Фјучерсите на американската нафта WTI во вторникот паднаа под 90 долари за барел, откако во претходната трговска сесија достигнаа речиси 120 долари. Падот доаѓа по изјавата на американскиот претседател Доналд Трамп дека конфликтот со Иран можеби се приближува кон крај и дека воената операција на САД се одвива побрзо од првично планираното.

Трамп исто така најави дека има намера да ги укине санкциите поврзани со нафтата и дека американската морнарица ќе ги придружува танкерите низ Ормутскиот Теснец, со цел да се обезбеди непречен транспорт и да се задржат цените на нафтата под контрола.

Дополнителен притисок врз цените дојде и од изјавата на министрите за финансии на земјите од Г7, кои порачаа дека групата е подготвена да ослободи нафта од стратешките резерви доколку тоа биде неопходно, иако засега не е преземена конкретна мерка.

Цените на нафтата нагло пораснаа во понеделникот, откако големите производители од Блискиот Исток почнаа да го намалуваат производството поради нарушувањата во сообраќајот низ Ормутскиот Теснец. Поради сериозните ограничувања на танкерскиот транспорт, неколку клучни производители меѓу кои Саудиска Арабија, Обединетите Арапски Емирати, Кувајт и Ирак почнаа да го ограничуваат производството бидејќи складиштата брзо се полнат.

Македонска берза и оваа година се приклучи кон Иницијативата “Да заѕвониме за родова еднаквост” (Ring the bell for Gender Equality). Мотото за 2026 година е „Права, Правда. Акција, за СИТЕ жени и девојки” (Rights. Justice. Action for ALL Women and Girls), со коешто по повод Меѓународниот ден на жената се повикува на забрзана акција за отстранување на структурните бариери за родова еднаквост. Иницијативата која е поддржана од над 110 други берзи има за цел подигнување на свеста за родовата еднаквост во приватниот сектор, прашањата поврзани со економијата, финансиите и одржливиот развој.

По овој повод, денеска, ѕвоното на Македонска берза заеднички го заѕвонија Гордана Димитриеска-Кочоска, Министер во Министерство за финансии на Република Северна Македонија и Иван Штериев, Главен извршен директор на Македонска берза.

„Денеска во Македонската берза се приклучив на одбележувањето на глобалната иницијатива “Ring the Bell for Gender Equality”, посветена на поддршката за родова еднаквост и поголемо учество на жените во бизнисот и лидерските позиции. Оваа иницијатива е порака до сите кои имаат идеја, без разлика на полот, да работат на нејзината реализација. Финансиските средства не препознаваат пол, туку препознаваат идеја, иновативност и креативност, а Берзата е само една одлична алтернатива за реализација. Сакам да поттикнам на работа на своите идеи, а особено жените да ја покажат својата храброст, онака како што ја покажуваат во сите останати општествени процеси, тоа е вистинската енергија која го движи светот напред. Статистиките покажуваат дека мнозинството од вработените во финансискиот сектор се жени, ова е уште еден доказ дека жените се оние кои умно, посветено и со огромна волја сериозно придонесуваат во финансискиот сектор“, изјави Гордана Димитриеска-Кочоска, Министер во Министерство за финансии на Република Северна Македонија.

Во оваа прилика Главниот извршен директор на Берзата, Иван Штериев изјави: „Годинешното мото на оваа глобална иницијатива е силна порака којашто треба сите да не потсети дека вистинскиот напредок кон родова еднаквост подразбира не само декларативна поддршка, туку и конкретни чекори за обезбедување еднакви можности и правична застапеност на жените во сите сфери на општеството, вклучително и во корпоративниот сектор. Како институција што ја поврзува бизнис заедницата со пошироката јавност и инвеститорите, Македонска берза подолг временски период наназад е активна во промовирањето на современи стандарди на корпоративно управување, транспарентност и инклузивност. Токму затоа редовно сме дел од оваа прогресивна глобална иницијатива, со цврсто уверување дека поголемата вклученост на жените во управувачките структури на компаниите е важен предуслов за поодржлив економски развој и подинамичен деловен екосистем.“

Ова е 12-та кампања на глобалната Иницијатива „Да заѕвониме за родова рамноправност“ којашто е партнерство помеѓу Меѓународната финансиска корпорација (IFC), Светската федерација на берзи (WFE), Иницијативата за одржливи берзи (SSE), во која Македонската берза е учесник, Глобалниот договор на ОН, UN Women и Women in ETFs, за промовирање на родовата еднаквост на пазарите на капитал.

Во функција на зајакнување на општествената свест за постигнување на поголема родова рамнопраност, Берзата и оваа година објавува ажурирана анализа за состојбите со половата структура на составите на органите на управување кај котираните акционерски друштва што е достапна на следниов линк: 

https://mse.mk/mk/news/9/3/2026/gender-analysis-of-the-governing-bodies-of-listed-joint-stock-companies-on-the-macedonian-stock-exchange-for-2025

На азиските берзи во понеделникот дојде до значителен пад на цените на акциите, откако инвеститорите беа вознемирени од силниот раст на цената на нафтата, која се искачи значително над 110 долари за барел. Според аналитичарите, ова може дополнително да ја поттикне инфлацијата и негативно да се одрази врз глобалната економија.

Индексот MSCI на азиско-пацифичките акции околу 6:30 часот беше во минус од повеќе од три проценти.

Во исто време, цените на акциите во Шангај, Хонгконг, Индија, Австралија, Јапонија и Јужна Кореја паднаа меѓу 1,1 и осум проценти.

Поради силниот пад, јужнокорејскиот индекс Коспи рано утринава се намали за повеќе од осум проценти, по што на берзата привремено беше прекинато тргувањето.

Значителни загуби бележат и другите азиски берзи, а се очекува пад и на најголемите светски пазари, со оглед на тоа што терминските индекси се во длабок минус.

Така, околу 6:30 часот терминскиот индекс Eurostoxx 50, кој ги следи водечките европски акции, како и германскиот индекс DAX, беа во пад од повеќе од три проценти, додека британскиот FTSE беше понизок за околу 1,7 проценти.

Пад се очекува и на Волстрит, каде што терминскиот индекс Dow Jones моментално е во минус од повеќе од 1.000 поени или околу 2,3 проценти, додека терминските индекси S&P 500 и Nasdaq исто така бележат пад поголем од два проценти.