Комерцијална банка прави уште еден чекор напред во понудата на напредни и конкурентни услуги, со што граѓаните и компаниите ќе можат да ги намалат своите трошоци за меѓународни трансфери во евра кон СЕПА земјите.

Со новите пониски надоместоци и со поедноставени процедури Банката ќе им овозможи на своите клиенти поевтини и побрзи трансфери за испраќање и прилив во евра кон земји членки на СЕПА.

Новата услуга за овозможување кредитни трансфери во евра преку европската платежна шема SEPA (Single Euro Payments Area), која ќе биде достапна од 07.10.2025 година, ќе значи брзи и сигурни плаќања и приливи во евра со поволни провизии.  

Досегашните провизии за плаќања и приливи во евра за физички лица се намалуваат повеќекратно. За најниските износи на приливи до 29,99 евра, надоместокот ќе изнесува само 10 денари, додека за кредитни трансфери до 29,99 евра надоместокот ќе изнесува само 60 денари. За најголем дел од кредитните трансфери преку Интернет банка клиентите ќе плаќаат до 300 денари, а за кредитни трансфери во евра преку шалтерите на Банката до 360 денари. Највисокиот надоместок за приливи над 10.000 евра ќе изнесува 300 денари, a за кредитни трансфери 600 денари.

За клиентите правни лица, исто така, се воведуваат пониски тарифни ставки со фиксни износи за кредитни трансфери и приливи од земји членки на СЕПА, кои се неколкукратно намалени во однос на досегашните надоместоци.

Комерцијална банка е меѓу првите банки во земјава што воведува тарифник за СЕПА плаќања согласно препораките на Народната банка на Република Македонија. Целта на Банката е преку воведување економични финансиски решенија и напредни дигитални технологии да им овозможи на клиентите едноставно и ефикасно управување со секојдневните финансии и да ја поттикне дигиталната трансформација во земјата.

Ова е уште една потврда за посветеноста на Банката на создавање брзи, сигурни и економични решенија што се прилагодуваат на потребите на клиентите, без разлика дали станува збор за физички лица, компании или деловни субјекти кои работат со партнери низ Европа.

Гувернерот Трајко Славески истакна дека иницијативата на Народната банка за намалување на надоместоците за користење на платежните услуги веќе ги даде првите резултати и изрази задоволство од одлуките на банките за намалување на трошоците.

Гувернерот Славески, на денешната конференција за печатот, најави дека Народната банка ќе покрене иницијатива и за измени на сегашното законско решение за платежната сметка со основни функции, со кои ќе се овозможи нејзино помасовно користење од страна на граѓаните за извршување на плаќањата кај сите банки. Со измените на Законот за платежни услуги и платни системи, се предлага отстранување на дел од постојните ограничувања и значително проширување на услугите што граѓаните ќе можат да ги користат преку платежната сметка со основни функции.

Најзначајните новини се: можност за дозволено пречекорување, можност да се поседува платежна сметка со основни функции дури и ако потрошувачот има други сметки, како и проширен сет бесплатни или евтини услуги – којшто покрај интерните, ќе ги вклучи и меѓубанкарските електронски трансфери, издавањето дебитна картичка и до четири подигнувања  готовина месечно од банкоматите на други банки во износ до 2.000 денари по трансакција. Во овој сет влегуваат и други услуги коишто и досега можеа да ги користат граѓаните, односно уплатите и подигнувањата готовина на банкоматите и шалтерите на банката, користењето на електронското и мобилното банкарство, како и плаќањата со платежна картичка на физичките продажни места и во интернет-трговијата.

„Предлагаме цената на услугите коишто ќе може да се користат преку платежната сметка со основни функции да биде поврзана со износот на минималната бруто-плата во земјава и да биде утврдена најмногу на 0,1% од неа, па согласно важечката минимална бруто-плата за 2025 година, таа би изнесувала 36 денари на месечно ниво. За граѓаните коишто ѝ припаѓаат на групата законски корисници на права, односно т.н. ранливи категории граѓани, овие услуги ќе бидат целосно бесплатни“, истакна Славески.

Народната банка ќе работи со банките и на воспоставување национална мрежа на банкомати за подобар пристап до готовина низ целата земја. Оваа  идеја би се остварила најдоцна до крајот на наредната 2026 година.

Покрај ова, Народната банка ќе предложи и приспособен пакет за микротрговци – најчесто семејни бизниси коишто имаат ограничени ресурси, со цел да се поттикне финансиската вклученост и дигитализацијата на плаќањата. Се очекува дека поповолните услови за користење на платежните услуги ќе бидат достапни за граѓаните и за микротрговците по донесувањето на законските измени, односно дека ќе бидат во примена од почетокот на 2026 година.

Во првата половина од 2025 година, во услови на актуелни глобални предизвици поврзани со геополитичките случувања и промените во трговските политики, ТТК Банка АД Скопје го задржа стабилниот курс на дејствување, коj беше во насока на остварување на приоритетните цели и задачи дефинирани во Деловната политика и во Финансискиот план на Банката за 2025 годинa.

Во анализираниот период, преку своето редовно оперативно работење, Банката успеа да генерира позитивен нето-оперативен приход пред исправката на вредност во износ од 47,4 милиони денари, како резултат на остварените оперативни приходи во износ од 279,6 милиони денари и оперативните трошоци во износ од 232,2 милиони денари. Во истиот период, исправката на вредност на финансиските средства на нето-основа изнесува 8,4 милиони денари. Финансискиот резултат заклучно со 30.6.2025 година е позитивен и изнесува 39 милиони денари.

