Валутниот пар евро/долар остана на повисоки нивоа во последното интрадневно тргување, поддржан од позитивниот краткорочен технички тренд и движењето над 50-дневниот експоненцијален подвижен просек.

Според техничката анализа, EUR/USD и натаму се движи во рамки на краткорочен нагорен корективен тренд, при што цената се движи покрај надолна тренд-линија. Ваквата поставеност засега ја поддржува можноста за продолжување на позитивниот моментум.

Индикаторите за релативна сила продолжуваат да даваат позитивни сигнали, што оди во прилог на натамошен раст. Сепак, тие веќе се наоѓаат во зона на силна прекупеност, што може да го ограничи потенцијалот за дополнителни добивки на краток рок.

Поради тоа, аналитичарите не ја исклучуваат можноста за краткорочна корекција пред евентуално продолжување на нагорниот тренд.

Цената на златото забележа ограничен пад во последното интрадневно тргување, но според техничката анализа, овој потег засега се оценува како привремена корекција која не ја нарушува позитивната краткорочна слика.

Аналитичарите посочуваат дека златото и натаму се движи во рамки на краткорочен нагорен корективен тренд, при што дополнителна поддршка доаѓа од тргувањето над 50-дневниот експоненцијален подвижен просек, познат како EMA50.

Дополнително, на индикаторите за релативна сила е формирана позитивна дивергенција, откако тие претходно достигнале силно препродадени нивоа. Појавата на позитивни сигнали кај овие индикатори ја засилува можноста за враќање на куповниот моментум и продолжување на растот во блиска иднина.

Иако последното движење донесе краткорочно слабеење на цената, техничките показатели засега сугерираат дека златото има простор повторно да се насочи нагоре.

Управата за јавни приходи во периодот од јули 2024 до јуни 2026 година бележи подобрување на даночната усогласеност, со раст кај навременото пријавување и делумно подобрување кај навременото плаќање на даночните обврски.

Според податоците на УЈП, навременото пријавување на ДДВ е зголемено од 92 на 95 проценти, додека кај МПИН е забележан раст од 84 на 91 процент. Кај навременото плаќање, ДДВ бележи подобрување од 77 на 81 процент, а кај МПИН има мало зголемување од 69 на 69,5 проценти.

Од Управата нагласуваат дека стабилноста на јавните приходи не се обезбедува само преку контроли, туку преку повисока доброволна усогласеност, јасни правила, знаење, поддршка и доверба меѓу институциите и даночните обврзници.

Во изминатите две години, УЈП го засилила советодавниот, едукативниот и кооперативниот пристап. Реализирани биле 321.000 инфо контакти, дадени 760 писмени одговори, а на веб-страницата била воспоставена база на знаење со околу 300 прашања и одговори.

Дополнително, спроведени се 11.426 советодавни посети на новорегистрирани даночни обврзници и 3.613 превентивни посети со укажувања за даночно усогласено работење. Во истиот период биле реализирани и 1.485 едукативни активности со средношколци, како и осум работилници за фискална едукација во две основни училишта.

УЈП информира и дека е формиран Совет за даночна усогласеност со 15 членки, како и тело за независна проверка на приговори од даночните обврзници, кое досега разгледало 77 случаи. Одржани биле и повеќе од 55 средби и настани со стопански комори, бизнис здруженија и здруженија на сметководители.

Од Управата посочуваат дека ваквите активности имаат цел да ја зајакнат даночната култура, преку достапни информации, проактивна комуникација и поголема доверба во системот.