Македонскиот олимписки комитет (МОК) потпиша Меморандум за соработка со Асоцијацијата за е-трговија на Македонија (АЕТМ) и Алијансата за родова еднаквост на работното место (GEA), поставувајќи нови основи за поврзување на спортот, дигиталната економија и родовата еднаквост во нашето општество. Меморандумот беше потпишан од страна на Нина Ангеловска Станков, Претседателка на АЕТМ и на Алијансата за родова еднаквост, и Даниел Димевски, Претседател на Македонскиот олимписки комитет.

Оваа соработка претставува значаен чекор кон создавање мост меѓу е-трговијата, дигиталната трансформација и спортот, со заедничка визија за унапредување на спортските организации преку современи решенија за е-трговија и користење на дигитални алатки. Главните цели на соработката се насочени кон развивање заеднички активности и проекти за промоција на спортот и дигиталната економија како и поддршка на дигиталната трансформација и одржливоста на спортските организации.

„Со оваа иницијатива сакаме да покажеме дека спортот не е изолирана област — тој може и треба да биде дел од дигиталната економија, да користи иновации, и да промовира еднакви можности за сите“, истакна Даниел Димевски, Претседател на МОК.

Соработката предвидува размена на знаења и ресурси меѓу спортот и е-трговијата, со цел поттикнување на еднакви можности, инклузивност и женско лидерство како двигатели на иновации и напредок.

„Спортот и бизнисот имаат многу заедничко, и двата бараат дисциплина, истрајност, тимска работа и јасна стратегија. Во двата света успехот не доаѓа преку ноќ, туку преку континуирано учење, посветеност и работа. Денес, без дигитализација и без разбирање на можностите што ги носат технологијата и вештачката интелигенција, нема вистински напредок, без разлика во која индустрија работиме. Верувам дека заеднички ќе може да реализираме иницијативи и проекти кои ќе придонесат за унапредување на спортот, бизнисот и еднаквоста. Со оваа соработка верувам дека и ќе покажеме како преку дигитални алатки спортските организации можат да станат поиновативни и поодржливи“, изјави Нина Ангеловска Станков, Претседателка на Асоцијацијата за е-трговија и Алијансата за родова еднаквост.

Меморандумот опфаќа развој на заеднички иницијативи за дигитална писменост, едукации и обуки, како и воспоставување интерактивни платформи за промоција на спортските активности и вредности. Дополнително, активностите ќе бидат насочени кон вклучување на младите во дигиталниот спортски екосистем и отворање можности за стартапи и претприемачи кои создаваат иновативни решенија за спорт и здрав живот.

„Нашата цел е да создадеме општество каде технологијата му служи на човекот – каде дигиталните решенија го поддржуваат здравјето, спортот и еднаквоста“, додаде Димевски.

Ова партнерство е пример како преку визија, иновации и заедничка работа може да се создаде поинклузивно, дигитално и праведно општество – каде спортот и е-трговијата одат рака под рака, поттикнувајќи економски и општествен развој. Како дел од оваа иницијатива, МОК најавува нови активности и кампањи насочени кон унапредување на дигиталните компетенции на спортските организации, промоција на родова еднаквост и зголемување на видливоста на жените во спортот и лидерството.

Никола Јошевски, генерален менаџер и сопственик на Mint Fintech Group и претседател на Групацијата на финансиски друштва при Стопанската комора на Македонија, учествуваше на престижната регионална конференција Microbalkans 2025, што се одржа во Дубровник, Хрватска, од 5 до 7 ноември 2025 година.

Како панелист на високопрофилната дискусија „Усогласување на правните рамки со директивите на ЕУ“, Јошевски се приклучи на водечки европски партнери и институции кои активно придонесуваат за развојот на социјалните финансии во регионот на Западен Балкан. 

Панелот се фокусираше на регулаторната хармонизација, финансиската инклузија, платните системи и усогласувањето со процесот на пристапување кон ЕУ, со посебен акцент на улогата на микрофинансиските институции и финтек решенијата во одржливиот развој и регионалната соработка.

