На предлог на гувернерот на Народната банка д-р Трајко Славески, Собранието ја именуваше Арљинда Хасани Синани за вицегувернерка на Народната банка, со мандат од седум години.

Хасани Синани е дипломирана економистка со 22-годишно професионално искуство во банкарскиот сектор, стекнато на стручни и раководни позиции во областа на кредитирањето, управувањето со ризиците и деловното банкарство.

Во текот на својата кариера има извршувано повеќе раководни функции во „Прокредит банка“ АД Скопје и „Стопанска банка“ АД Скопје, каде што од 2023 година ја извршувала функцијата регионален директор за Северозападниот Регион.

Нејзиното професионално искуство опфаќа и области поврзани со регулативната и супервизорската рамка, управувањето со ризиците и корпоративното управување, како и учество во повеќе органи и комитети во рамките на банкарските институции.

Со изборот на Арљинда Хасани Синани за вицегувернерка се зајакнува професионалниот капацитет на Народната банка и се обезбедува непречено остварување на нејзините законски цели и надлежности, заради одржување стабилен и сигурен финансиски систем и поддршка на одржливиот економски развој.

НЛБ Комерцијална банка АД Белград од 1 септември работи под новото деловно име НЛБ Банка АД Белград, со што се заокружува повеќегодишниот процес на интеграција и усогласување со НЛБ Групацијата.

Промената на деловното име не значи промена на правниот субјект. Банката останува исто правно лице, а за клиентите продолжуваат да важат сите постојни сметки, картички, договори, кредити, депозити и дигитални услуги.

Од банката посочуваат дека клиентите не треба да преземаат никаква активност поради промената на името и можат непречено да продолжат да ги користат своите банкарски услуги.

Со новото деловно име се продолжува процесот на хармонизација во рамки на НЛБ Групацијата, во која банките членки на различни пазари го носат истото деловно име.

За клиентите, промената е пред сè брендинг и усогласување во рамки на групацијата, без промени во нивните постојни банкарски односи и услуги.

ТТК Банка и оваа година продолжува со поддршката за децата на своите вработени кои за првпат седнуваат во училишните клупи, обезбедувајќи финансиска поддршка за училишен прибор и опрема, како и можност за слободен ден за нивните родители.

Првиот училишен ден претставува значаен момент за секое семејство, а од ТТК Банка посочуваат дека со оваа иницијатива сакаат почетокот на новата учебна година да биде исполнет со радост и позитивна атмосфера.

„Поддршката за првачињата е дел од нашата програма за бенефиции и ЕСГ активностите, со кои ја потврдуваме грижата за вработените и нивните семејства“, истакнуваат од ТТК Банка.

Со ваквите активности, ТТК Банка ја нагласува важноста на создавањето позитивна работна средина и поддршката на вработените во значајните моменти од нивниот приватен и семеен живот.

Среќна нова учебна година, првачиња! Нека ви биде успешна и исполнета со убави моменти.