Дводневната регионална конференција Infintech 2025, која ги обединува водечките експерти од банкарскиот, технолошкиот и телекомуникацискиот сектор, се одржува денес и утре во Тиват.

Дигиталната трансформација, вештачката интелигенција и новите трендови во финансиските услуги се темите за кои ќе се зборува во текот на девет панели. Директорот на црногорската ИТ компанија Логате, Ивица Татар, кој е организатор на конференцијата, рече дека Infintech произлезе од доверба кон луѓето и дека за кратко време успеа да се позиционира меѓу настаните кои ги поместуваат границите на информираноста.

„И оваа година со нас се препознатливите луѓе: иноватори, експерти и лидери од нашата земја, регионот и странство. Нивното присуство е показател дека Infintech е место на кое се среќаваат големите. Среќен сум што сега сите знаат, и дека повеќе не мораме никому да објаснуваме што е Infintech и кој е Логате. Ќе продолжиме напорно да работиме, да ги слушаме вашите сугестии и да доведуваме луѓе од кои сакате да слушнете и да научите нешто ново“, порача Татар.

Визијата за економија која се базира на иновации, знаење и одржлив раст е идеја која Infintech ја споделува и со Стопанската комора на Црна Гора.

„Дигиталната трансформација не е веќе прашање на избор, туку прашање на опстанок и конкурентност. Таа го менува начинот на кој работиме, управуваме со капиталот, комуницираме со пазарот и градиме односи на доверба со клиентите“, рече претседателката на Столанската комора на Црна Гора, Нина Дракиќ, во воведното обраќање.

Таа додаде дека дигиталната трансформација не е само прашање на технологија, туку и на култура, лидерство и спремност за промени. „Финтек секторот, чијашто анализа на трендови и правци се разгледува во текот на конференцијата, има огромен потенцијал за црногорската економија. Дигиталните иновации ги намалуваат трошоците, забрзуваат процесите, ја зголемуваат транспарентноста и овозможуваат пристап до пазари кои досега беа недостапни. Во тоа е нивната вистинска сила – тие ја демократизираат економијата, правејќи ја достапна и правична“, истакна Дракиќ.

Црна Гора неодамна се приклучи на SEPA, што за финтек компаниите отвора поголеми можности и директен пристап до европската платна инфраструктура на која може да се градат нови сервиси.

Вицегувернерката на Централната банка на Црна Гора, Зорица Калезиќ, ги претстави стратешките планови во кои финтек ќе игра важна улога.

„Централната банка на Црна Гора сака до крајот на 2026 година граѓаните да имаат искуство на плаќање еднакво како во Европската унија. Од 20 октомври, нашите DNS и RTGS системи ќе работат и за време на викенди и државни празници, што значи дополнителни 118 дена за обработка на плаќањата“, најави Калезиќ.

Конференцијата собира бројни регионални и меѓународни експерти кои во текот на два дена размменуваат искуства за дигитално вклучување на клиентите, сајбер безбедност, моментални плаќања и AI решенија во банкарството и продажбата.

Првиот ден на конференцијата е посветен на лидерство и дигитална трансформација, додека вториот ден ќе донесе дискусии за иднината на банкарството, вградени финансии и финтек иновации во регионот.

Под слоганот „Where decision makers connect“, Infintech 2025 во ја потврдува позицијата на Црна Гора како растечки центар за дијалог за иновации, технологија и финансии на иднината.

На конференцијата INFINTECH 2025, една од најочекуваните дискусии беше посветена на прашањето кое ја зафаќа целата финансиска индустрија во регионот – дали дигиталното онбордирање конечно преминува од идеја во реалност. Под модераторство на Данијела Вуксановиќ, од Addiko Bank Montenegro, панелот „Digital Onboarding – Reality or still a concept?“ обедини претставници од банкарскиот сектор, регулаторите и технолошките партнери, кои дискутираа за реалните чекори, предизвиците и иднината на дигиталното вклучување на клиентите.

Панелот го сочинуваа Владислав Василев, регионален менаџер за Западен Балкан во Evrotrust, Гордана Калезиќ, директорка на директоратот за спречување на перење пари и финансирање на тероризам во Централната банка на Црна Гора, и Драган Будиќ, потпретседател за глобални податоци и генерален менаџер за Србија во NCR Atleos.

