Растат инвестициите на ЕОС во преземање на нефункционални пласмани во нашата земја. Во последната финансиска година – 2023/24 групацијата преку својата локална компанија ЕОS Матрикс инвестираше над 5 милиони евра во преземање на ваков вид на пласмани. Преку овие инвестиции ЕОС Матрикс Македонија директно придонесува кон економскиот развој во земјата од причина што директно влијае кон закрепнување на нарушените релации во должничко-доверителските односи и помага кон подобрување на финансиската солвентност на македонските граѓани и компании.

Групацијата ЕОС, од која е дел и ЕОС Матрикс Македонија, со свои активности е присутна на пазарите во повеќе од 20 земји, а вработува 6.000 лица ширум Европа. За групацијата, инвестициите во нефункционални кредити (NPL) од 583,5 милиони евра во деловната 2023/24 година, беа значително под оние во исклучителната 2022/23 година. Сепак, како резултат на континуираните инвестиции, групацијата постигна раст на приходите од 2,1%, потврдувајќи ја оперативната ефикасност на процесите. За ЕОС Матрикс на македонскиот пазар, реализираниот раст е од големо значење, бидејќи е постигнат во турбулентни економски и општествени околности.

„Се наоѓаме во уште една предизвикувачка година, но нашите прогнози се оптимистични. Како што покажуваат бројките, нашата состојба продолжува да се подобрува без разлика на промените и шоковите кои ги доживува локалниот пазар. Оперативната ефикасност е стабилна, а нашите инвестиции растат и тоа е најважно да се одржи во континуитет. Од друга страна, дополнително нѐ мотивира тоа што заедно со нас растат и нашите клиентите и сѐ повеќе ја бараат нашата експертиза во специфични полиња. Во периодот пред нас ќе се фокусираме на усовршување на неколку нови алатки кои сакаме да ги претставиме на домашниот пазар, го прошируваме нашиот тим за управување со обезбедени побарувања и очекуваме одлични резултати на крајот од годината“, истакна д-р Катерина Бошевска генералната директорка на ЕОS во Македонија и Косово.

Покрај растот на инвестициите, ЕОС Матрикс Македонија го следи технолошкиот развој на својата групација, и исклучително тешките стандарди на индустријата во која припаѓа во европски рамки. Па така, инвестира во развој и креирање на нови алатки кои ќе придонесат кон унапредување на услугите. Во таа насока, од неодамна компанијата ја користи и алатката “ogGPT” за генеративна вештачка интелигенција, која покрај другите придобивки, на корисниците им нуди висока заштита на безбедноста на податоците. ЕОС Матрикс Македонија е единствена компанија во финансискиот сектор која го имплементираше меѓународниот стандард ISO 27701:2019 и работи согласно високите принципи на заштита што ги гарантира овој стандард, а кој исто така овозможува и проценка на ризиците и поголема контрола.

Компанијата има голема финансиска експертиза која ја применува и развива и на македонскиот пазар, а креира нови можности во финансискиот сектор нудејќи иновативни финансиски инструменти.

Групација Триглав постигна многу добри резултати во првата половина од оваа година.
Нејзиниот вкупен обем на деловно работење достигна 942,9 милиони евра, што е за 2
отсто помалку од минатата година, а земајќи го предвид ефектот од загубата на премијата поради укинување на дополнително здравствено осигурување во Словенија, забележа раст од 9 отсто. Оствари 89,5 милиони евра деловна добивка пред оданочување (12,1 милион евра во истиот период во 2023 година), додека нето деловниот резултат изнесува 75,4 милиони евра (11,4 милиони евра минатата година). За ова најмногу придонесе осигурителниот дел од деловното работење на сегментот Имот, а сите деловни сегменти на Групацијата работеа успешно. Работењето на Групацијата во доменот на штети беше релативно поволно во првата половина од годината, при што проценетите штети од природни масовни штетни настани не се разликуваат во голема мера од нивоата од претходните години. Групацијата, за првата половина од годинава проценува дека ќе го надмине планираниот годишен деловен резултат пред оданочување и предвидува дека ќе оствари меѓу 130 и 150 милиони евра. Групацијата и оваа година ја одржува финансиската стабилност и капитализација на соодветно ниво, доследно спроведува стратегија во насока на раст, развој и одржливи амбиции и се стреми да биде стабилна, сигурна и профитабилна инвестиција за инвеститорите.

