Најпрофитабилните компании во светот во 2026 година главно доаѓаат од Соединетите Американски Држави, покажува најновото рангирање базирано на листата Forbes Global 2000 и финансиските резултати на компаниите за последните 12 месеци.

Од 30-те најпрофитабилни компании во светот, дури 16 имаат седиште во САД. Американските компании доминираат и во првите десет, а првите четири места им припаѓаат на технолошки гиганти од Западниот брег.

На врвот е Alphabet, матичната компанија на Google, со годишен профит од 160,2 милијарди долари. По неа следуваат Microsoft со 125,2 милијарди долари, Apple со 122,6 милијарди долари и NVIDIA со 120,1 милијарда долари.

Петтото место му припаѓа на саудискиот нафтен гигант Saudi Aramco, кој остварил профит од 99,3 милијарди долари. Потоа следуваат Amazon со 90,8 милијарди долари, Berkshire Hathaway со 72,5 милијарди долари, Meta Platforms со 70,6 милијарди долари, тајванскиот TSMC со 62,5 милијарди долари и JPMorgan Chase со 58,6 милијарди долари.

Покрај технолошките компании, САД се дом и на некои од најпрофитабилните светски трговци и финансиски институции. Меѓу нив се Amazon и Walmart, како и Berkshire Hathaway и JPMorgan Chase, кои се меѓу најсилните играчи во финансискиот сектор.

Анализата посочува дека американската доминација се должи на комбинација од силен пристап до капитал, развиен пазар за стартапи, универзитети од светска класа, поволно деловно опкружување и долгогодишен прилив на висококвалификувани имигранти. Овие фактори им овозможуваат на компаниите побрзо да растат и да ја задржат предноста пред конкуренцијата.

Надвор од САД, силно се издвојуваат компаниите од Источна Азија. Кина е застапена со големи државно поддржани банки како ICBC, China Construction Bank, Agricultural Bank of China и Bank of China, но и со технолошкиот гигант Tencent и енергетската компанија PetroChina.

На листата се и водечки азиски технолошки компании, меѓу кои тајванскиот TSMC, најголемиот светски производител на чипови, јужнокорејските Samsung и SK Hynix, како и јапонскиот SoftBank. Toyota Motor, исто така од Јапонија, е меѓу најпрофитабилните компании од автомобилската индустрија.

Посебно се издвојува Saudi Aramco, единствената компанија надвор од САД што се наоѓа меѓу првите пет. Саудиската нафтена компанија останува еден од најголемите играчи во глобалниот енергетски сектор, иако во последниот период се соочува со пониски профити поради падот на цените на суровата нафта и нестабилноста во регионот.

Меѓу 30-те најпрофитабилни компании се најдоа и Швајцарската народна банка, која остварила профит од 24 милијарди долари, како и неколку големи компании од секторите технологија, финансии, енергетика, трговија и автомобилска индустрија.

Македонска берза АД Скопје официјално ќе го започне Проектот за поттикнување и подготовка на македонските компании за пазарно финансирање, иницијатива насочена кон зголемување на пристапот на домашните компании до пазарот на капитал преку издавање акции и обврзници.

Проектот се реализира со поддршка на Европската банка за обнова и развој (ЕБОР), врз основа на потпишаниот Меморандум за соработка со Македонската берза, а ќе го имплементираат PwC Северна Македонија и PwC Хрватска.

Во рамки на програмата, до десет македонски компании ќе добијат професионална и независна проценка на нивната подготвеност за пристап до пазарот на капитал, ќе учествуваат на специјализирана лидерска академија и ќе добијат конкретни препораки за понатамошна подготовка за прибирање финансиски средства преку берзата.

Очекувањата се проектот да придонесе за појава на нови издавачи на акции и обврзници, проширување на понудата на финансиски инструменти и натамошен развој на македонскиот пазар на капитал.

