Додека глобалните берзи вртоглаво паѓаат поради продлабочувањето на конфликтот на Блискиот Исток, акциите на „Nvidia“, највредната компанија за чипови за вештачка интелигенција, паднаа за речиси 20% од рекордното високо ниво од октомври 2025 година.

Овој пад ја доведе компанијата на најниското ниво на коефициентот цена-заработка (PE) по акција од почетокот на 2019 година односно пред „ChatGPT“ да го започне бумот на вештачката интелигенција.

Причини за слабеењето се глобалните несигурности, особено ескалацијата на конфликтот на Блискиот Исток, кој влијае пред се на цените на енергенсите и инфлацијата, како и стравувањата дека зголемените трошоци за инфраструктура за ВИ кај „Microsoft“, „Alphabet“ и „Amazon“ ќе им биде потребно подолго време за да се исплатат.

И покрај падот на акциите и зголемените ризици, „Nvidia“ и понатаму забележува високи бруто маржи од 75% и аналитичарите ја зголемуваат прогнозата за идниот раст на заработката. Според инвеститорите, сегашната ниска PE проценка може да укажува на можност за купување, но истата е поврзана со висок ризик и пазарна неизвесност.

Сегашниот коефициентот цена-заработка (PE) по акција на „Nvidia“ е понизок од просекот на „S&P 500“, кој изнесува околу 20, што е ретка ситуација за компанија со брз раст на приходите и профитот.

Американскиот долар се движи близу до 10-месечниот максимум, забележувајќи значителен месечен пораст, поради загриженоста на инвеститорите од продолжувањето на конфликтот на Блискиот Исток. Зголемените напади во регионот ја зголемија цената на суровата нафта и го засилија статусот на доларот како безбедно засолниште.

Јенот се движеше близу клучното ниво од 160 јени за долар, откако го достигна најслабото ниво од јули 2024 година, кога Токио последен пат интервенираше за да ја зајакне валутата. Еврото забележа ограничена поддршка од очекувањата за ново зголемување на каматните стапки од Европската централна банка. Австралискиот долар послаб за 0,3% и достигна индекс од 0,6851 американски долари и бележи месечен пад од 3,8%, што претставува негов најсилен пад од декември 2024 година. Новозеландскиот долар ослабе за 0,4% на 0,57275 американски долари, што претставува месечно намалување од 4,4%.

Доларот има корист од својот статус на безбедно засолниште од почетокот на март, при што повисоките цени на нафтата им штетат на Јапонија и на Еврозоната, но ги изолираат САД како нето извозник на сурова нафта.

Пазарите внимателно ја следат неделната статистика за пазарот на трудот во САД, чиј исход може да влијае на понатамошната монетарна политика на Федералните резерви. Аналитичарите предупредуваат дека ситуацијата на Блискиот Исток и понатаму го обликува глобалниот девизен пазар, а волатилноста останува висока.

Геополитичките тензии на Блискиот Исток повторно ги вознемирија глобалните пазари, при што цената на фјучерсите за сурова нафта „Брент“ се искачија на околу 115 долари за барел. Само во текот на март цената на нафтата бележи раст од речиси 59%, што би претставувало еден од најсилните месечни скокови во последните децении.

Нестабилноста е поврзана со ескалацијата на конфликтите во регионот, како и со зголемените ризици за глобалните транспортни рути за енергенси. Дополнителна загриженост предизвикаа нападите на јеменските Хути врз Израел, што отвора можност за нарушување на бродскиот сообраќај низ Баб ел-Мандеб – една од клучните точки за транзит на нафта покрај Ормуски теснец.

Во меѓувреме, американскиот претседател Доналд Трамп изјави дека Иран дозволил премин на дополнителни танкери низ Ормускиот теснец, што делумно ги намали стравувањата од целосно блокирање на оваа клучна трговска рута.

Сепак, дипломатските напори за смирување на ситуацијата остануваат неизвесни. И покрај најавите за можни разговори меѓу САД и Иран, во регионот продолжува военото засилување, при што според извештаи во областа се распоредени повеќе од 50.000 американски војници.

Аналитичарите предупредуваат дека продолжената нестабилност може дополнително да ги наруши глобалните синџири на снабдување со енергенси. Фјучерсите за сурова нафта „Брент“ и натаму укажуваат на високи цени, со прогнози над 100 долари за барел во текот на летните месеци.