ДЕЛОВЕН РЕЗУЛТАТ НА ГРУПАЦИЈАТА ТРИГЛАВ

Групацијата во првата половина од оваа година оствари деловен резултат пред оданочување од 89,5 милиони евра (2023: 12,1 милион евра), додека нето деловниот резултат изнесува 75,4 милиони евра (2023: 11,4 милиони евра). Матичната компанија на Групација Триглав, Заваровалница Триглав, оствари деловен резултат пред оданочување од 63,4 милиони евра (2023: 29,1 милион евра) и нето деловен резултат од 53,8 милиони евра (2023: 24,6 милиони евра). Претседателот на Управниот одбор на Заваровалница Триглав, Андреј Слапар, изјави: „По минатата година, кога еднократни настани влијаеа негативно на резултатите, најавивме, согласно нашата стратегија, нормализирање на работењето за оваа година. Задоволни сме што бевме многу успешни во ова во првата половина од годината, бидејќи по ветувачкиот прв квартал, успехот го повторивме и во вториот квартал. Сите деловни сегменти придонесоа за многу добри полугодишни резултати на Групација Триглав, но најголем придонес имаше осигурителната дејност во сегментот Имот.“

Групација Триглав, повеќе од две третини од полугодишниот резултат пред оданочување, т.е. 62,1 милион евра, оствари во доменот на осигурителната дејност, при што сегментот Имот оствари резултат од 52,2 милиони евра (2023: 20,3 милиони евра). На ова влијаеше зголемениот обем на осигурување на клиентите и растот на продажбата на меѓународните пазари врз основа на принципот на слободен проток на услуги (ФОС бизнис), а дополнително влијание имаа и досегашните зголемувања на премиските стапки и бројните мерки преземени во доменот на преземање ризици во осигурување. Во осигурителниот сектор, сегментот Живот оствари резултат од 9,8 милиони евра (2023: 5,6 милиони евра), додека сегментот Здравство, по минатогодишната загуба, годинава имаше позитивен резултат. Резултатот во инвестицискиот сегмент од работењето достигна 20,8 милиони евра (2023: 14,0 милиони евра), на што најмногу влијаеја зголемените приходи од камати. Неосигурителната дејност оствари резултат од 6,6
милиони евра (2023: 4,3 милиони евра), а нејзиниот раст доаѓа главно од управувањето со средствата на клиентите во заеднички инвестициски фондови и индивидуалното управување.

За работењето на Групација Триглав до крајот на годината, Претседателот на Управниот
одбор на Заваровалница Триглав, Андреј Слапар, рече: „Планиравме, Групација Триглав во 2024 година да постигне деловен резултат пред оданочување меѓу 100 и 120 милиони евра. По полугодието, проценуваме дека ќе го надминеме и ќе постигнеме меѓу 130 и 150 милиони евра. Притоа, ги зедовме предвид очекуваните деловни услови до крајот на годината, меѓу кои, најнеизвесни фактори се природните масовни штетни настани, кои што на годишна основа вообичаено се поинтензивни во вториот и третиот квартал. Поставивме амбициозни цели и нашиот тим во Триглав посветено работи на нивно успешно остварување, за што им благодарам многу“.