Во своето обраќање, Јошевски ја нагласи потребата од создавање на стабилен и интегриран финансиски систем што ги надминува класичните регулаторни рамки, посочувајќи: „Главниот предизвик не е само во пренесувањето на директивите на ЕУ во националното законодавство, туку во создавањето на целосен екосистем – таков што нè прави конкурентни, инклузивни и силни дома.“

Панелот поттикна значајна дискусија за иднината на финансиската регулатива во регионот и улогата на микрофинансиските институции во зајакнување на финансиската стабилност, транспарентност и дигитална трансформација.

Конференцијата Microbalkans 2025, поддржана во рамките на соработката со Европската унија, го обедини врвот на експертизата од Европа и Западен Балкан, создавајќи дијалог за унапредување на социјалните финансии, микрокредитирањето и финтек иновациите.

Присуството на Mint Fintech Group на овој настан уште еднаш ја потврди посветеноста на компанијата кон модернизација на финансискиот сектор во Македонија, создавање инклузивна економија и промовирање европски вредности во финансиските услуги.

Со своето учество, Јошевски ја зацврсти позицијата на Македонија како активен партнер во градењето на современ, конкурентен и одржлив финансиски екосистем, кој ја поврзува регионалната соработка со европските стандарди и отвора нови можности за раст и развој.

Во атмосфера полна со енергија, инспирација и нови идеи, овогодинешната 8-ма Регионална конференција за е-трговија уште еднаш покажа зошто е најочекуваниот настан за дигиталната заедница во регионот. Националната опера и балет на 4 ноември беше преполна со менаџери, маркетери, претприемачи, претставници на организации и лидери кои дојдоа да ја „забрзаат“ иднината под мотото „Fasten the Future“. Со повеќе од 900 учесници од над 10 земји и 25 говорници од водечки глобални и локални компании, конференцијата уште еднаш го постави Скопје на мапата на регионалните центри за е- трговија и дигитална трансформација.

Со две паралелни сцени кои создаваа динамичен простор каде идеите, технологијата и инспирацијата се преплетуваа, оваа година настанот го надмина концептот на класична конференција и се претвори во жив екосистем кој ги обедини податоците, однесувањето на потрошувачите, лидерството, маркетингот и вештачката интелигенција. Така, е-трговијата уште еднаш ја потврди својата централна улога во поврзувањето на бизнисите, потрошувачите и технологијата, создавајќи нови можности и стандарди.

Меѓу главните теми, особено се издвојуваше вештачката интелигенција (AI) – реалност што веќе го менува начинот на кој бизнисите размислуваат, комуницираат и создаваат вредност. Преку креативни презентации и дискусии на експерти од водечки компании како TikTok, Booking.com, Dolce & Gabbana и други, учесниците слушнаа како AI влијае врз маркетингот, персонализацијата, плаќањата и безбедноста, но и како иновативноста, креативноста и технологијата заедно ја обликуваат иднината на е-трговијата.

Од Асоцијацијата за е-трговија истакнуваат дека конференцијата годинава го надмина секое очекување и потврди дека заедницата расте со брзина на која треба да се гордееме. Тие нагласија дека темата за AI ја отвори значајната дискусија за тоа како технологијата може да ја подобри оперативноста и продуктивноста и со тоа да го забрза растот на е-трговијата, како и како да ја поттикне довербата, транспарентноста и иновативноста во дигиталниот свет.

Со инспиративни говори, одлична организација и рекордна посетеност, конференцијата уште еднаш ја потврди својата улога како водечки регионален настан што ги спојува иновацијата, технологијата и претприемништвото. Конференцијата испрати јасна порака: вештачката интелигенција е темел врз кој се гради иднината на е-трговијата и се овозможува на бизнисите да создаваат попаметни, поодговорни и поиновативни решенија.

Инаку, конференцијата оваа година беше поддржана од Visa како платинум партнер, Halkbank како стратешки партнер, Korpa како партнер за храна и достава, Brainster како AI партнер, A1 како дигитален партнер, а Ananas и Casys како златни партнери. Сребрени партнери беа Комерцијална банка, IUTE, Филип Морис Интернационал, Сава пензиско друштво, Гранд Скопје, Public Cloud Group и Wolt, заедно со повеќе бронзени партнери.