Connect with us

Банки

Тројца кандидати во трка за испразнетото место во Управниот одбор на Стопанска банка АД – Скопје?

Објавено

пред 2 дена

на

Управниот одбор на Стопанска банка АД – Скопје наскоро би требало да има нов член, кој ќе дојде на местото на сега веќе поранешниот член на Управниот одбор, Тони Стојановски кој го презема раководењето со НЛБ Банка АД Скопје како прв човек на банката и Претседател на Управниот одбор.

Според информациите до кои дојде Банкарство, во трка за испразнетото место во Управниот одбор се тројца кандидати со долгогодишно искуство во банкарскиот сектор, а тоа се Благоја Устијаноски, Петар Трпески и Владимир Тренески.

Благоја Устијаноски е сегашен директор на Секторот за корпоративни клиенти на Шпаркасе банка АД Скопје. Тој оваа функција ја извршува од јули 2021 година односно од интеграцијата на Шпаркасе Банка со Охридска Банка. Претходно ја извршувал функцијата директор на Дирекцијата за корпоративни клиенти во Охридска банка АД Скопје. Устијаноски има 15-годишно работно искуство во извршување на различни функции во доменот на кредитната анализа, водење и менаџирање на портфолија на корпоративни клиенти, а веќе 7 години го менаџира севкупното работење со корпоративни клиенти. Под негови ингеренции се дирекциите за работа со големи и интернационални компании и за мали и средни претпријатија, Службата за проектно финансирање која ги вклучува деловите за финансирање на проекти поврзани со изградба на недвижен имот и обновливи извори на енергија, како и Службата за позадинска поддршка на корпоративните клиенти.

Петар Трпески во моментов ја извршува функцијата Директор на Деловен сектор за работа со корпоративни клиенти во НЛБ Банка АД Скопје од октомври 2023 година. Тој претходно беше 10 години дел од менаџерскиот тим на Шпаркасе Банка АД Скопје каде извршуваше високо-раководни функции како Директор на Дирекцијата за тргување и финансиски пазари, Директор на Сектор за управување со корпоративни клиенти, како и функцијата Директор на Сектор за управување со средства. Трпески има повеќе од 13-годишно искуство во банкарскиот сектор, а бил дел и од Стопанска банка АД – Скопје како Директор на мрежа на филијали.

Владимир Тренески е Сениор Директор за корпоративно банкарство на Стопанска банка АД – Скопје и е директно запознаен со случувањата во банката. Истовремено, тој е дел од Кредитниот одбор (КО) на банката и од Кредитниот одбор за комерцијални клиенти (КОКК), одбори кои одлучуваат за кредитната изложеност на Стопанска банка АД- Скопје кон поединечен субјект – правно лице. Тренески долги години бил “десна рака” на Тони Стојановски кој 15 години беше член на Управниот одбор на Стопанска банка АД – Скопје како Генерален Директор за корпоративно банкарство и претставува најлогичен избор за наследник на неговиот ментор.

Mенаџментот на Стопанска банка АД – Скопје има тешка задача да го направи вистинскиот избор помеѓу овие тројца истакнати професионалци, но останува да се види дали сопствениците од Грција ќе продолжат да му веруваат на постоечкиот кадар кој е проверен и докажан и кој “порасна” заедно со банката или ќе се одлучат за кадар “од надвор” кој ќе донесе нови погледи во функционирањето. Кој и да биде новиот член на Управниот одбор, ќе има сериозен предизвик да одговори на барањата во една од најголемите и најуспешните македонски банки и да го продолжи континуитетот на успешно работење на една од најголемите банки во државата.

Значајно да се напомене е дека откако банката ќе го направи изборот на кандидатот кој ќе биде дел од Управниот одбор истиот не станува дел од одборот по автоматизам, бидејќи регулаторот, односно Народната банка неопходно е да даде дозвола за именување на истоимениот кандидат во Управниот одбор.

Слични Теми:

Банки

Објавен е традиционалниот конкурс за учениците од основните и средните училишта по повод Светскиот ден на штедењето – 31 октомври

Објавено

пред 7 часа

на

Народната банка и Министерството за финансии традиционално, дванаесетта година по ред, по повод одбележувањето на Светскиот ден на штедењето – 31 октомври го објавија Конкурсот за учениците од основното и средното образование. Целта на  Конкурсот е да се поттикне креативноста, имагинацијата, како и интересот на учениците за штедењето и едукација на младите за овој сегмент во финансиската сфера.  