НАЈВАЖНИ ДЕЛОВНИ ИНДИКАТОРИ НА ГРУПАЦИЈАТА ВО ПРВАТА ПОЛОВИНА ОД 2024 ГОДИНА

Вкупниот деловен обем на Групација Триглав достигна 942,9 милиони евра, што е за 2 отсто помалку од минатата година. Но, ако се земе предвид ефектот од загубата на премијата поради укинување на дополнителното здравствено осигурување, обемот забележа раст од 9 проценти. Освен во Словенија, каде што обемот беше под влијание на споменатиот ефект, Групацијата ја зајакна премијата на повеќето други пазари во регионот Адриа (вкупен раст од 7 проценти) и во пошироката меѓународна средина (раст од 16 проценти). Групацијата продолжува успешно да го зајакнува уделот на премијата од пазарите надвор од Словенија. Ова учество се зголеми на 20,6 отсто (2023: 18,6 отсто), учеството на Словенија се намали на 57,9 отсто (2023: 63,3 отсто), додека уделот на меѓународното осигурување и реосигурување достигна 21,6 отсто (2023: 18,1 отсто).

Работењето во доменот на штети на Групацијата беше релативно поволно во првата половина од годината. Побарувањата остварени на ниво на Групација во вкупен износ од 287,3 милиони евра се намалени за 34% споредено со истиот период минатата година, при што се намалени во сите три сегменти на осигурување, но најзабележително во сегментот Здравје. Ова главно се должи на овогодинешното укинување на дополнителното здравствено осигурување во Словенија. Во првата половина од годината, проценетата вредност на штетите од природни масовни штетни настани изнесува 10,0 милиони евра, што не отстапува значително од нивото во претходните години. Оперативните расходи, заедно со другите поврзани расходи за услуги за
осигурување на Групација Триглав, се зголемени за 4 отсто, на 214,6 милиони евра. Во
согласност со активностите на Групацијата, најголемо учество имаат трошоците за работна сила, 45%, додека најголем раст од 18% имаат трошоците за обезбедување на осигурување. Последното е последица на зголемениот обем на работа на пазарите надвор од регионот Адриа и продажбата преку надворешни продажни канали.

Комбинираниот количник во сегментите Имот и Здравје во првата половина од годината изнесуваше поволни 90,6 отсто (2023: 102,0 отсто). Профитабилноста на новиот бизнис во сегментот Живот достигна 14,1 отсто (2023: 13,1 отсто). Останатите сеопфатни приходи изнесуваат 3,8 милиони евра (минатата година: 9,3 милиони евра). Годишниот принос на капиталот е 17,3 отсто (2,6 отсто во 2023), а порастот е пред сѐ резултат на повисокиот нето деловен резултат. Членот на Управниот одбор на Заваровалница Триглав, Урош Иванц, рече: “Нашите показатели се значително подобрени, споредено со претходниот период. Комбинираниот количник во сегментите Имот и Здравје е на поволно ниво, на што најмногу влијаеше намалениот штетен количник, како резултат на зголемениот обем на работење и бројните мерки, спроведени во делот на преземање и управување со ризици во осигурување.”

Вкупните средства под управување на Групацијата на крајот на првата половина од годината изнесуваат 5.329,3 милиони евра, што е за 10 отсто повеќе во однос на крајот на 2023 година. Компаниите на Групацијата управуваа со сопствени средства, со средства на осигурените лица кои го преземаат инвестицискиот ризик и финансиските вложувања од финансиски договори во износ од 3.572,1 милиони евра (5 отсто повеќе од крајот на 2023 година). Составот на ова портфолио е споредлив со состојбата на крајот на 2023 година. Профитабилноста на финансиските инвестиции на Групацијата, без инвестициите во корист на осигурениците кои го преземаат инвестицискиот ризик, се зголеми за 1,1 процентен поен во однос на минатата година и изнесува 3,0 отсто.

