Управа за јавни приходи реагираше на написите во дел од медиумите во кои се тврди дека студентите се „на удар“ и дека им се бара плаќање данок за летна работа во Германија за изминатите пет години, нагласувајќи дека станува збор за погрешни толкувања.

Од УЈП појаснуваат дека не се воведуваат нови даночни обврски, ниту се бара исполнување на нешто што не е предвидено со закон. Напротив, активностите се насочени кон правилна и еднаква примена на даночните правила и поттикнување на доброволно пријавување на доходот, преку информирање и едукација на граѓаните.

Во таа насока, Управата информира дека веќе објавила повеќе појаснувачки материјали, како и дека во два наврати испратила персонализирани известувања до граѓаните кои во 2025 година оствариле доход во странство, меѓу кои и студенти со сезонска работа.

Од институцијата потенцираат дека никој не е „на удар“, туку станува збор за мерки за подигнување на свеста и за навремено исполнување на законските обврски. Дополнително, се нагласува дека не постои двојно оданочување, бидејќи тоа е регулирано со меѓународни договори.

Сепак, секој даночен резидент на Северна Македонија има обврска да го пријави доходот остварен во странство во својата даночна пријава, што е важно за остварување на правата пред институциите.

Според законските одредби, резидент е лице кое има постојано живеалиште во земјата или престојува повеќе од 183 дена во текот на една година. Тоа значи дека и студентите кои краткорочно работеле во странство спаѓаат во оваа категорија.

УЈП дополнува дека студентите кои работеле во Германија помалку од 183 дена се должни да го пријават доходот преку системот за е-даноци и да поднесат електронска пресметка најдоцна до 10-ти во месецот за претходниот месец. Данокот, по одобрување од УЈП, треба да се плати до 15-ти во месецот.

Во соопштението се наведува и дека, според достапните информации, данокот што бил задржан во Германија им бил вратен на студентите, па согласно договорот за избегнување на двојно оданочување, овој доход се оданочува во Северна Македонија.

Општина Карпош, во соработка со компанијата Таск-ХРС, започнува со реализација на бесплатни обуки за дигитална писменост и економска инклузија, како дел од годишната програма за еднакви можности меѓу жените и мажите.

Обуките стартуваат на 14 април 2026 година и се наменети за три категории граѓани: постари жители на Карпош, лица во социјален ризик и припадници на маргинализирани групи.

Наставата ќе се одржува секој вторник во просториите на основното училиште „Јан Амос Коменски“, со почеток во 18 часот. Секоја сесија ќе трае 90 минути, а целокупната програма ќе се реализира во период од 12 недели.

За учество, заинтересираните граѓани треба претходно да се пријават на телефонскиот број 071/376-080.

Од Општината посочуваат дека целта на обуките е да им се помогне на граѓаните полесно да се вклучат во дигиталниот свет преку стекнување практични вештини за користење паметни телефони, електронско банкарство, комуникациски апликации и социјални мрежи.

Во рамки на програмата ќе бидат опфатени и теми како основи на користење електронски уреди, безбедно пребарување на интернет, користење електронска пошта, пристап до јавни е-услуги, како и можности за дигитална економија и дополнителни приходи.

Пријавувањето за обуките е веќе отворено.

Италијанскиот министер за одбрана Гвидо Крозето упати сериозно предупредување за можен конфликт со Иран, нагласувајќи дека располага со „застрашувачки“ информации кои укажуваат на ескалација што би ја погодила цела Европа.

Во интервју за весникот „La Repubblica“, Крозето истакна дека заканата не е само воена, туку има и сериозни општествени и економски импликации.

„Поради природата на мојата работа имам увид во информации поради кои веќе не можам да спијам. Стравувам од тоа што може да се случи во наредните недели, како и од последиците врз економијата и секојдневниот живот“, изјави тој.

Министерот посочи дека Италија не била вклучена во клучните одлуки што довеле до сегашната напната ситуација и дека земјата не поддржува војна со Иран, нагласувајќи дека „никој не ја прашал за мислење“.

Покомплексен конфликт од Украина

Крозето предупреди дека евентуален конфликт со Иран би можел да биде подолг и посложен од војната во Украина, пред сè поради големината и силата на Иран.

„Иран е поголем, поброен и историски посилен од Украина, што го прави тежок противник“, изјави тој.

Иако не навлезе во детали, аналитичарите сметаат дека клучна точка на загриженост е Ормускиот теснец, од огромно значење за глобалната трговија со енергенси.

Во меѓувреме, американскиот претседател Доналд Трамп повторно го пролонгираше рокот што му го постави на Иран за отворање на теснецот овојпат до 6 април заканувајќи се со напади врз иранската енергетска инфраструктура.

Трамп изјави дека се воделе „директни и индиректни“ преговори со Техеран и повторно побара отворање на Ормускиот теснец, предупредувајќи на сериозни последици доколку не се постигне договор.

Од друга страна, Техеран ги негираше преговорите со САД, оценувајќи дека американските предлози, доставени преку посредници, се „претерани и неразумни“.

Кој е Крозето?

Гвидо Крозето е министер за одбрана на Италија од октомври 2022 година, во владата на премиерката Џорџа Мелони. Роден е во 1963 година во Кунео, а политичката кариера ја започнал во 1990-тите.

Бил пратеник во италијанскиот парламент во повеќе мандати, како и државен секретар во Министерството за одбрана од 2008 до 2011 година во владата на Силвио Берлускони.

Тој е и еден од коосновачите на партијата Браќа на Италија, а во периодот од 2014 до 2022 година беше претседател на италијанското здружение на одбранбената и безбедносната индустрија AIAD.