Nvidia се здружи со некои од најголемите банки и инвестициски компании на Волстрит со цел да обезбеди капитал од 500 милијарди долари за развој на инфраструктура за вештачка интелигенција.

Компанијата соопшти дека постигнала договори со Apollo, BlackRock, Blackstone, Brookfield, Goldman Sachs и KKR, а според најавите, инвеститорите за првпат почнуваат да ги третираат АИ хардверот и инфраструктурата како посебна класа на средства.

Извршниот директор на Nvidia, Џенсен Хуанг, изјави дека компјутерската моќ станува директно поврзана со создавањето приходи во секторот на вештачка интелигенција, поради што компанијата ги обединува водечките светски извори на долгорочен капитал за финансирање на АИ инфраструктура.

Средствата се очекува да бидат насочени кон изградба на нови дата-центри, неопходни за сместување, работа и ладење на огромен број компјутерски чипови што се користат за обработка на податоци и извршување задачи поврзани со вештачката интелигенција.

Според Би-Би-Си, фондот би можел да финансира и нови фабрики за производство на АИ чипови, со цел да се зголемат производствените капацитети и нивната достапност за клиентите.

Од KKR оценуваат дека компјутерската моќ веќе се претвора во една од клучните инфраструктурни категории на глобалната економија.

Графичките процесори на Nvidia, познати како GPU, денес се користат од речиси сите големи технолошки и АИ компании. Меѓу нив се Google, Meta, Amazon, Microsoft, SpaceX, Tesla, OpenAI и Anthropic, кои ги користат чиповите за своите АИ платформи, услуги и чет-ботови.

Од полноќ горивата во Македонија ќе се продаваат по пониски цени, откако Регулаторната комисија за енергетика (РКЕ) донесе одлука за намалување на малопродажните цени на нафтените деривати во просек за 5,81 отсто во однос на претходната одлука од 4 август.

Од 00:01 часот на 11 август, ЕУРОСУПЕР БС-95 ќе чини 87 денари за литар, додека ЕУРОСУПЕР БС-98 ќе се продава по цена од 89 денари за литар. Цената на ЕУРОДИЗЕЛ БС ќе изнесува 91,50 денари за литар, а екстра лесното масло за домаќинство 92,50 денари за литар. Мазутот М-1 НС ќе чини 43,538 денари за килограм.

Со новата одлука, двата вида бензин поевтинуваат за по 4 денари за литар, дизелот за 8 денари за литар, а екстра лесното масло за 6 денари за литар. Цената на мазутот се намалува за 2,881 денари за килограм.

Од РКЕ информираат дека референтните цени на нафтените деривати на светските пазари во однос на претходната пресметка бележат пад. Кај бензините намалувањето изнесува во просек 6,186 отсто, кај дизелот 10,435 отсто, кај екстра лесното масло 8,138 отсто, а кај мазутот 7,151 отсто. Истовремено, курсот на денарот во однос на доларот е понизок за 1,0313 отсто.

Од Комисијата нагласуваат дека утврдените цени се максимални, а трговците можат да ги продаваат горивата и по пониски цени.

Владата ја усвои првата конечна приоритетна листа на предлог-проекти за јавни инвестиции, на која се наоѓаат вкупно 41 проект, соопшти Министерството за финансии.

Листата е подготвена на предлог на Министерството за финансии и Комитетот за јавни инвестиции, а ги опфаќа проектните идеи доставени од институциите, кои претходно биле проверени, оценети и одобрени согласно утврдената постапка.

Станува збор за проекти со средна и голема вредност, односно над пет милиони евра, од областите на инфраструктурата, образованието, здравството, енергетиката, дигитализацијата, земјоделството и водостопанството.

Од Министерството посочуваат дека при оценувањето биле земени предвид комплетноста на документацијата, квалитетот на податоците, стратешката релевантност, како и подготвеноста на проектите за понатамошна разработка.

Усвоената листа ќе претставува основа за дефинирање на новите капитални инвестиции во буџетскиот процес за 2027 година, како и во инвестициските програми на јавните претпријатија и акционерските друштва во државна сопственост.

Од Министерството нагласуваат дека вклучувањето на одреден проект на листата не значи автоматски дека тој ќе биде финансиран или реализиран. Одлуките за финансирање ќе се носат во рамки на капиталното буџетирање, согласно расположливите средства, степенот на подготвеност на проектот и приоритетите на Владата за соодветната фискална година.

Новото управување со јавните инвестиции произлегува од Законот за буџети и од Уредбата за управување со јавни инвестиции, а е дел и од Реформската агенда 2024–2027. Комитетот за јавни инвестиции беше формиран минатата година, а првиот состанок го одржа во април годинава.

Целта на новиот систем, според Министерството за финансии, е одлуките за капиталните проекти над пет милиони евра да се носат на потранспарентен и посистематски начин, а идните буџети полесно да се планираат.