Групацијата Триглав останува финансиски стабилна, адекватно ликвидна и капитализирана на соодветно ниво. Тоа го потврдува и високиот кредитен рејтинг “А“ добиен годинава, со стабилна прогноза на среден рок, на агенцијата за кредитен рејтинг S&P. Членот на Управниот одбор на Заваровалница Триглав, Урош Иванц, објасни: „Внимателно управуваме со ризиците на кои сме изложени. Како дел од континуираните активности на ефикасно управување со капиталот на Групацијата, на почетокот на јули успешно издадовме нова субординирана обврзница.“

Групацијата се грижи за рационализација и оптимизација на своето работење и во таа насока работи и оваа година. Претседателот на Заваровалница Триглав Андреј Слапар додаде: „По минатогодишното регулирање на цените на дополнителното здравствено осигурување во Словенија и последователното повлекување на овие производи од пазарот оваа година, започнавме процес на спојување на подружницата за здравствено осигурување со матичната компанија. На почетокот на јули го прифативме понудениот надоместок во согласност со соодветната владина уредба“.

Групацијата постојано ги следи дефинираните стратешки насоки. И оваа година, имајќи ги предвид потребите на клиентите, развива осигурителни производи, дигитализира и
автоматизира менаџирање на штети и други процеси и внимателно воведува вештачка
интелигенција. Како осигурителна и финансиска групација, спроведува активности за
финансиска писменост и едукација на јавноста за изложеноста на ризици дома и на патиштата, а оваа година дополнително ги едуцираше клиентите за проценка на ризикот од природни катастрофи, покривајќи поплави, земјотреси, град и молњи. Во своето работење, Групацијата се придржува до својата заложба за одржливост, што се рефлектира во секој аспект од нејзините активности, вклучувајќи ги и напорите за намалување на јаглеродниот отпечаток и за промовирање на еднаквоста и транспарентноста.

ГРУПАЦИЈАТА ТРИГЛАВ НА МАКЕДОНСКИОТ ПАЗАР

Групацијата Триглав на македонскиот пазар ја сочинуваат компаниите Триглав Осигурување, Триглав Осигурување Живот и Триглав пензиско друштво. Компаниите Триглав Осигурување и Триглав Осигурување Живот во првата половина од 2024 година ја зголемија вкупната бруто полисирана премија на износ од 19,9 милиони евра (на крајот на првото полугодие од 2023 година изнесуваше 16 милиони евра). Групацијата, која имаше пазарен удел од 14,7 отсто на крајот на првиот квартал од 2024 година (што е за 1,3 отсто повеќе во однос на првиот квартал претходната година), ја зазема третата позиција на македонскиот пазар.

Триглав Осигурување во првата половина од годината оствари раст на премијата и ја потврди лидерската позиција на пазарот на неживотно осигурување. „Во денешниот дигитален свет, посветени сме на искористување на моќта на технологијата за да обезбедиме исклучително корисничко искуство. Затоа, во првата половина од годината работевме на оптимизирање на дигитални решенија за клиентите и за внатрешните процеси, кои што придонесуваат кон поефикасно работење и подобрување на задоволството на клиентите. Истражувањата покажуваат дека нашите клиенти и јавноста го препознаваат квалитетот на производите и услугите што ги нуди Триглав Осигурување, за што потврда се и сертификатот за квалитет Qudal Quality Medal и Best Buy Award наградата што компанијата ги освои оваа година“, изјави Главниот извршен директор на компанијата, г. Ѓорѓе Војновиќ.

Во првата половина од годината и Триглав Осигурување Живот оствари раст на премија и на пазарниот удел. „И во првата половина од оваа година го продолжуваме континуираниот раст кај сите продажни канали и тарифи. Сето ова е резултат на препознавање на барањата на клиентите и понуда од која  тие би имале најголем бенефит. Триглав Живот веќе неколку квартали останува на водечката позиција по бројот на продадени полиси за животно осигурување, што ни говори дека клиентите нѐ препознаваат како партнер на кој што можат да му веруваат при инвестирањето на своите средства“, изјави Христина Џамбазовска Анастасов, Генерален директор на Триглав Осигурување Живот АД, Скопје.