Учениците од основното образование може да испратат литературна и / или ликовна творба на темата: „Штедењето – наша навика и наша потреба!“. За избраните 12 најдобри творби на учениците од основното образование ќе им бидат доделени  парични награди, и тоа:

  • 3 награди за најдобар цртеж / дигитален цртеж за учениците од 1. до 5. одделение;
  • 3 награди за најдобар цртеж / дигитален цртеж за учениците од 6. до 9. одделение;
  • 3 награди за најдобра песна за учениците од 1. до 5. одделение и
  • 3 награди за најдобар расказ за учениците од 6. до 9. одделение.

Учениците од средното образование може да испратат литературна творба ‒ есеј на темата: „Финансиската едукација на младите – основа за подобро управување со парите и заштита од финансиски измами во новото дигитално време“. За избраните 3 најдобри творби на учениците од средното образование ќе им бидат доделени парични награди.

Крајниот рок за доставување на творбите е 18 октомври 2024 година.

Списокот на наградените ученици ќе биде објавен најдоцна до 31 октомври 2024 година, на интернет-страниците на Народната банка и на Министерството за финансии.

Народната банка и Министерството за финансии ги повикуваат заинтересираните ученици да достават творби на објавениот конкурс. Веруваме дека и оваа година Конкурсот ќе предизвика голем интерес меѓу учениците од основните и средните училишта во нашата земја и дека дополнително ќе го поттикне стекнувањето и развивањето на навиките за штедење. 

Продолжи со читање

Банки

Панел 4, конференција на НБ: “Преглед на најновата кризна епизода: Научени лекции на патот напред“

Објавено

пред 7 часа

на

Народната банка, во соработка со Комитетот за преобразување на Бретон Вудс (КПБВ), на 1 октомври ќе ја одржи јубилејната, Десетта меѓународна конференција. Гувернери на централни банки, високи претставници на меѓународните финансиски институции и меѓународната академска заедница ќе разработуваат повеќе актуелни прашања обединети под темата „Централните банки и централнобанкарското работење во комплексно опкружување: покажување посветеност и одржување на кредибилитетот“.

Темата на втората панел дискусија ќе биде “Преглед на најновата кризна епизода: Научени лекции на патот напред“.

Најновата кризна епизода, научените лекции, како и идните насоки, на последниот, четврти панел, ќе ги дискутираат гувернерот на централната банка на Косово – Ахмет Исмаили, претставниците на народните банки на Белгија – Џеф Боеккс, Хрватска – Дубравко Михаљек, Литванија – Симонас Крепшта, како и претставници на ММФ – Себастиан Соса, ЕИБ – Дебора Револтела и Центарот Хачинс за фискална и монетарна политика – Џан Марија Милези-Ферети.

Вицегувернерката на Народната банка, Ана Митреска, со свое излагање ќе ја затвори Десеттата меѓународна конференција „Централните банки и централнобанкарското работење во комплексно опкружување: покажување посветеност и одржување на кредибилитетот“.

Продолжи со читање

Банки

ТТК Банка им оддаде почит на своите поранешни вработени, а сегашни пензионери

Објавено

пред 7 часа

на

На 28 септември 2024 година ТТК Банка беше домаќин на настанот „Ден со нашите пензионери- наследство и поврзаност“ посветен на оддавањето почит и благодарност за непроценливиот придонес на пензионираните вработени.

Во пријатна и топла атмосфера настанот опфати низа активности кои поттикнаа меѓусебно дружење и споделување на спомени. Сите присутни имаа можност да се потсетат на убавите моменти, стекнатите искуства и успесите во текот на сите години заедничко работење.

Претседателот на Управниот одбор, проф. д-р Драгољуб Арсовски, во своето обраќање ја нагласи важноста на овој настан и посветеноста на банката кон сите оние кои оставија траен белег во нејзиниот развој.

„Нашите пензионери не се само поранешни вработени – тие се столбот на нашата приказна, луѓето кои го поставија темелот и ја градеа оваа институција низ годините. Благодарни сме за нивната мудрост, труд и посветеност што ги вложија во развојот на ТТК Банка. Оваа средба го зајакнува нашето чувство на заедништво и е потврда дека нивниот придонес ќе остане трајно запишан во историјата на банката, а нивните достигнувања никогаш нема да бидат заборавени“ изјави проф. д-р Драгољуб Арсовски.

Пензионираните вработени имаа можност да дознаат за тековните проекти, достигнувања и идните цели на банката. Во знак на благодарност и признание за нивната посветеност и долга и успешна кариера Банката им додели благодарници и пригодни подароци.

ТТК Банка изразува срдечна благодарност до сите свои пензионирани вработени. Преку овој настан потврдуваме дека богатото наследство, знаењето и мудроста, што тие ни ги оставаат секогаш ќе бидат важен дел од приказната на Банката, поттик и основа да се радуваме на светла и перспективна иднина.

Продолжи со читање

Популарно