Меѓународниот ден на банките се одбележува секој 4 декември, ден прогласен од Обединетите нации во 2019 година со цел да се препознае клучната улога на банките во економскиот развој, финансиската стабилност и општествениот напредок. Овој ден служи како потсетник за значењето на безбедните, транспарентни и достапни финансиски услуги кои претставуваат темел без кој модерните економии не можат да функционираат.

Како се одбележува во Европа и светот?

Во Европа, одбележувањето на Меѓународниот ден на банките најчесто е фокусирано на финансиска едукација, дигитална трансформација и заштита на потрошувачите. Банкарските здруженија и централните банки организираат панели, конференции и јавни дебати за улогата на банкарскиот сектор во развојот на економијата, како и за новите трендови – инстант плаќањата, дигиталните иновации и сајбер-безбедноста.

Во некои земји се организираат и отворени денови во банките, каде граѓаните имаат можност поблиску да се запознаат со банкарските услуги, да добијат совети за лично финансиско планирање и да се информираат за програмите за поддршка на претприемачите.

На глобално ниво, Обединетите нации и меѓународните финансиски институции ја нагласуваат важноста на финансиската инклузија, со посебен акцент на поддршка на малите бизниси, одржливи проекти и зајакнување на пристапот до финансии во земјите во развој.

Што претставува денот?

Денот е признание за:

Улогата на банките во стабилноста на финансискиот систем;

Поддршката што ја даваат на компаниите, семејствата и инвеститорите;

Инвестициите во дигитализација и иновативни решенија;

Одговорноста што ја имаат кон потрошувачите и заштитата на нивните права.

Одбележувањето на Меѓународниот ден на банките е можност да се потсетиме дека современата економија се потпира на силен, стабилен и инклузивен банкарски сектор кој создава вредност за целото општество.

На 18 декември 2025 година (четврток), со почеток во 14 часот, во просториите на Народната банка ќе се одржи 56. сесија на Клубот на истражувачите. 

Доколку сакате да презентирате Ваш работен материјал на оваа сесија на Клубот на истражувачите, Народната банка Ве поканува да се пријавите со доставување на материјалот на е-адресата: [email protected], најдоцна до 12 декември 2025 година (петок). 

Трудовите треба да бидат изработени согласно со трендовите и стандардите на современите истражувања, што подразбира емпириска анализа, како и систематизирани заклучоци од истражувањето.

На сесиите на Клубот како платформа за дискусија и размена на стручни мислења, може да се презентираат резултати и сознанија и од истражување/труд во работна верзија.

Клубот на истражувачите на Народната банка е отворена платформа за презентација и дискусија на научноистражувачки трудови, особено во доменот на монетарната политика и макроекономијата. Зачленувањето во Клубот на истражувачите е од отворен карактер, за што можете да видите подетални информации на веб-страницата на Народната банка www.nbrm.mk, во делот Клуб на истражувачи.

На престижната церемонија на финансискиот магазин „The Banker“ во Лондон, НЛБ Банка Скопје ја понесе титулата „Банка на годината“ за 2025 година. Ова признание ја потврдува континуираната посветеност на Банката кон извонредност, иновации и услуга на клиентите во банкарскиот сектор.

Наградата „Банка на годината“ претставува репер за квалитет и достигнувања во глобалната банкарска индустрија. Секоја година, The Banker оддава признание на водечките банки ширум светот кои покажале исклучителни перформанси и лидерство на нивните пазари во насока на стратешки иницијативи, технолошки иновации, програми за одржливост и услуга за клиентите.

Издвојувајќи се токму по своите силни финансиски резултати, клиентски ориентиран пристап, посветеност кон дигиталната трансформација и зелено финансирање, НЛБ Банка Скопје, по дванаесетти пат, ја доби оваа престижна награда.

„Водени од очекувањата на клиентите за дигитални услуги, персонализација и одржливост, вложивме во напредни технологии и зелени иницијативи. Во текот на изминатата година ја унапредивме нашата дигитална платформа и развивме финансиски решенија прилагодени на потребите на клиентите. Нашиот врвен приоритет е трансформација во целосно дигитална банка, при што истовремено ја продлабочуваме довербата на клиентите, поттикнуваме иновации и продолжуваме да бидеме одговорни лидери на пазарот“, истакнува Претседателот на Управниот одбор на НЛБ Банка Скопје, Тони Стојановски и додава дека оваа награда е само уште една потврда за улогата на Банката во финансискиот систем и севкупниот економски развој во земјата.

Во текот на минатата година, НЛБ Банка направи значителни инвестиции во решенија за дигитално банкарство, обезбедувајќи беспрекорни, безбедни и лесни за користење искуства за своите клиенти. Фокусот на Банката на технолошкиот напредок и одржливиот раст ѝ помогна да испорача широк спектар на иновативни производи и услуги прилагодени за да ги следат еволуирачките потреби на поединците и бизнисите.

Истовремено, како резултат на засилената деловна активност и внимателното управување со ризици, НЛБ Банка оствари зголемена нето добивка и забележа раст на кредитите и депозитите, притоа континуирано вложувајќи во општествено корисни проекти и иницијативи.