Истовремено, Триглав пензиско друштво го задржа приматот на најбрзо растечко членство во сегментот на вториот задолжителен пензиски столб и забележа стабилен раст на средствата под управување. „Задоволни сме од динамиката и интензитетот на реализација на целите. Остануваме посветени на понатамошен напредок во сите клучни области од нашето делување, со фокус на квалитетот на корисничката поддршка, едукацијата и грижата за членовите на фондовите, со кои што управуваме“, изјави г-дин Тихомир Петрески, Претседател на Управен одбор на Триглав пензиско друштво.

Македонски Телеком го продолжи трендот на раст и испорача силни финансиски резултати во првото полугодие на 2024 година. Успешното работење се должи на стратешките инвестиции во развој на мрежата и нови технологии, коишто доведоа до  супериорни услуги и корисничко искуство.

Нето добивката е во пораст од 7,4 проценти, а приходите од продажбата се зголемени за 2,5 проценти во споредба со истиот период од претходната година и изнесуваат 5.965 милиони денари. Оперативната добивка пред камати, оданочување и амортизација (EBITDA) е благо намалена за 0,4 проценти споредено со минатата година.

Супериорно корисничко искуство и зголемување на базата на корисници

Продолжува трендот на зголемување на бројот на корисници во сите сегменти. Бројот на корисници на широкопојасен интернет е зголемен за 3,3 проценти и изнесува 213 илјади, а вкупниот број на интернет пристапи порасна за 3,3 проценти. Базата на корисници се зголеми и во мобилните комуникации и достигна  1,3 милиони. Во фиксната телефонија, остануваме на водечката позиција со 230 илјади корисници.

Со првата дигитална програма за наградување и поволности за корисниците – Magenta Moments, достигнавме 190.277 корисници. Остануваме број 1 во Македонија според TRI*M индексот за мерење на задоволството на корисниците, што е резултат на нашата посветеност да обезбедиме врвно корисничко искуство и многу повеќе од комуникациски услуги за комерцијалните и за деловните корисници.

Лидерство на ТВ пазарот со новата телевизија MagentaTV 

Во однос на ТВ пазарот, ја зацрстивме лидерската позиција со удел од 35% од вкупниот ТВ пазар. Новата дигитална телевизија – MagentaTV станува сè попопуларна поради напредните карактеристики и иновативното ТВ доживување коешто им го нуди на корисниците. На крајот на првото полугодие од годината бројот на ТВ корисници се зголеми за 3 проценти, со што базата на корисници достигна 153,2 илјади.

Инвестиции и развој на најдобрата мрежа

Постојаните вложувања во мрежната инфраструктура го зајакнуваат статусот на најдобра мрежа. Остануваме лидери во покриеност со оптика доследни на нашиот фокус на ширењето и инвестициите во оптичката мрежа и денес имаме 330 илјади пристапи до оптика, што е за 13,9% повеќе споредено со истиот период од претходната година. Нашата 5G мрежа продолжува да се шири и е достапна за 92% од населението во Македонија со гигабитни брзини во речиси сите  градови. Вкупните капитални инвестиции (CAPEX) на крајот од првите шест месеци од 2024 година изнесуваат 721 милион денари. Продолжуваме да ја шириме инфраструктурата на целата територија со најновите технологии за да ги поврземе сите корисници со најдобрите услуги.

Зголемување на дивидендата и дивидендниот принос

Успешните резултати на компанијата доведуваат и до повисока дивиденда за акционерите.  Бруто износот на дивидендата по акција за 2023 година е зголемен за дури 33% во споредба со исплатената дивиденда по акција за 2022 година. Исто така, зголемен е и дивидендниот принос од акциите за 26% во однос на минатата година и изнесува 6,7%. Цената по акција од почетокот на 2024 година до крајот на првите шест месеци е зголемена за 6,9%. Ова е потврда дека нашата стратегија и технолошко визионерство одат во вистинската насока и се препознаени од корисниците.