“Дигиталното онбордирање”, според соговорниците, не е само технолошки проект, туку целосна трансформација на банкарскиот процес – од првиот контакт на клиентот со банката до склучување на договор. Владислав Василев го опиша процесот како „патување од нула до потпишан договор“, кое мора да биде едноставно, брзо и безбедно. Тој нагласи дека секоја интеракција со клиентот мора да гради доверба, бидејќи токму сигурноста и транспарентноста се основата на успешната дигитална идентификација.

Биометриската идентификација, дигиталниот потпис и напредните системи за верификација веќе се присутни во регионот, но нивната целосна примена зависи од усогласеноста со регулаторната рамка. Василев подвлече дека технологијата е подготвена, но клучното прашање е дали институциите и клиентите се подготвени да ја прифатат целосно.

Од аспект на регулаторот, Гордана Калезиќ од Централната банка на Црна Гора истакна дека дигитализацијата бара балансиран пристап – со јасна, но флексибилна инфраструктура на државно ниво. Таа потенцираше дека потребно е создавање доверливи структури кои ќе овозможат масовно прифаќање на дигиталниот потпис и електронските трансакции. Успехот, според неа, ќе зависи од тесната координација меѓу банките, технолошките компании и регулаторите, но и од континуирана едукација на граѓаните, бидејќи довербата е клучниот двигател на дигиталната економија.

Технолошката перспектива ја сподели Драган Будиќ од NCR Atleos, кој истакна дека решенијата базирани на вештачка интелигенција и биометрија веќе нудат високо ниво на безбедност и можност за елиминирање на најчестите ризици при идентификација. Сепак, тој предупреди дека технологијата сама по себе не е доволна без изградена култура на дигитална безбедност и доверба. „Корисниците треба да веруваат во дигиталниот потпис исто како во физичкиот документ,“ додаде Будиќ.

Панелот заврши со заклучок дека дигиталното онбордирање не е проект со краен рок, туку процес што постојано се развива. Регулаторите ја отвораат рамката, технолошките компании нудат решенија, а банките имаат обврска да ја едуцираат јавноста и да ја градат довербата. Како што беше истакнато, вистинската дигитална трансформација нема да се мери со бројот на имплементирани алатки, туку со тоа колку клиентот ќе се чувствува сигурно – дури и без физички потпис.

На INFINTECH 2025 оваа година се појави Сузан Вилијамс, поранешен hostage negotiator во Scotland Yard, која своето искуство од екстремни ситуации го претвори во практични лекции за подобра комуникација, водење со интегритет и постигнување резултати во работа со луѓето.

Вилијамс, позната по смиреноста и аналитичкиот пристап во преговори за живот или смрт, на конференцијата порача дека секој разговор е форма на преговор и клучно е да се знае како да се слуша соговорникот.

Смиреноста е првиот чекор кон успешен дијалог. Кога емоциите се високи, присебноста ја менува динамиката и гради доверба, а тоа е вредно и во бизнис средина за менаџери, претприемачи и вработени кои се соочуваат со предизвици и притисок.

Емпатијата е најмоќната алатка за влијание. Да го разбереш соговорникот не значи да се согласиш со него, туку да покажеш дека го слушаш. Во деловен контекст тоа значи да се ставиме во улогата на клиентот, колегата или партнерот, што создава врска и ја олеснува договореноста.

Подготовката е тивката победа пред разговорот. Успешните преговарачи се подготвуваат и анализираат сценарија пред самиот разговор. Во бизнис средина тоа значи дека секоја презентација, продажен состанок или интерен состанок бара јасна стратегија. Подготвеноста дава сигурност која инспирира доверба и го намалува стравот и неизвесноста.

Егото е најголемиот непријател на преговарачот. Преговарањето не е битка за тоа кој е во право, туку процес кон заедничко и одржливо решение што носи стабилност и разбирање за сите страни.

Вештината на слушање е потценета лидерска супермоќ. Во време на постојан шум, внимателното слушање или активно присуство е клучно за разбирање на вистинските мотиви зад зборовите. Најмногу вреди оној кој најдобро разбира, а разбирањето започнува со слушање.

Искуството на Сузан Вилијамс покажува дека преговарањето не е само деловна техника, туку животна вештина. Секојдневно преговараме со колеги, клиенти, партнери и со самите себе. Принципите што таа ги применувала во екстремни ситуации се применливи и во секојдневни ситуации: смири се пред да реагираш, подготви се пред да зборуваш и слушај пред да одлучиш.

Во секој преговор, луѓето не се против тебе, туку се за себе. Разбери го тоа и веќе си победил.