Комерцијална банка донесе одлука за измени во својата Тарифа, имајќи го предвид променетиот тарифен модел на Народната банка на Република Северна Македонија, со што значително ги намали надоместоците на услугите за граѓаните и компаниите.

Со цел да обезбедиме поголемо корисничко задоволство и да ја поттикнеме финансиската инклузија, од 1 октомври ги намалуваме надоместоците за платежни услуги за физички лица и до 66%, а дел од нив целосно ги укинуваме.

Со овие измени Комерцијална банка значајно го олеснува користењето платежни сметки, банкарски картички и електронско банкарство, како и вршењето трансфери на средства.

Целосно ќе се укинат дел од надоместоците за физички лица. Кредитните трансфери во интерен платен промет кон платежни сметки на физички лица преку електронско банкарство (Интернет банка и мБанка) и натаму остануваат без надомест, а отсега без надомест ќе бидат и трансферите преку електронско банкарство кон платежни сметки на правни лица во Банката. Се укинува и надоместокот за повлекување готовина од платежна сметка во девизи и од неорочени штедни депозити во девизи на резиденти физички лица.

Како лидер и носител на најновите трендови во дигиталното банкарство во земјава, Банката одлучи електронското банкарство за физички лица да го овозможи без надомест за клиентите што ќе изберат некој од КБ пакетите. Исто така, со новите услови наместо досегашните три, физичките лица месечно ќе имаат 10 бесплатни проверки на состојба со дебитна картичка на банкомат. Стандардните дебитни картички за приматели на плата и пензија и натаму остануваат без надомест, а водењето платежна сметка за физички лица, како и до сега, ќе се наплаќа само доколку клиентот има активност во тековниот месец.

Воедно, Банката до 66% ќе ги намали голем број од надоместоците за платежни услуги за физички лица. Намалувањето се однесува на најразлични услуги поврзани со секојдневното финансиско работење на граѓаните:

• Кредитен трансфер преку шалтерите на Банката кон платежни сметки на физички и правни лица во Банката – намалување во просек за 66%
• Кредитен трансфер преку шалтерите на Банката кон сметки во други банки преку КИБС – намалување во просек за 55%
• Кредитен трансфер преку електронско банкарство кон сметки во други банки преку КИБС – намалување во просек за 35%
• Кредитен трансфер преку шалтерите на Банката кон сметки во други банки преку МИПС – намалување за 64%
• Кредитен трансфер преку електронско банкарство кон сметки во други банки преку МИПС – намалување за 50%
• Месечен надомест за одржување платежна сметка со основни функции – намалување за 41%
• Месечен надомест за користење електронско банкарство (Интернет банка или мБанка) –намалување во просек за 45% и ќе се наплаќа само доколку клиентот ја користи услугата во текот на месецот
• Месечен надомест за користење КБ пакети – намалување во просек за 43%
• Повлекување готовина со дебитна картичка од банкомат на друга банка во земјата – намалување за 40% кај минималниот надомест.
• Уплата во готово преку МИПС – намалување за 62%
• Повлекување готовина од платежна сметка во денари и од неорочени штедни депозити на резиденти преку шалтерите на Банката – намалување за 66% кај минималниот надомест.

Овие нови поволности се дел од посветеноста на Банката кон креирање уште поефикасни и подостапни лични финансии за сите граѓани – без разлика на возраста, местото на живеење или технолошката подготвеност.

Истовремено, Банката донесе одлука за укинување на надоместокот за кредитни трансфери од сметки на правни лица кон други сметки во Банката, извршени преку електронското банкарство.

Извршени се и намалувања на надоместоците за кредитни трансфери од сметки на правни лица кон сметки во други банки преку платните системи КИБС и МИПС, со намалување и до 30% на трансферите извршени преку електронското банкарство.

Овој потег на Комерцијална банка е израз на мотото „Полесно е заедно“, во кое длабоко веруваме. Како системски значајна банка која ја има довербата на над 300.000 клиенти физички лица со активни сметки и над 23.500 компании со активни сметки, Комерцијална банка останува доследна на својата мисија да обезбедува иновативни, пристапни и кориснички ориентирани финансиски решенија, кои го олеснуваат секојдневието на луѓето и придонесуваат кон успешен и напреден економски систем.

Повеќе детали за намалувањата на надоместоците за физички лица кои ќе важат од 1 октомври се достапни на следниот линк.

Деталите за намалувањата на надоместоците за правни лица, кои исто така ќе важат од 1 октомври, се достапни на следниот линк.

