Македонска Банкарска Асоцијација во соработка со Народната банка на Република Северна Македонија и Комисијата за хартии од вредност на Република Северна Македонија објавува јавен повик до основните и средните училишта во Република Северна Македонија.

Ги повикуваме основните и средните училишта во Република Северна Македонија за учество во меѓународниот натпревар – Европски квиз на парите. Овој квиз е проект на Европската банкарска федерација за финансиска едукација на учениците од 13 до 15 години.
Европскиот квиз на парите се одвива во две фази:
– првата фаза се националните натпревари во секоја земја;
– втората фаза е европското финале, во кое учествуваат победниците на националните
натпревари.

Во Република Северна Македонија, националниот натпревар ќе се одржи за време на
Глобалната недела на парите (од 17 до 23 март 2025 година), на македонски и на албански јазик, во два круга:

– прв круг: онлајн натпревар за селекција на најдобрите тимови;
– втор круг: најдобрите тимови се натпреваруваат за титулата „национален шампион“ со
физичко присуство во просториите на Македонската банкарска асоцијација.

Тимот од најдобрите двајца ученици ќе ја претставува нашата земја на европското
финале што ќе се одржи на 22 и 23 мај 2025 година во Брисел, Кралството Белгија.
Секој тим се натпреварува на својот мајчин јазик. Европската банкарска федерација
ќе им додели парична награда на училиштата што ќе освојат прво, второ и трето
место.

Натпреварите ќе се одвиваат преку посебна електронска апликација за оваа
намена Кахут (Kahoot!), која е едукативна платформа врз база на игра.
Се повикуваат сите заинтересирани основни и средни училишта да пријават одделенија/класови за учество на националниот натпревар во Република Северна Македонија најдоцна до 21 февруари 2025 година, на веб-страницата на Македонската банкарска асоцијација на следнава врска или на електронската адреса: [email protected].

Притоа, треба да се има предвид следново:

Учениците се натпреваруваат во тимови по двајца;

Секое основно или средно училиште може да пријави повеќе одделенија/класови и секој
клас може да пријави повеќе тимови;

Учениците треба да бидат на возраст од 13 до 15 години, со датум на раѓање од 23 мај
2009 година до 23 мај 2012 година;

Заедно со податоците за одделенијата/класовите треба да се достават податоци и за
наставниците/професорите под чие менторство ќе се одвива подготовката.

Едукативните материјали потребни на учесниците од Република Северна Македонија за
подготовка за националниот натпревар и европското финале и повеќе информации
за Европскиот квиз на парите се достапни на следниве веб-страници: mba.mk и efb.eu.

Девизните резерви бележат раст, инфлацијата забавува, додека стабилноста на банкарскиот  и натаму зајакнува, се бележи во Извештајот за кредитниот рејтинг на земјава од агенцијата „Стандард и Пурс“, во кој таа го потврдува рејтингот „ББ-“, со стабилен изглед.

Во делот во кој Агенцијата прави процена на отпорноста на економијата за справување со надворешни шокови, се наведува дека во декември минатата година девизните резерви се зголемија на нивото од околу пет милијарди евра , главно како резултат на откупот на девизи од страна на Народната банка. Очекувањата на Агенцијата се дека тие ќе бидат стабилни и понатаму, меѓу другото поддржани и од странските директни инвестиции.

Од Агенцијата нагласуваат дека за 2024 година просечната инфлација во земјава забави сведувајќи се од 20% на 3,5%.

Агенцијата посочува дека и покрај скорешните кризи, банкарскиот сектор е зајакнат, што се гледа и од историски високата стапка на адекватност на капиталот од 19% во третиот квартал од 2024 година и ниска стапка од 2,9% на нефункционалните кредити на крајот на ноември 2024 година. Народната банка продолжува со мерки за зајакнувањето на финансиската стабилност, преку зголемување стапката на противцикличниот слој на капиталот и  интервенции кај задолжителната резерва во девизи, се забележува во Извештајот. 

Комерцијална банка како силен поддржувач на позитивните општествени промени со задоволство обезбеди финансиска поддршка за одбележување на 30-годишниот јубилеј на култната хумористична серија К-15. Ова партнерство е начин на Комерцијална банка да даде признание за значајниот придонес на К-15 во македонската култура и да ја потврди нивната посветеност за поддршка на проекти кои поттикнуваат креативност, размислување и менување на работите на подобро.

К-15, како еден од најпрепознатливите симболи на македонскиот хумор, три децении преку сатира и хумор ги адресира општествените предизвици, отвора значајни теми и инспирира генерации граѓани да размислуваат критички и конструктивно за нашата заедничка иднина.

Банката, како стар пријател на серијата и на тимот на К-15, чиј ентузијазам длабоко го цени, со задоволство се приклучи кон одбележувањето на 30-годишниот јубилеј затоа што тој го слави наследството на оваа емисија и нејзиното влијание врз македонската култура.

„Нашата цел е не само да помогнеме да се одбележи значајниот јубилеј, туку и да овозможиме К-15 со својата неповторлива сатира повторно да ги насочи светлата кон теми кои секојдневно нè засегаат, поттикнувајќи јавна свест и дијалог.

Комерцијална банка е горда што во годината во која самата одбележува 70 години постоење ќе даде свој придонес и за овој вреден проект кој слави три децении смеа, инспирација и општествено влијание”, велат од Комерцијална банка.