Бизнис

Награди за е-трговија: Ова се најдобрите за 2024 година!

Објавено

пред 1 година

на

13 март, 2025

Вчера, во хотел Мериот Скопје, се одржа свечената церемонија за доделување на македонските Награди за е-трговија 2024 – “E-commerce Awards 2024”, во организација на Асоцијацијата за е-трговија на Македонија. Овој престижен настан привлече голем број на гости, вклучувајќи членови на Асоцијацијата, поддржувачи, партнери, жири-комисијата на наградите и најуспешните е-трговци во земјата. Гала вечерта беше исполнета со богата програма, одлична атмосфера и прослава на достигнувањата во македонската е-трговија.

Оваа манифестација е значајна за македонската е-трговија, бидејќи ги препознава и наградува најдобрите практики, иновации и достигнувања во индустријата. Наградите претставуваат признание за посветеноста, иновациите и врвната услуга на е-трговците, додека воедно ги мотивираат да продолжат со унапредување на своите услуги. „E-commerce Awards 2024“ не е само избор – тоа е иницијатива што има за цел да го поттикне развојот на македонската е-трговија, да ги истакне најдобрите практики, да ја зголеми конкурентноста и да им даде глас на потрошувачите, кои преку своите гласови учествуваат во изборот на најдобрите е-продавници.

Оваа година, во рамки на „Наградите за е-трговија“ беа доделени 43 награди во 23 категории, препознавајќи ги најуспешните е-трговци според нивните постигнувања во различни области. Со над 200 номинирани е-трговци, гласовите на потрошувачите имаа клучна улога во изборот на победниците. Изборот се реализираше преку процес од неколку фази кој вклучуваше гласање од јавноста (кое учестуваше со 60% во конечниот резултат) и гласање од стручната жири-комисија (40% од конечниот резултат). Категоријата „Најпопуларна е-продавница“ беше единствената во која победникот беше избран исклучиво врз основа на гласовите од јавноста, што ја прави оваа награда вистински одраз на довербата и задоволството на онлајн купувачите.

Во продолжение се претставени победниците по категории.

Најдобри е-продавници по сектори:

● Е-продавница за облека, обувки и модни додатоци: fashiongroup.com.mk
● Е-продавница за бела техника и електроника: neptun.mk
● Е-продавница за храна и пијалоци: korpa.mk
● Е-продавница за туристички услуги: jk.mk
● Е-продавница за здравје, нега и убавина:

Прво место: zegin.com.mk
Второ место: coslovemetics.mk
Трето место: fashiongroup.com.mk

● Е-продавница за дом, градина, мебел и канцелариски материјали: ananas.mk
● Е-продавница за бебешка и детска облека, опрема и играчки: bebehome.mk
● Е-продавница за услуги:

Прво место: telekom.mk
Второ место: a1.mk
Трето место: evnonline.mk

● Е-продавница за уметност, култура, настани и едукација: literatura.mk
● Маркетплејс и мулти е-продавница:

Прво место: ananas.mk
Второ место: korpa.mk
Трето место: delimano.com.mk

● Е-огласник: pazar3.mk

Најдобри е-трговци во одбрани аспекти на онлајн продавање:

● Е-трговец со најдобро искуство за е-плаќање: telekom.mk
● Е-трговец со најдобра достава:

Прво место: ananas.mk
Второ место: korpa.mk
Трето место: paket.mk

● Е-трговец со најдобра грижа за корисници:

Прво место: telekom.mk
Второ место: ananas.mk
Трето место: a1.mk

● Е-трговец со најдобро присуство на социјални медиуми:

Прво место: ananas.mk
Второ место: fashiongroup.com.mk
Трето место: coslovemetics.mk

● Најдобра веб-страница за плаќање на сметки: evnonline.mk
● Мобилна апликација за е-трговија на годината: telekom.mk
● Најдобра е-продавница со меѓународна продажба: svetotnabibi.mk
● Најдобар верификуван е-трговец: fashiongroup.com.mk
● Најдобра е-продавница основана од жена:

Прво место: coslovemetics.mk
Второ место: smartliving.mk
Трето место: vitalia.com.mk

Шампиони во е-трговија:
● Најпопуларна е-продавница:

Прво место: ananas.mk
Второ место: coslovemetics.mk
Трето место: telekom.mk

● Најдобра новоотворена е-продавница: formanova.com.mk
● Е-трговец на годината:

Прво место: ananas.mk
Второ место: telekom.mk
Трето место: fashiongroup.com.mk

На свечената церемонија, на победниците им беа врачени престижни статуетки како признание за нивната извонредност во е-трговијата, како и дигитални беџови што можат да ги истакнат на своите е-продавници, за дополнително зајакнување на довербата кај купувачите. Победниците се објавени и на официјалната веб-страница на натпреварот: https://ecommerceawards.mk/pobednici/.

Наградите за е-трговија оваа година се организираа со поддршка на PRIME партнерите –ИУТЕ и Mybox, како и други реномирани партнери од приватниот сектор, кои заеднички придонесуваат за развојот на е-трговијата во Македонија.

Асоцијацијата за е-трговија на Макеоднија и понатаму ќе продолжи да работи на унапредување на секторот, промовирање на дигиталната трансформација и поддршка на е-трговците во нивниот раст и развој.

