Жителите на Кочани и целата земја се уште ја живеат колективната траума од трагедијата која се случи во март годинава. Помош и поддршка беше потребна тогаш, но и денес, а ќе биде потребна и во иднина.

Токму затоа компанијата Пантелеон ГС одлучи да донира 200 илјади евра за поддршка на семејствата на настраданите и повредените во пожарот во Кочани.

„Како компанија која веќе 5 години успешно работи на пазарот и вработува во најголем дел млади луѓе, сметаме дека хуманоста е доблест, и нешто што треба да се негува. Иако работиме за компании на конкурентниот американски пазар, ние сме дел од оваа локална заедница, и секогаш тежнееме да понудиме поддршка на оние кои се засегнати и им е потребна помош. Вработените во нашата компанија најискрено сочувствуваат со семејствата на загинатите и повредените“ вели Административниот Директор Влатко Палчевски.

За да се обезбеди оваа значајна сума на средства компанијата оваа година ќе се откаже од сите корпоративни настани и сите планирани средства ќе бидат пренасочени кон Фондацијата на Македонската банкарска асоцијација „ЗАЕДНО ЗА ЕДНО“, основана со цел помош и поддршка во рехабилитацијата на повредените во пожарот, поддршка на менталното здравје на настраданите и нивните семејства, како и нивна реинтеграција во општеството.

Пантелеон ГС е прва компанија која не е член на МБА, а донира средства во фондацијата „ЗАЕДНО ЗА ЕДНО“, преку која верува дека средствата навистина ќе стигнат до тие на кои им се потребни. Истовремено, дел од вработените во компанијата директно ќе се вклучат во активностите и реализацијата на проектите на Фондацијата со цел остварување на плановите.

Компанијата Пантелеон ГС и изминативе години беше активна во локалната заедница давајќи поддршка на различни општествено корисни проекти.

Управата за јавни приходи соопшти дека во јули е остварен значителен раст на наплатата по основ на даноци и социјални придонеси за речиси 37,4 милиони евра во споредба со истиот период лани. 

“Вкупната наплата од даноци (данок на додадена вредност (ДДВ), данок на личен доход (ДЛД) и данок на добивка ДД) изнесува 14.344 милиони денари, односно приближно 233 милиони евра, што претставува рекордна месечна наплата досега. По тој основ остварен е раст од 922 милиони денари или околу 15 милиони евра, што е раст од 6,9 проценти во однос на јули 2024 година. Раст од 13,4% се бележи и кај социјалните придонеси, и по тој основ наплатени се 11.823 милиони денари (192,2 милиони евра), што е за 1.400 милиони денари (околу 23 милиони евра) повеќе наплатени средства од придонеси во споредба со истиот месец минатата година“ , велат од УЈП.

Додаваат дека растот на приходите не е случаен и дека е резултат на зголемена економска активност, посветена работа, партнерство и доверба со даночните обврзници.

“Во изминатиот период, а во согласност со законските надлежности, УЈП презеде низа мерки и е во постојан контакт со даночните обврзници и нивните овластени сметководители кои имаат пријавен, но ненаплатен долг за соодветниот даночен период. Целта е навремено подмирување на обврските и избегнување на блокада на сметки и дополнителни трошоци за присилна наплата. Во рамки на превентивните мерки, доставени се персонализирани пораки и известувања до обврзниците, со јасна порака за доброволно усогласување. Придобивката од овој пристап е јасна: се овозможува финансиска стабилност кај обврзниците, се избегнуваат санкции и се гради одржлива даночна историја, што директно придонесува за стабилни јавни финансии и позитивна деловна клима”, велат од УЈП.

Претседателот на САД, Доналд Трамп, повторно јавно го нападна актуелниот претседател на Федералните резерви (ФЕД), Џером Пауел, обвинувајќи го за лошо управување со монетарната политика и политичка пристрасност која ја чини американската економија трилиони долари.

Во објава на својата социјална платформа Truth Social, Трамп напиша: „Џером ‘Предоцна’ Пауел го направи тоа повторно! Тој е ‘предоцна’, и всушност, премногу лут, премногу глупав и премногу политички настроен за да биде претседател на Федералните резерви. Тој ја чини нашата земја трилиони долари“

Трамп го обвини Пауел дека САД ги загубиле трилиони долари поради неговото доцнење со одлуките за каматните стапки, додавајќи и критика кон, како што ја нарече, „една од најнеспособните или најкорумпираните реконструкции на згради во историјата на градежништвото“.

Затегнат односи и политички притисоци врз монетарната политика

Откако Џером Пауел беше назначен за претседател на ФЕД во 2018 година токму од страна на Трамп, нивниот однос често беше обележан со тензии, особено во периоди кога ФЕД одбиваше да ги намали каматните стапки според барањата на Белата куќа. Иако Пауел беше реименуван од претседателот Бајден, неговата независност и натаму е мета на критики од одредени политички кругови.

Импликации за пазарите и инвеститорите

Иако ваквите изјави од американскиот претседател Доналд Трамп се чести во политичката арена, тие можат да предизвикаат несигурност на финансиските пазари, особено ако се доведе во прашање независноста на Федералните резерви која е клучен столб за стабилноста на американската монетарна политика.