Асоцијацијата за е-трговија на Македонија (АЕТМ) ги објави првите шест потврдени говорници кои ќе бидат дел од 9. Регионална конференција за е-трговија, што ќе се одржи на 3 ноември во Националната опера и балет во Скопје. Со имиња кои доаѓаат од светски технолошки компании, водечки регионални организации и успешни AI и e-commerce приказни, годинашното издание најавува врвна програма што ќе ги обедини најрелевантните експерти од индустријата. Меѓу првите потврдени говорници се:

Јован Андонов, Senior Research Engineer во Google DeepMind, е дел од тимот што го развива Gemini, еден од најнапредните AI модели на Google. Неговата работа е фокусирана на пребарување и рангирање информации за Gemini Personal Intelligence, а претходно работел во Google и IBM Research.

Амрита Лал, Senior Client Solutions Manager во LinkedIn, има повеќе од десет години искуство во маркетинг и развој на брендови. Во кариерата работела со глобални брендови како Ferrero, Huggies и Douwe Egberts Coffee, а денес им помага на организациите да изградат силно дигитално присуство и ефективни бренд стратегии.

Николај Зеневич, Group Head of Partner Ecosystem во Iute Group, е експерт за развој на партнерски екосистеми и стратешки партнерства. Претходно осум години беше дел од Bolt, каде што одигра клучна улога во ширењето на Bolt Food на повеќе од 20 пазари и над 350 градови.

Програмата ќе ја збогати и Мирослав Варга, еден од најпознатите Google Ads експерти и сертифициран Google Trainer во регионот. Познат е по практичните предавања, реалните примери и применливите стратегии за дигитално рекламирање.

На конференцијата ќе учествува и Борислав Вукојевиќ, основач на BoroGPT, универзитетски професор и AI консултант. Специјализиран е за генеративна вештачка интелигенција, големи јазични модели и AI агенти, а преку своите платформи развива практични обуки за примена на AI во бизнисот.

Меѓу говорниците е и Нина Ангеловска Станков, претседателка на Асоцијацијата за е-трговија на Македонија, претприемач, автор и поранешна министерка за финансии. Таа ги предводи и Балканската алијанса за е-трговија (BECA) и Алијансата за родова еднаквост на работното место – GEA, а нејзината работа е препознаена со признанија како Forbes 30 Under 30, UNCTAD eTrade for Women Advocate и Bloomberg Adria Top 50 People. Автор е и на книгата „Ништо случајно“, објавена во 2026 година.

Годинашното издание на конференцијата ќе се одржи под мотото „From Wait to Go: E-COMM AT AI SPEED!“, ставајќи го фокусот на тоа како вештачката интелигенција веќе ги трансформира е-трговијата, маркетингот, продажбата, логистиката и корисничкото искуство. Наместо теоретски дискусии, конференцијата ќе понуди практични примери, стратегии и искуства од експерти кои секојдневно работат на развојот на најсовремените технологии и дигитални решенија.

Се очекуваат повеќе од 900 учесници од Македонија и регионот, како и повеќе од 30 домашни и меѓународни говорници, кои на две конференциски сцени ќе ги споделат најновите трендови, искуства и практики од областа на е-трговијата, дигиталниот маркетинг, финтекот, логистиката и вештачката интелигенција. Во наредниот период АЕТМ ќе ги објавува и останатите говорници, како и деталната агенда на конференцијата.

Деветтото издание на конференцијата се реализира со поддршка на компанијата Visa како платинум партнер, КаСис како стратешки партнер, Иуте Македонија како fintech партнер, Комерцијална банка и Халкбанк како сребрени партнери, Минт, Сава Осигурување, Унибанка, Евроинс и РСМ како бронзени партнери, како и бројни други партнери и соработници.

Пријавувањето за E-commerce Conference 2026 е во тек, а повеќе информации за конференцијата, говорниците и билетите се достапни на официјалната веб-страница: ecommerceconference.mk.