Следно

Македонската компанија Panteleon GS започна да работи со нов американски клиент, кој е во потрага по генерален директор со познавање на транспортната индустрија

Не пропуштајте

ГРАНД АУТО со поддршка за Фудбалската федерација на Македонија

Бизнис

Горивата поевтинуваат: Дизелот за 8 денари, бензините за 4 денари

Објавено

пред 5 часа

на

10 август, 2026

Од полноќ горивата во Македонија ќе се продаваат по пониски цени, откако Регулаторната комисија за енергетика (РКЕ) донесе одлука за намалување на малопродажните цени на нафтените деривати во просек за 5,81 отсто во однос на претходната одлука од 4 август.

Од 00:01 часот на 11 август, ЕУРОСУПЕР БС-95 ќе чини 87 денари за литар, додека ЕУРОСУПЕР БС-98 ќе се продава по цена од 89 денари за литар. Цената на ЕУРОДИЗЕЛ БС ќе изнесува 91,50 денари за литар, а екстра лесното масло за домаќинство 92,50 денари за литар. Мазутот М-1 НС ќе чини 43,538 денари за килограм.

Со новата одлука, двата вида бензин поевтинуваат за по 4 денари за литар, дизелот за 8 денари за литар, а екстра лесното масло за 6 денари за литар. Цената на мазутот се намалува за 2,881 денари за килограм.

Од РКЕ информираат дека референтните цени на нафтените деривати на светските пазари во однос на претходната пресметка бележат пад. Кај бензините намалувањето изнесува во просек 6,186 отсто, кај дизелот 10,435 отсто, кај екстра лесното масло 8,138 отсто, а кај мазутот 7,151 отсто. Истовремено, курсот на денарот во однос на доларот е понизок за 1,0313 отсто.

Од Комисијата нагласуваат дека утврдените цени се максимални, а трговците можат да ги продаваат горивата и по пониски цени.

Продолжи со читање

Бизнис

Владата усвои листа со 41 предлог-проект за јавни инвестиции

Објавено

пред 6 часа

на

10 август, 2026

Владата ја усвои првата конечна приоритетна листа на предлог-проекти за јавни инвестиции, на која се наоѓаат вкупно 41 проект, соопшти Министерството за финансии.

Листата е подготвена на предлог на Министерството за финансии и Комитетот за јавни инвестиции, а ги опфаќа проектните идеи доставени од институциите, кои претходно биле проверени, оценети и одобрени согласно утврдената постапка.

Станува збор за проекти со средна и голема вредност, односно над пет милиони евра, од областите на инфраструктурата, образованието, здравството, енергетиката, дигитализацијата, земјоделството и водостопанството.

Од Министерството посочуваат дека при оценувањето биле земени предвид комплетноста на документацијата, квалитетот на податоците, стратешката релевантност, како и подготвеноста на проектите за понатамошна разработка.

Усвоената листа ќе претставува основа за дефинирање на новите капитални инвестиции во буџетскиот процес за 2027 година, како и во инвестициските програми на јавните претпријатија и акционерските друштва во државна сопственост.

Од Министерството нагласуваат дека вклучувањето на одреден проект на листата не значи автоматски дека тој ќе биде финансиран или реализиран. Одлуките за финансирање ќе се носат во рамки на капиталното буџетирање, согласно расположливите средства, степенот на подготвеност на проектот и приоритетите на Владата за соодветната фискална година.

Новото управување со јавните инвестиции произлегува од Законот за буџети и од Уредбата за управување со јавни инвестиции, а е дел и од Реформската агенда 2024–2027. Комитетот за јавни инвестиции беше формиран минатата година, а првиот состанок го одржа во април годинава.

Целта на новиот систем, според Министерството за финансии, е одлуките за капиталните проекти над пет милиони евра да се носат на потранспарентен и посистематски начин, а идните буџети полесно да се планираат.

Продолжи со читање

Бизнис

Германската индустрија се враќа во игра: Производството повторно расте и ги надмина очекувањата на пазарот

Објавено

пред 3 дена

на

7 август, 2026

Германската индустрија забележа подобри резултати од очекувањата во јуни, што претставува дополнителен сигнал за стабилизирање на најголемата европска економија во вториот квартал од годинава.

Според податоците на германскиот Федерален завод за статистика, индустриското производство во јуни пораснало за 0,2% на месечно ниво, надминувајќи ги очекувањата на аналитичарите, кои прогнозираа раст од 0,1%. Истовремено, индустриските нарачки се зголемиле за 3,1%, иако растот главно се должи на неколку големи поединечни нарачки.

Позитивни сигнали пристигнаа и од надворешната трговија. Германскиот извоз во јуни се зголемил за 0,9% во однос на претходниот месец, значително над очекувањата од 0,2%, додека увозот пораснал за 4,4%.

Во првата половина од 2026 година, Германија извезувала 3,7% повеќе стоки во споредба со истиот период лани, а увозот е повисок за 4,4%. Извозот кон земјите членки на Европската Унија пораснал за 1,3%, додека испораките кон земјите надвор од ЕУ се зголемиле за 0,3%. Наспроти тоа, извозот кон САД бележи значителен пад од 14,2% на месечно ниво.

Податоците укажуваат дека германската индустрија постепено закрепнува, иако аналитичарите предупредуваат дека одржливоста на растот ќе зависи од идната побарувачка и глобалните економски услови.

Продолжи со читање