Финансиски перформанси и остварувања

Во првата половина од годината, билансната сума на Банката достигна ниво од 11.508 милиони денари, што претставува раст од 15,1% во споредба со истиот период од претходната година. Во однос на планот билансната сума е на повисоко ниво од планираното за 271 милиони денари или за 2,4%.

Порастот на билансната сума на Банката е резултат на порастот на изворите на средства каде што вкупната депозитна база бележи раст од 1.358 милиони денари или 16,1%, како резултат нa зголемувањето на депозитите од секторот Домаќинства за 850 милиони денари или 13,4%, проследени со раст на депозитите кај секторот Стопанство за 315 милиони денари односно 20,7%, како и со раст на депозитите од Финансиски институции за 193 милиони денари или 34,7%. Планот за депозитите за овој период од годината е исполнет со надминување од 2,2%.

Од страна на активата, годишниот раст на билансната сума се карактеризира со пораст на паричните средства и паричните еквиваленти и тоа за 365 милиони денари или 11,4%, со истовремено годишно зголемување на бруто-кредитите за 463 милиони денари, односно 9,2%, како резултат на зголемување на кредитите од секторот Домаќинства за 324 милиони денари или 8,6%, со истовремено зголемување на кредитите на секторот Стопанство за 137 милиони денари или 10,7%. Планот за бруто-кредитите на коминтентите за овој период од годината е исполнет со надминување од 1,5%.

Нето-приходите од камати претставуваат основна компонента во формирањето на вкупните приходи од работењето на Банката. Остварените нето-приходи од камати во периодот од 1.1.2025 до 30.6.2025 година изнесуваат 172 милиони денари и бележат пораст од 0,8% во однос на истиот период од претходната година. Порастот во најголем дел се должи на зголемените каматни приходи од секторот Домаќинства и Банки и Финансиски институции, при остварен раст и на приходите од камати од секторот Стопанство. Во однос на планот, нето-приходите од камати се остварени со 97,7%.

Нето-приходите од провизии и надоместоци за услуги во тековниот период
изнесуваат 77,5 милиони денари. Доминантно учество во генерирањето на приходите
од провизија имаат провизиите од платниот промет во земјата со 51,7%, како и
провизиите од картично работење со 28%. Во однос на планот, нето-приходите од
провизии за овој период од годината се остварени со 92,2%.

Останатите приходи од работењето на Банката изнесуваат 23 милиони денари и се повисоки во однос на минатата година, како резултат, во најголем дел, на реализирани приходи од капитална добивка од продажба на преземени средства во тековната година. Во однос на планот се остварени со 84,8%.

Вкупните оперативни трошоци во анализираниот период изнесуваат 232,2 милиони
денари и се за 17,2% повисоки во однос на истиот период минатата година, како резултат, во најголем дел, на повисоките трошоци за плати и вработени. Оперативните трошоци за овој период од годината се во согласност со планираното ниво, односно за 0,6% пониски.

Во споменатиов период, исправката на вредноста на финансиските средства и на посебната резерва за вонбилансна изложеност на нето-основа изнесува 8,4 милиони денари и таа соодветствува со обемот, структурата и квалитетот на пласманите на Банката.

Очекувања за претстојниот период

Претпазливите очекувања за растот на глобалната економија го вклучуваат ефектот од продолжените ризиците, кои главно потекнуваат од неизвесноста од трговските политики, геополитичките случувања и побавното надолно приспособување на инфлацијата. Во првото тримесечје од 2025 година, централните банки во развиените земји продолжија попретпазливо да ја нормализираат монетарната политика.

Амбиентот за монетарната политика и понатаму е неизвесен и под силно влијание на идната динамика на инфлацијата, ризиците од надворешното (трговски политики и намалена доверба на инвеститорите) и домашното окружување, но сепак се очекува раст на кредитната активност во текот на 2025 година и солиден раст на депозитната база и профитабилноста на банките, поддржан и од средствата на државата преку Развојната банка за инвестиции на домашните компании.

ТТК Банка АД Скопје континуирано внимателно ќе продолжи да ги следи макроекономските параметри и мерки, активностите, предвидувањата и измените на законската регулатива на носителите на економските политики и ќе ги усогласува интерните индикатори и работењето, со фокус на одржување на ликвидноста и на долгорочната стабилност. Ќе продолжат континуираните напори за остварување на планираните позиции од деловниот план, но без притоа да се загрозува нивото на квалитет на кредитното портфолио, прудентното управување со ризиците и одржување на високата стабилност, сигурноста и ефикасноста во сите сегменти од работењето.

Банката и понатаму ќе делува во насока на поддршка на населението и на компаниите, водена од приматот за ефикасна и квалитетна клиентската услуга и клиентско задоволство. Во оваа насока, напорите се насочени кон активности за официјално воведување на услугата СЕПА кредитен трансфер за која се очекува да биде достапна од октомври 2025 година. Банката ќе продолжи да инвестира стратешки во напредни технолошки решенија, модерна инфраструктура и безбедносни системи кои се усогласени со највисоките европски стандарди, а со цел да понуди иновативни, достапни и сигурни банкарски услуги приспособени на современите потреби на клиентите.

Потпирањето на сопствените извори на финансирање и понатаму ќе претставуваат основа на деловната стратегија на Банката за 2025 година, при што и натаму депозитите од секторот Население остануваат со доминантно учество во вкупните извори на средства.