ПР објава

НЛБ Банка АД Скопје ги известува своите почитувани пензионери дека на 31.07.2025 година (четврток) започна со предвремена исплата на пензиите за месец јули и средствата се веднаш достапни за користење.

Средствата се достапни преку:

• банкоматите на Банката,
• безготовински плаќања со дебитна картичка во трговската мрежа или онлајн,
• електронско и мобилно банкарство,
• како и преку шалтерите во експозитурите и филијалите.

За побрз и поедноставен пристап до средствата, НЛБ Банка ве советува да ги користите безбедните и ефикасни дигитални канали, како што се мрежата на банкомати, поголемо користење на безготовински плаќања во продажната мрежа или преку електронско и мобилно банкарство со што ќе го заштедите вашето ценето време и ќе избегнете гужви.

Пензијата можете да ја подигнете уште веднаш и во најблиската експозитура на НЛБ Банка.

Во првото полугодие на 2025 година, Стопанска Банка а.д. Битола оствари добивка од 33,6 милиони денари, што главно се должи на засилената наплата на нефункционалното портфолио на Банката, како и на пониското ниво на исправка на
вредност на нефункционални пласмани во однос на претходната година. Капиталната и
ликвидносната позиција беа значајно зајакнати, при што стапката на адекватност на
капиталот се искачи на 32,1%, а ликвидната актива достигна 46,6% од вкупната актива на Банката. Ова остварување е значително над регулаторните барања и над просекот во банкарскиот систем.

Сепак, Банката во последните две години минуваше низ специфичен период, т.е. низ процес на пронаоѓање стратешки инвеститор, како определба дефинирана во Деловната
политика, развојниот и финансискиот план на Банката за 2025 – 2027 година. Фокусот беше кон поголема наплата на кредитите, решавање на нефункционалното портфолио, внимателно кредитирање заради подобрување на квалитетот на кредитното портфолио, како и зајакнување на ликвидносните позиции. Ваквата состојба имаше одраз врз нивото на кредитирање и врз приходите од редовното работење.

Нето-приходите од камата во првото полугодие на 2025 година се годишно пониски за 50 милиони денари или за 21,1% во услови на помала наплата на претходно отпишани камати, пониски приходи од редовни камати, но и пад на расходите за камати при надолна корекција на активните и пасивните каматни стапки. Нето-приходите од провизии и надоместоци годишно се пониски за 24,6 милиони денари или за 42,9%, што главно се должи на намалените приходи, но и на зголемените расходи за провизии и надоместоци на добавувачите на услуги на Банката. Нето-приходите од курсни разлики се позитивни во износ од 8,8 милиони денари или пад за 15,0% споредено со истите од минатата година.

Останатите приходи од дејност годишно се пониски за 3,9 милиони денари или за 25,5%, како резултат на помалку остварени капитални добивки од продажба на преземен имот. Исправката на вредноста на финансиските средства на нето-основа е позитивна и изнесува 6,4 милиони денари, што претставува значително подобро остварување од истиот период во 2024 година, кога беше негативна во износ од 51,3 милиони денари. Загубата поради оштетување на нефинансиските средства на нетооснова изнесува 15,5 милиони денари и ги одразува издвоените загуби за оштетување на преземениот имот во согласност со регулативата на НБРСМ.

Трошоците за вработените бележат намалување од 9,5 милиони денари, односно за 9,9% споредено со претходната година, во услови на намален број вработени и раст на продуктивноста на вработените. Aктивностите за оптимизирање на трошоците резултираа со годишно намалување на останатите расходи од дејноста за 6,1 милиони денари, односно 7,0%, додека амортизацијата не бележи значајни годишни промени во апсолутен износ.

Очекувања за претстојниот период

Приспособувајќи го своето работење на деловната клима и потребите на клиентите, Банката и во претстојниот период ќе ги презема неопходните мерки и активности за реализирање на поставените стратегиски и деловни цели од Деловната политика, развојниот и финансискиот план. Воедно со своето работење во целост останува насочена кон задоволување на потребите на клиентите, умерен раст на кредитната активност при истовремено интензивирање на активностите за наплата на нефункционални кредити, континуирано следење на редовното портфолио и одржување на оптимално ниво на депозитен потенцијал, како од аспект на ликвидноста така и од аспект на профитабилност во работењето, со што и понатаму ќе продолжи со генерирање позитивни финансиски резултати при прифатливо ниво на ризик.