Инвестброкер АД Скопје информира дека на вонредна седница на Собранието на акционери, одржана на 10 декември 2025 година, донесена е одлука за доделување нов четиригодишен мандат на постојните членови на Одборот на директори.

Нов мандат добија Кирил Митровски како неизвршен член, Марко Андонов како неизвршен член, Зоран Балев како независен и неизвршен член, како и Филип Петрушевски како извршен член на Одборот на директори.

Дополнително, на седница одржана на 25 декември 2025 година, Одборот на директори го избра Кирил Митровски за претседател на Одборот, додека Филип Петрушевски е назначен за извршен директор.

Согласност за именувањето на Петрушевски за извршен директор издаде Комисија за хартии од вредност на Република Северна Македонија на 26 јануари 2026 година. Решението е заведено под број УП1 Бр. 10-124 и е запишано во Централен регистар на РСМ на 6 февруари 2026 година.

Известувањето е доставено до Македонска берза АД Скопје согласно член 166-б од Законот за хартии од вредност.

Златото и денеска се тргува на високи нивоа на меѓународните пазари, при што спот цената се движи околу 5.050 – 5.060 долари за унца. Ова значи дека еден грам злато во текот на денешното тргување вреди приближно 137 евра.

Цената ја задржува психолошката граница од 5.000 долари за унца, откако послабите податоци за малопродажбата во САД ги засилија очекувањата дека Федералните резерви би можеле да ги намалат каматните стапки на наредниот состанок. Овој сигнал дополнително ја зголеми побарувачката за злато како сигурно прибежиште во услови на зголемена неизвесност.

Кон крајот на јануари, златото достигна историски максимум од над 5.600 долари за унца, поттикнато од геополитичките тензии, зголемената глобална нестабилност и зголемените шпекулативни купувања. По наглата корекција и пад од над 13% во само две сесии, цената се стабилизира, надоместувајќи околу половина од загубите.

Во текот на оваа недела, златото повторно се тргува над 5.000 долари за унца, а голем дел од водечките светски банки прогнозираат дека растот би можел да продолжи, со оглед на тоа што фундаменталните фактори кои ја поддржуваат побарувачката и понатаму остануваат присутни.

Градежната компанија „Настел ДООЕЛ“ продолжува со постепено намалување на својот удел во фармацевтската компанија „Реплек АД Скопје“, преку нова продажба на дел од сопствениот пакет акции.

Според објавата на „Реплек“ на Македонска берза, „Настел“ реализирал трансакција со која биле продадени 64 акции, со што неговото вкупно учество е намалено на 15.054 акции, односно 5,81% од вкупниот број акции со право на глас.

„Постапувајќи согласно член 38 од Правилата за котација на Македонска берза АД Скопје, Реплек АД Скопје објавува дека акционер со над 5% односно компанијата НАСТЕЛ ДООЕЛ, продаде 64 акции, со што поседува вкупно 15.054 акции, односно 5,81% од вкупниот број на акции“, се наведува во соопштението.

И покрај намалувањето на сопственичкиот удел, „Настел“ и натаму останува значаен акционер со над 5%, што му овозможува и понатамошно учество во управувачката структура на компанијата.

Инаку, „Настел“ во минатото важеше за еден од најголемите акционери во „Реплек“, но во последните неколку години компанијата спроведува стратегија на постепено намалување на својот удел, реализирајќи повеќе последователни продажби на акции.