Цената на златото минатата недела ја проби историската граница од 5.600 долари за унца, забележувајќи раст од над 70% во последната година. Рекордот се поттикнува од слабеење на доларот, повисока од очекуваната инфлација, очекувања за намалување на каматните стапки од Федералните резерви и купувања на злато од страна на централните банки ширум светот.

Златото, како традиционално „безбедно засолниште“, привлече големо внимание поради зголемените геополитички тензии околу случувањата со Гренланд и затегнатиот однос помеѓу САД и Европа, како и можниот сериозен конфликт на Блискиот Исток, каде што Иран се соочуваше со граѓанска војна, но и инвазија од САД и Израел.

Сепак, тензиите стивнаа помеѓу САД и Европа, но и на Блискиот Исток, по говорот на американскиот претседател Доналд Трамп на светскиот економски форум во Давос, каде што ги увери присутните дека тој секогаш се заложува на мирен начин и со преговори да ги реши превирањата.

Дополнително, олеснување за геополитичката состојба беше и изјавата дека војната во Украина е во завршна фаза и дека можно е наскоро да се постигне примирје помеѓу Русија и Украина.

Промената на геополитичките сигнали, предизвикаа драстичен пад на вредноста на инвестициското злато, кој експертите го оценуваат како очекувана корекција по забрзаниот раст и создавањето на таканаречен „балон“ на цената.

Тука многумина си го поставија прашањето: „До каде ќе оди цената на златото, дали ќе продолжи да паѓа или повторно ќе има нагорен тренд?“

Бојан Цветановски, член на Извршниот Одбор на Здружението на финансиски пазари (АЦИ), оценува дека во краток рок можни се дополнителни корекции, но среднорочно и долгорочно златото ја задржува својата атрактивност како инвестиција во време на финансиска и геополитичка неизвесност.

Американскиот долар падна на најниско ниво за четири години, откако претседателот на САД, Доналд Трамп, ги минимизираше загриженостите за слабеењето на валутата, оценувајќи дека послабиот долар е „одличен за бизнисот на Америка“.

По неговиот говор во Ајова, доларот ослабе за 1,3% во однос на кошницата од главните светски валути, што претставува еден од најизразените дневни падови во последниот период. Во утринските часови, американската валута продолжи со благ надолен тренд, со дополнителен пад од 0,2%.

Изјавите на Трамп ги поттикнаа инвеститорите да се пренасочат кон таканаречените „безбедни засолништа“, при што порасна побарувачката за златото, како и за швајцарскиот франк, кои традиционално се сметаат за стабилни во услови на валутна и политичка неизвесност.

„Послабиот долар е добар за извозот и за американските компании“, истакна Трамп, додавајќи дека актуелната вредност на валутата е во согласност со економските интереси на Соединетите Американски Држави.

Вредноста на доларот падна за 10% во последната година, што има повеќекратни последици, предупредува брокерот Стив Сосник.

„Послабиот долар им помага на компаниите што заработуваат во странски валути, но увозот станува поскап, па затоа се можни инфлаторни притисоци во Соединетите Држави“, забележа Сосник.

Аналитичарите оценуваат дека ваквата реторика може да ја зголеми волатилноста на девизните пазари во наредниот период, особено доколку продолжат сигналите за толеранција кон слаб долар од страна на американската администрација. Во фокусот на пазарите остануваат и идните чекори на Федералните резерви, како и глобалните инфлаторни и геополитички ризици.

„Deutsche Bank“ се приклучи на водечките финансиски институции на Волстрит кои ги ревидираат нагоре своите прогнози за цената на златото, во услови на силен и продолжен раст на овој благороден метал.

Германската банка објави дека ја зголемува својата прогноза за цената на златото на 6.000 долари за унца до крајот на годината, што претставува раст од 28% во однос на претходната проценка. Со ова, „Deutsche Bank“ се изедначува со прогнозата на „Société Générale“, додека „Goldman Sachs“ и „Morgan Stanley“ исто така неодамна ги зголемија своите ценовни прогнози.

Според аналитичарите на „Deutsche Bank“, клучната поента не е само повисоката целна цена, туку причините зад растот на златото.

„Кои се историските лекции што можат да се научат од претходните зголемувања на цената на златото и дали денешните мотиви на инвеститорите се разликуваат од оние во минатото?“, прашува аналитичарот Мајкл Хсју од Сингапур. Аналитичарите посочуваат дека во две третини од случаите на нагло поскапување на златото, цената продолжила да расте во наредните 6 до 12 месеци.

Анализата покажува дека, за разлика од 1980-тите години, денешните двигатели на растот се структурни, а не привремени. Меѓу нив се издвојуваат: централните банки ја намалуваат изложеноста поради страв од замрзнување на странски средства, зголемена побарувачка за недоларски и реални средства, како и долгорочните проекции за раст на јавниот долг во голем број економии во светот.

Фјучерсите на златото во вторникот се тргуваа стабилно, околу 5.077 долари за унца, по импресивен раст од 83% во последните 52 недели.

Позитивниот став на „Deutsche Bank“ и ревидирање на очекувањата има и за среброто, за кое банката ја зголеми прогнозата за 71 проценти односно на 100 долари за унца. Аналитичарите наведуваат дека од декември е забележан нов инвестициски прилив и дека е можно суверените фондови или централните банки да започнале алокации во сребро, што не мора јавно да биде објавено.

Дополнителен поттик за побарувачката за сребро доаѓа од:

• напорите на Кина целосно да ги опфати со даноци офшор-инвестициите,
• планот на Централната банка на Индија да дозволи среброто да се користи како колатерал за кредити.

Иако фјучерсите на среброто во вторникот паднаа за 3%, цената на овој метал бележи раст од дури 262% на годишно ниво.

Пораката од аналичарите на „Deutsche Bank“ е дека структурно повисокиот геополитички ризик ќе продолжи да ги поддржува повисоките цени на суровините, а со тоа и златото и среброто кои се сметаат за сигурно прибежиште на инвеститорите за заштита на капиталот.