И покрај неуспешните разговори со ирската нискобуџетна компанија „Рајанер“, Владата најавува проширување на авиомрежата со пет нови линии од скопскиот и охридскиот аеродром во текот на летната сезона.

Вицепремиерот и министер за транспорт Александар Николоски изјави дека државата останува отворена за соработка со сите авиокомпании, но нема да дозволи привилегирање на една компанија на штета на останатите превозници.

– Даваме субвенција од 9 евра за секој странски патник на скопскиот аеродром и 12 евра за охридскиот. Вратата е отворена за сите, но не можеме да прифатиме условувања и барања за укинување други линии во корист на една авиокомпанија – изјави Николоски.

Тој најави дека во наредниот период ќе бидат воспоставени пет нови авиолинии. Austrian Airlines ќе воведе директна линија Виена–Охрид, додека од Полска ќе бидат отворени летови од Краков и Вроцлав кон Охрид.

Дополнително, од скопскиот аеродром ќе се воведат и две нови летни дестинации – Палермо на Сицилија и Алгеро на Сардинија.

Според Николоски, Северна Македонија е единствената земја во регионот која отвора нови авиолинии во период кога глобалната авиоиндустрија се соочува со сериозни предизвици.

Тој информираше и дека Wizz Air ќе стационира седми авион на скопскиот аеродром, а компанијата разгледува можност за воспоставување база и на охридскиот аеродром.

Министерот додаде дека државата располага со доволни резерви на керозин, над законскиот минимум, и посочи дека дел од аеродромите во регионот моментално се снабдуваат токму од Македонија.

Во организација на КИБС АД Скопје, во Скопје се одржа престижната Годишна конференција на EACHA (European Automated Clearing Houses Association) – единствената европска асоцијација на клириншки куќи и оператори на платни системи.

Настанот собра близу 200 учесници од 30 европски земји, меѓу кои претставници на европски клириншки куќи и оператори на платни системи, меѓународни институции од платежниот сектор, глобални ИТ и консултантски компании, како и експерти и носители на одлуки во областа на дигиталните плаќања, управување со ризици и иновации.

Конференцијата ја отвори претседателот на EACHA, Хозе Луис Ланга, додека за искуствата и развојот на македонскиот платежен сектор говореа генералниот директор на КИБС, Горан Анастасовски и претседателката на Македонската банкарска асоцијација, Маја Стевкова-Штериева.

Меѓу предавачите на конференцијата беа и Флоријан Форст од Capgemini Invent, Марк Муне од Nexus Global Payments, Хуан Хозе Гарсија од Iberpay, како и претставници на водечки европски платежни иницијативи и компании, меѓу кои Ники Андравидиоти од IRIS, Мартин Аскуе од Bizum, Стоилка Арсова од Blink, Лудовик Франческони од Wero, Тереса Мескита од EMPSA, Кристин де Лепелер од CEC, Бенце Мароси од Giro и Пол Волвик-Џојнт од Mastercard Payment Services.

Во рамки на конференцијата беа отворени дискусии за актуелните предизвици и трендови во европската платежна индустрија, со посебен акцент на дигиталните плаќања од сметка на сметка на физичките и онлајн места за продажба, поврзувањето на европските системи за инстант плаќањата со оние во останатиот дел од светот, дигиталната трансформација и усогласувањето со европските стандарди и иницијативи.

Од КИБС АД Скопје посочија дека одржувањето на конференцијата во Македонија претставува значајна можност за домашниот платежен сектор директно да се вклучи во разговорите за идниот развој на европската платежна инфраструктура.

„Одржувањето на конференцијата на EACHA во Скопје претставува значајно признание за КИБС и за македонскиот платежен сектор. Овој настан овозможи размена на искуства и знаења со водечки европски експерти, но,  отвори и важни дискусии за дигитализацијата, инстант плаќањата и усогласувањето со европските стандарди. Веруваме дека ваквите средби ќе придонесат за понатамошен развој на современи и ефикасни платежни услуги во земјата“, вели Горан Анастасовски, генерален директор на КИБС АД Скопје.

EACHA претставува највисок технички и стратешки форум за соработка на клириншките институции во Европа и обединува оператори на платни системи кои секојдневно процесираат милиони меѓубанкарски трансакции. Асоцијацијата има важна улога во развојот на европските стандарди, интероперабилноста и иновациите кај плаќањата.

Акциите на „NVIDIA“ се во фокусот на инвеститорите пред објавувањето на резултатите за првиот квартал, при што пазарот на опции сигнализира можна промена од околу 350 милијарди долари во пазарната вредност на компанијата.

Според анализите на пазарот, опциите имплицираат движење на акцијата од околу 6,5% во двата правци по објавувањето на финансиските резултати, што ја нагласува високата чувствителност на инвеститорите кон идните показатели за раст поврзани со вештачката интелигенција.

И покрај зголемените очекувања, аналитичарите оценуваат дека инвеститорскиот оптимизам околу AI секторот останува силен, особено поради континуираната побарувачка за дата-центри и чипови за вештачка интелигенција.

Акциите на „Nvidia“ пораснаа за 19% од почетокот на годината, додека индексот „S&P 500“ бележи раст од околу 8%, а полупроводничкиот индекс „Philadelphia Semiconductor Index“ е повисок за 57%.

Во исто време, дел од инвеститорите започнуваат со хеџирање и заштита на добивките во технолошкиот сектор, што укажува на зголемена претпазливост по силниот раст на AI-компаниите во последниот период.

Пазарите сега внимателно ќе ги следат прогнозите на „Nvidia“ за идната побарувачка, профитните маржи и инвестициите во инфраструктура за вештачка интелигенција, кои остануваат клучен двигател на глобалниот технолошки раст.