Водејќи се од заложбата за овозможување современи и достапни банкарски услуги, ТТК Банка од 8 октомври 2025 година воведува поповолни услови во платниот промет и ја проширува понудата на платежни услуги со овозможување кредитни трансфери во евра преку европската платежна шема СЕПА (SEPA – Single Euro Payments Area).

Со измената на Тарифата за надоместоци на услуги  се укинуваат и намалуваат дел од надоместоците за извршување платежни услуги за физички и за правни лица, со посебен акцент на МИПС плаќањата како и на електронските плаќања преку дигиталните канали. Поттикнувањето на користењето платежни услуги преку интернет – ТТК Е-банк и преку мобилната апликација – ТТК М-банк, е дел од заложбите на Банката за унапредување на дигитализацијата и за развој на одржливи решенија во платниот промет.

Воведувањето на кредитните трансфери преку СЕПА ќе овозможи побрзи, поефикасни и поевтини плаќања во евра, по поволни услови споредливи со оние во земјите од еврозоната.

Преку сите овие новини, ТТК Банка ќе им понуди на своите клиенти поедноставено, поповолно и понапредно банкарско искуство, усогласено со европските стандарди и современите трендови во платниот промет.

За повеќе информации за новите услови за СЕПА кредитните трансфери и изменетата тарифа, посетете ја најблиската експозитура на ТТК Банка или следната врска:  Известување за измена на надоместоци со примена од 8.10.2025

ПР објава

УНИБанка АД Скопје ќе изврши четврта емисија на перпетуални обврзници по пат на приватна понуда, по добиеното одобрување од Комисијата за хартии од вредност на Република С. Македонија.

Ќе бидат издадени 5.000 перпетуални обврзници со поединечна номинална вредност од 1.000 евра и вкупна номинална вредност од 5.000.000 евра.  Обврзниците ќе имаат фиксна каматна стапка 6% на годишно ниво, а која ќе се исплаќа полугодишно на секој шест месеци.

Со издавањето на овој капитален финансиски инструмент, Банката дополнително ќе го зголеми потенцијалот за кредитна поддршка на своите клиенти, правни и физички лица кои имаат потреба од средства.

Обврзниците немаат рок на доспевање, а каматата ќе се исплаќа од добивката на Банката расположлива за распределба.

За инвеститорите можноста да се поседува перпетуални обврзници од УНИБанка АД Скопје претставува можност да се оствари соодветен годишен принос на инвестираните средства, а притоа како иматели на обврзници да имаат приоритет во исплатата на добивка во однос на имателите на акционерски капитал на банката. За пазарот на капитал, издавањето на оваа обврзница претставува збогатување на понудата на инвестициски можности, додека за УНИБанка АД Скопје претставува значаен придонес кон успешен и просперитетен финансиски систем.

100% од емисијата е за познати купувачи, а  за перпетуалните обврзници не постојат ограничувања и со нив може да се тргува на секундарниот пазар на хартии од вредност откако ќе бидат официјално котирани на Македонска берза

УНИБанка АД Скопје и во 2025 година продолжи со стабилни и позитивни финансиски резултати, реализирајќи добивка од 3,3 милиони евра (203 милиони денари) во првото полугодие од 2025 година. Акциите на УНИБанка АД Скопје веќе неколку години се меѓу најатрактивните акции на пазарот, што е потврда за стабилноста и сигурноста на Банката, на довербата која ја ужива во земјава од акционерите и инвеститорите, како и од штедачите и деловните субјекти. Сигнал за инвеститорите дека и во иднина вреди да бидат дел од УНИБанка АД Скопје е нејзиниот доследен раст, стабилното работење и исплатливите резултати, кои укажуваат на сигурна и перспективна иднина.

ПР објава

Стопанска банка АД – Скопје информира дека започнувајќи од 5 октомври 2025 година, официјално ќе започне со извршување на SEPA (Single Euro Payments Area) кредитни трансфери. Со оваа значајна промена, банката им овозможува на своите клиенти – физички и правни лица да вршат плаќања во евра на побрз, поефикасен и побезбеден начин кон 41 земја членка на SEPA зоната.

SEPA претставува унифициран европски платен систем кој ги стандардизира плаќањата во евра во рамките на земјите-членки, без оглед на нивната географска локација. Клиентите на Стопанска банка ќе можат да извршуваат трансакции под еднакви услови како и клиентите на банките во Европската Унија – со значително намалени трошоци, скратено време на процесирање и поголема транспарентност.

Сите SEPA плаќања ќе се обработуваат најдоцна до следниот работен ден, што значи побрза извршна реализација, како и подобра контрола и следење на трансакциите за клиентите.

„Посебно нè радува фактот што приклучувањето кон SEPA зоната не само што ќе донесе подобрување на квалитетот на платежните услуги, туку и ќе создаде силен импулс за зголемена дигитализација, поддршка на е-трговијата, како и полесен пристап до европските пазари и деловни партнери. Веруваме дека ова ќе придонесе за уште подобра конкурентност и деловни можности на македонските компании и ќе донесе реални придобивки за граѓаните“, се наведува во соопштението на Стопанска банка АД – Скопје.

Што значи SEPA за клиентите на Стопанска банка АД – Скопје?

• Плаќања во евра со исти услови како во ЕУ
• Намалени надоместоци за трансакции
• Брза обработка – најдоцна до следниот работен ден
• Подобрена безбедност и следливост на плаќањата
• Поттик за меѓународна е-трговија и деловна соработка

Со ова, Стопанска банка АД – Скопје уште еднаш го потврдува своето стратешко определување за унапредување на своите услуги и активно вклучување во европските финансиски текови, во интерес на своите клиенти и на националната економија.