Во време кога дигиталните решенија сè повеќе го обликуваат начинот на кој управуваме со пари, „Iute Pay“ го отвора својот прв студентски иновациски предизвик во Македонија – иницијатива што има за цел да им даде глас на младите во креирањето на иднината на плаќањата.

Преку овој предизвик, студентите добиваат можност не само да развијат креативни идеи, туку и да ги претворат во концепти со реален потенцијал за примена. 

Фокусот е ставен на тоа како дигиталниот паричник „Iute Pay“ може да стане дел од секојдневието –прилагодено на потребите на новата генерација корисници.

Предизвикот е отворен за тимови од студенти кои ќе треба да креираат концепт за позиционирање и користење на „Iute Pay“, да ја раскажат својата идеја преку кратко видео од 60 секунди и да ја дополнат со едноставна презентација. 

Процесот е дизајниран да биде динамичен и достапен, оставајќи простор за креативност, иновативно размислување и различни пристапи – од маркетинг стратегии, до продукт идеи.

Најдобрите концепти ќе бидат избрани преку јавно гласање, што дополнително ја отвора можноста за видливост и вклучување на пошироката јавност. 

Победничките тимови ќе освојат награди до 3.000 евра, но уште поважно – ќе добијат шанса нивната идеја да биде разгледана како дел од реални кампањи и развојни процеси.

„Веруваме дека најдобрите идеи доаѓаат кога ќе им се даде простор на младите да размислуваат слободно и храбро. Овој предизвик е покана тие да не ја чекаат иднината, туку сами да ја создадат“, вели Александар Петковски, Извршен Директор на „Iute Pay“.

Овој повик и студентски предизвик е реализиран во партнерство со Факултетот за електротехника и информациски технологии при Универзитет „Св. Кирил и Методиј“(ФЕИТ), кој ја препозна вредноста на оваа иницијатива, преку  активна вклученост на студентите во развојот на платформата за јавно гласање. Нивниот придонес овозможи функционално и современо дигитално искуство, преку кое најдобрите идеи ќе бидат избрани токму од публиката.

Иницијативата има за цел да поттикне нова генерација на креативци, иноватори и идни финтек професионалци, кои ќе размислуваат практично, дигитално и со фокус на корисничко искуство. Воедно, претставува и чекор напред кон градење подлабока врска помеѓу индустријата и младите таленти, отворајќи простор за нивно активно учество во креирање на современи финансиски решенија.

Пријавувањето на тимови е отворено до 18. мај на платформата futurefinance.iute.mk.

Повеќе за отворениот повик, правилата, условите и целосниот бриф се достапни тука.

Министерството за финансии информира дека нова транша од 176,6 милиони денари, односно околу 2,9 милиони евра, е префрлена од централниот Буџет кон Развојната банка со цел поддршка на домашните компании.

Станува збор за втора транша во текот на оваа година, која преку Развојната банка се канализира кон комерцијалните банки, а потоа и до крајните корисници – компаниите. Со ова, вкупниот износ на средства пласирани во домашната економија достигнува 14 милијарди денари или 227,3 милиони евра.

Средствата се обезбедени преку кредитна линија од Унгарската експорт-импорт банка и се наменети за поддршка на приватните инвестиции. Целта е да се поттикне развојот на компаниите и да се забрза економскиот раст.

Кредитната поддршка се одобрува по поволни услови – со каматна стапка од 1,95 проценти годишно, рок на отплата до 15 години и грејс период до три години. Средствата се пласираат преку деловните банки.

Според податоците, вкупниот буџет за оваа намена изнесува 250 милиони евра, додека вкупната вредност на инвестицискиот циклус се проценува на околу 300 милиони евра.

Регулаторната комисија за енергетика донесе нова одлука за цените на горивата, со која од полноќ ќе важат коригирани износи на малопродажниот пазар.

Според одлуката, дизелот поевтинува за 2,5 денари по литар, додека цените на бензините се зголемуваат за 2 денари. Во просек, цените на нафтените деривати бележат раст од 0,40 проценти.

Покрај тоа, екстра лесното масло за домаќинство поевтинува за 1 денар, додека мазутот има мало поскапување.

Новите максимални цени ќе изнесуваат:

• Еуросупер БС-95: 82,50 денари за литар
• Еуросупер БС-98: 84,50 денари за литар
• Еуродизел: 91,50 денари за литар
• Екстра лесно масло: 96,00 денари за литар
• Мазут: 46,656 денари за килограм

Од РКЕ информираат дека промените се резултат на движењата на светските пазари. Според нивните податоци, референтните цени кај бензините се зголемени за 4,268 проценти, додека кај дизелот има пад од 3,760 проценти. Намалување има и кај екстра лесното масло за 1,528 проценти, додека мазутот бележи раст од 1,117 проценти.

Дополнително, курсот на денарот во однос на доларот е благо намален за 0,0452 проценти во споредба со претходниот период.

Од Комисијата потсетуваат дека станува збор за максимално дозволени цени, што им остава простор на трговците да понудат и пониски износи.