Универзална Инвестициона Банка АД Скопје (УНИБанка) го заокружи првиот квартал од 2025 година со позитивни финансиски резултати, потврдувајќи го стабилниот тренд на раст и успешна реализација на планираните банкарски активности.

Во периодот јануари–март 2025 година, Банката оствари вкупни приходи од 595 милиони денари, што претставува зголемување од 3,1% во однос на истиот период од 2024 година. Нето-добивката на Банката за овој квартал изнесува 145 милиони денари, при што приходите од камати остануваат најзначаен извор на приходи, со учество од 65,6% во структурата. Каматните приходи се зголемени за 3% споредбено со претходната година, а најголем дел од нив произлегуваат од кредитирањето на секторот население, што укажува на зголемената ориентација на Банката кон поддршка на домаќинствата.

Од друга страна, вкупните расходи се намалени за 8,4% и изнесуваат 450 милиони денари, главно поради пониски издвоени средства за зајакнување на кредитните резервации, што дополнително придонесува за подобрување на финансискиот резултат.

УНИБанка и понатаму останува целосно посветена на подобрување на корисничкото искуство преку дигитализација и развој на иновативни банкарски производи. Дигиталните решенија обезбедуваат побрз, полесен и побезбеден пристап до банкарските услуги, што истовремено води и кон зголемена ефикасност во работењето на Банката.

Иако надворешните економски услови се и натаму обременети со геополитички ризици и неизвесности – особено поради тековните воени конфликти кои влијаат на глобалните енергетски и прехранбени пазари – УНИБанка останува фокусирана на одржување на својата ликвидна и солвентна позиција, како и на континуирана поддршка на клиентите и заштита на интересите на сите засегнати страни.

Во однос на сметководствените политики и методологии за вреднување, во првиот квартал од 2025 година не се евидентирани промени.

Со стабилен финансиски резултат и стратегиска ориентација кон иновации и дигитален развој, УНИБанка ги поставува темелите за понатамошен одржлив раст и сигурна поддршка на реалниот сектор и домаќинствата.

Исполнување на планот и очекувања за претстојниот период

Во 2025 година окружувањето во коешто делуваше банката, се одликуваше со постепена стабилизација на ценовниот раст и поволен девизен пазар, но и понатаму постојат ризици и неизвесност, главно поврзани со надворешното окружување. Во однос на ризиците од надворешното окружување, од една страна се согледуваат надолни ризици главно поврзани со постојаните геополитички тензии, додека од друга страна, се согледуваат и поволни ризици, коишто претпоставуваат побрзи глобални структурни промени и поволни влијанија од новите технологии, кои ќе ја зголемат продуктивноста и глобалниот раст.

Очекувано и во текот на првиот квартал од 2025 година, Банката ја оставруваше својата деловна активност во променливи макроекономски услови и ги преземе сите неопходни мерки и активности за прилагодување на своето работење, пред се водејќи сметка за одржување на квалитетот на кредитното портфолио и изнаоѓање на флексибилни решенија согласно потребите и барањата на клиентите.

Заклучно со првиот квартал од 2025 година, нето активата на банката е над планираната.

Анализата на структурата на пасивата на билансот на состојба на 31.03.2025 година и нејзината споредба со планираната укажуваат на надминување на планираните извори од финансискиот сектор за 16,2%, како и повеќе привлечени извори на средства, по основ на кредитни линии, кои значително ги надминуваат планираните.

УНИБанка има за цел во текот на 2025 година да го зголеми бројот на дигитални корисници и клиенти, кои во пракса ќе ги почувствуваат ефектите од намалувањето на трошоците во нивното работење. Се планира да се воведат нови иновативни мобилни банкарски решенија со кои уште повеќе ќе се овозможи персонализирано корисничко искуство и поголемо задоволство при реализацијата на банкарските операции.

Стратегијата на УНИБанка за 2025 година ќе биде фокусирана на неколку клучни цели, а тоа е продолжување на растот на активата и на пазарниот дел, со повисоко ниво на ризик во портфолиото и повисоко ниво на РОЕ.

Воедно, поттикнувањето на позитивни промени во локалната заедница, грижата за животната средина, поддршката на спортот и културата, поттикнувањето солидарност, инклузија и во 2025 година ќе бидат високо на листата на  приоритети на банката.