Цените на нафтата продолжија да паѓаат во четврток, при што фјучерсите за Брент суровата нафта се намалија за 1,07 долари, или 1,2% под 87 долари за барел. Американската „WTI“ нафта поевтини за 1,13 долари, или 1,4%, на 81,10 долари за барел, продолжувајќи ја серијата загуби на петти последователен ден.

Пазарите реагираат на зголемените надежи дека дипломатските разговори на Блискиот Исток би можеле да доведат до повторно отворање на Ормускиот теснец и ублажување на нарушувањата во снабдувањето.

Ормускиот теснец е од клучно значење за глобалниот енергетски пазар, бидејќи пред конфликтот низ него минуваа испораки на нафта и течен природен гас еквивалентни на околу една петтина од глобалната потрошувачка. Намалувањето на протокот поради конфликтот значително го зголеми ризикот од недостиг и ја одржуваше таканаречената „воена премија“ во цената на нафтата.

Сега инвеститорите очекуваат дипломатските напори на Иран, Оман и Катар да придонесат за стабилизирање на ситуацијата и постепено нормализирање на транспортот низ теснецот. Сепак, аналитичарите предупредуваат дека неизвесноста останува висока, бидејќи преговорите сè уште не гарантираат трајно решение на конфликтот.

Дополнителен притисок врз енергетскиот пазар доаѓа од состојбата со дизелот, чии глобални залихи се под притисок поради оштетувања на рафинерии на Блискиот Исток и нападите врз руски рафинерии.

Американската администрација за енергетски објави информации дека залихите на дестилати, вклучително и дизелот и маслото за греење, во една недела се намалиле за 2,2 милиони барели, на 103,4 милиони барели.

Иако надежите за дипломатско решение ги туркаат цените на нафтата надолу, ризикот од нови нарушувања во снабдувањето останува главниот фактор што може повторно да го промени трендот.

Иранскиот ријал во понеделник падна на ново рекордно ниско ниво, достигнувајќи околу 2,02 милиони ријали за еден американски долар на неформалниот девизен пазар.

Новото слабеење на валутата доаѓа во услови на очекување на дополнителни и пообемни американски санкции против Иран. Вашингтон новиот пакет мерки го опиша како „економски ден Д“, со што се најавува дополнително засилување на притисокот врз иранската економија.

Иранската валута е под силен притисок веќе подолг период поради санкциите, ограничениот пристап до меѓународните финансиски пазари и нарушувањата во економската активност. Слабеењето се интензивираше и во услови на воениот конфликт, кој дополнително ги влоши економските изгледи на земјата.

Иран во периодот пред конфликтот веќе се соочуваше со висока инфлација и слаб економски раст, а дополнителните ограничувања врз трговијата и финансиските текови создадоа уште поголем притисок врз домашната валута.

Новото рекордно ниско ниво на ријалот е сигнал за продлабочување на економските проблеми во Иран и зголемена неизвесност околу идната стабилност на валутата. Дополнителните санкции би можеле да го ограничат приливот на девизи и дополнително да ја зголемат инфлациската тежина врз иранското население и компаниите.

Министерството за финансии издаде нова 15-годишна државна обврзница, која од денес (25 август 2026 година) е примена на котација на Официјалниот пазар на Македонската берза.

Вредноста на емисијата изнесува 2,293 милијарди денари, односно околу 37,3 милиони евра, поделени во 229.390 обврзници со номинална вредност од 10.000 денари.

Обврзницата е издадена на 20 август 2026 година, со рок на достасување до 20 август 2041 година и фиксна годишна каматна стапка од 5,20%. Шифрата за тргување е M200841, а ISIN кодот е MKMINF20GZA7.

Со оваа емисија продолжува задолжувањето на државата на домашниот пазар на капитал. Според објавите на Македонската берза, од почетокот на 2026 година до денес се реализирани 21 емисија на државни обврзници, преку кои Министерството за финансии обезбедило вкупно 27,596 милијарди денари, или повеќе од 448,7 милиони евра.

Новата емисија дополнително го зголемува понудениот обем на државни хартии од вредност на домашниот пазар, а каматната стапка од 5,20% ја прави релевантна за инвеститорите кои бараат долгорочен инструмент со фиксен принос.