ваквите чекори не се само социјално одговорни, туку се и нужни. Превенцијата не смее да биде привилегија“, вели Јоана Спасовска, генерален директор на Flex Credit.

Во услови кога податоците за доцна дијагностицирање на рак на дојка во Македонија сè уште се загрижувачки, иницијативи како оваа се пример за тоа како приватниот сектор може да биде двигател на позитивни промени. Без многу бучава, но со искрена грижа и конкретни мерки.

Шведска планира до средината на 2026 година да воведе можност за офлајн плаќања со картички, што ќе им овозможи на граѓаните да извршуваат трансакции и без интернет конекција.

Иницијативата, предводена од Шведската централна банка – Риксбанк е резултат на постигнат договор со водечките даватели на платежни услуги за користење на физички картички и ПИН кодови за основни купувања, како што се храна и лекови, дури и во услови на прекин на комуникациската инфраструктура.

Според гувернерот на Риксбанк, Ерик Тедин, ова претставува „важна пресвртница во подготовките за потенцијални безбедносни закани и зајакнување на стабилноста на платежниот систем“.

Овој потег е дел од пошироката национална стратегија за отпорност на кризи и вонредни ситуации, особено во контекст на зголемените геополитички ризици и загриженоста за можни саботажи на дигиталната инфраструктура.

Иницијативата на Шведска веќе наидува на поддршка од соседните земји како Финска, Норвешка, Данска и Естонија, кои најавија слични планови за заштита на своите платежни системи.

Компанијата Visa истакнува дека офлајн плаќањата во други европски држави покажале висока ефикасност и стабилност дури и за време на големи интернет прекини, со што се потврдува потребата за диверзификација на платежната инфраструктура.

Оваа мерка се очекува да придонесе за зголемена доверба на потрошувачите и стабилност на финансиските текови, а истовремено претставува пример за балансирање на дигиталниот напредок со сигурноста и достапноста на основните финансиски услуги.

САД најавија дека од 1 јануари 2026 година ќе воведат царини од 107 проценти на италијанската паста, со што еден од најважните сектори на италијанскиот извоз би можел сериозно да биде загрозен.

На веќе постојната царина од 15 проценти на пастата од Италија, американската администрација планира да додаде уште 91,74 проценти, повикувајќи се на обвинувања за дампинг против италијанските производители La Molisana и Garofalo, кои веќе беа предмет на истрага од страна на Министерството за трговија на САД, пишува италијанскиот весник Il Sole 24 Ore.

Американските власти вакви истраги спроведуваат речиси секоја година, на барање на домашните производители на паста, но досега дополнителните царини ретко кога надминувале два проценти. Овојпат, за периодот меѓу 1 јули 2023 и 30 јуни 2024 година, се утврдени просечни маржи на дампинг од речиси 92 проценти.

Покрај La Molisana и Garofalo, во извештајот на Министерството за трговија на САД се наведени и други италијански компании, вклучувајќи ги Agritalia, Barilla и уште неколку други. Новите царини ќе се однесуваат на сите нив, освен делумно на оние кои веќе имаат производство во САД, како Barilla, појаснува италијанскиот весник.

Италијанското Министерство за надворешни работи соопшти дека внимателно го следи случајот, додека министерот за земјоделство Франческо Лолобриџида ја оцени одлуката на САД како „хиперпротекционистичка мерка без никакво оправдување“.

Италијанската прехранбена индустрија годишно произведува над четири милиони тони паста, од кои дури 60 проценти се извезуваат. Само пазарот во САД вреди околу 700 милиони долари годишно, додека вкупниот годишен приход на секторот изнесува 8,7 милијарди евра.

Унијата на производители на храна во Италија ги нарече најавените царини „навреда за производ кој го симболизира италијанскиот идентитет“, оценувајќи дека станува збор за политичка, а не техничка одлука. „Оваа одлука на Министерството за трговија на САД е најстрога досега и длабоко нè погоди и разочара“, соопштија од Унијата.

Италијанската земјоделска организација Coldiretti порача дека царината од 107 проценти ќе ја удвои цената на чинијата паста за американските потрошувачи и ќе ги отвори вратите за лажни италијански производи. Таа ја повика италијанската влада и Европската Унија да преземат итни мерки за заштита на производот што е симбол на медитеранската исхрана, како и за зачувување на квалитетот, работните места и угледот на целиот агро-прехранбен сектор во Италија.